قازاق فيلم كينو تۇسىرۋگە 14,6 ميلليارد تەڭگە جۇمساپ، 695 ميلليون تەڭگە پايدا تاپقان

الماتى. KAZINFORM - «قازاق فيلم» ۇلتتىق كينوستۋدياسى تۇسىرگەن فيلمدەر ءوز بيۋدجەتىن اقتامايدى. كومپانيا بۇگىندە %95 شىعىنعا باتىپ وتىر. قۇيىلعان قارجىنىڭ قايتارىمى 5 پايىزعا دا جەتپەيدى. بۇل تۋرالى Jibek Joly تەلەارناسىنىڭ ءتىلشىسى حابارلادى.

ماسەلە جوعارى اۋديتورلىق پالاتانىڭ تەكسەرىسى بارىسىندا انىقتالدى. كوممەرتسيالىق تۇرعىدان ءساتتى جوبالاردىڭ جوقتىعى، كاسسانىڭ ازدىعى جانە فيلم ءوندىرىسىنىڭ شەكتەن تىس شىعىنى ءۇشىن ستۋديا تالاي جىل سىنعا ۇشىراپ كەلەدى.

اتى اڭىزعا اينالعان ەلىمىزدىڭ باستى كينوستۋدياسى قازىر شتاتتىق رەجيمدە جۇمىس ىستەپ تۇر. تەك بۇرىنعى تابىستىڭ ورنىن قارىز بەن شەشىلمەي كەلە جاتقان تۇيتكىلدەر باسقان.

«فيلمدەردىڭ � ىن جەكە پروداكشندار مەن كومپانيالار تۇسىرەدى. نەلىكتەن قازىر مۇنداي كاسسالىق تاپشىلىق پايدا بولدى. بۇل كينوستۋديانىڭ بيۋدجەتكە قاراپ قالعانىنىڭ ناتيجەسى. ياعني، بيۋدجەت بار بولسا جۇمىس ىستەيدى. بيۋدجەت جوق كەزدە جۇمىس ىستەمەيدى. بۇل كينوستۋدياعا قاتتى اسەر ەتەدى، ويتكەنى كينوستۋديا كەزىندە جىلىنا 40 فيلمگە دەيىن تۇسىرگەن»، - دەدى ش. ايمانوۆ اتىنداعى «قازاق فيلم» ۇلتتىق كينوستۋدياسى ا ق پرەزيدەنتىنىڭ م. ا ايدار وماروۆ.

«قازاق فيلم» قولداۋ كورسەتكەن 17 كارتيناعا جالپى 14,6 ميلليارد تەڭگە ءبولىندى. ودان 695 ميلليون تەڭگە كولەمىندە قارجى ءتۇستى. وسىلايشا ورتاشا ەكونوميكالىق تابىس - %4,8 دەڭگەيىندە قالىپ وتىر.

«2023 -جىلدىڭ قورىتىندىسى بويىنشا بەرەشەك سوماسى 650 ميلليون تەڭگەنى قۇرادى. ال، 2022 -جىلدىڭ قورىتىندىسى بويىنشا كومپانيانىڭ شىعىنى 2021 -جىلمەن سالىستىرعاندا 4,7 ەسە ءوستى. شىعىن كولەمى 800 ميلليارد تەڭگەدەن استى. بۇل جەردە باسقارۋ مەنەدجمەنتى قالاي جۇزەگە اسىرىلۋدا دەگەن سۇراق تۋىندايدى»، - دەيدى ق ر جوعارى اۋديتورلىق پالاتاسىنىڭ مۇشەسى نۇرلان نۇرجانوۆ.

2019 -جىلدان بەرى ەلىمىزدەگى كينو ءتۇسىرۋ قۇزىرەتى زاڭدى تۇردە ۇلتتىق كينونى قولداۋ ورتالىعىنا بەرىلگەن. بۇرىن كينوستۋديا تىكەلەي مەملەكەتتىك تاپسىرىسپەن جۇمىس ىستەگەن بولسا، قازىرگى تاڭدا قانداي دا ءبىر فيلم ءتۇسىرۋ ءۇشىن تەندەرگە قاتىسۋى ءتيىس. ال سالا سىنشىلارى فيلمنىڭ ءساتتى شىعۋى ءۇشىن ءوندىرىسىن رەتكە كەلتىرۋ قاجەت ەكەنىن ايتادى. ايتپەسە، كينوتەاترلار ساپاسىز ءونىمدى المايدى. سودان مەملەكەتتىك تاپسىرىسپەن تۇسىرىلگەن فيلمدەر كوبىنە ارحيۆتە شاڭ باسىپ قالادى.

«قارجى بولگەن كەزدە تەك قانا فيلمدەردىڭ تۇسىرىلىمىنە عانا ەمەس، سونىمەن قاتار ونىڭ ديستريبيۋتسياسىنا پروكاتىنا جانە جارناماسىنا الدىن الا ويلانىپ ءبولىنۋ كەرەك دەپ ەسەپتەيمىن. ەگەر ونداي مۇمكىندىك بولماسا زاڭ جۇزىندە جەكەمەنشىك كينوتەاترلاردى وسى مەملەكەتتىك تاپسىرىسپەن تۇسىرىلگەن فيلمدەردى كورسەتۋگە مىندەتتەۋ كەرەك. ءبىزدىڭ كورشى مەملەكەتتەر سياقتى مەملەكەتتىڭ وزىنە تيەسىلى كينوتەاترلار سالىنۋى كەرەك. سوندا عانا كينومىز حالىققا جەتەدى»، - دەيدى كينوسىنشى دانا امىربەكوۆا.

مادەنيەت جانە اقپارات مينيسترلىگى كينوستۋديا جاعدايىن رەتتەۋ ءۇشىن كينو تۋرالى زاڭعا وزگەرىس ەنگىزۋدى جوسپارلاپ وتىر. زاڭ وزگەرسە، كينوستۋدياعا ينۆەستورلار تارتىلادى.

اۆتور

ەربول جانات