قازاق ءتىلىن قورلاعان الماتىلىق قىز ەكى جىلعا سوتتالدى

استانا. KAZINFORM - الماتىلىق 21 جاستاعى ەلينا ليۋ قازاق ءتىلى تۋرالى ايتقان بەيادەپ سوزدەرى ءۇشىن ەكى جىلعا سوتتالدى.

سوت ونى ۇلتارالىق ارازدىق تۋدىرعانى ءۇشىن كىنالى دەپ تاپتى، - دەپ حابارلايدى Massaget.kz ءتىلشىسى.

جۋرناليست ميحايل كوزاچكوۆتىڭ مالىمەتىنشە، الماتىلىق قىزعا زاڭ تۇرعىسىنان ق ر قىلمىستىق كودەكسىنىڭ 174-بابى بويىنشا جازا تاعايىندالعان.

«ەلينا ليۋ وسى جاسىنا دەيىن كوپ نارسەگە قول جەتكىزدى: دۇنيەگە بالا اكەلدى، الەۋمەتتىك جەلىلەرگە تىركەلدى، ەندى مىنە تۇرمەدە وتىر. ول قىلمىستىق كودەكستىڭ 174-بابى «الەۋمەتتىك، ۇلتتىق، رۋلىق، ناسىلدىك، تەكتىك-توپتىق نەمەسە دىني الاۋىزدىقتى قوزدىرۋعا، ازاماتتاردىڭ ۇلتتىق ار-نامىسى مەن قادىر-قاسيەتىن نە دىني سەزىمدەرىن قورلاۋعا باعىتتالعان ارەكەتى» ءۇشىن سوتتالدى»، - دەيدى ول.

ەلينا بىلتىر كۇزدە TikTok جەلىسىندە تىكەلەي ەفير وتكىزگەن. ونى مىڭعا جۋىق كورەرمەن تاماشالاعان. تىكەلەي ەفير كەزىندە وقىرماندارىنىڭ ءبىرى ونىڭ ۇلتى مەن ءدىنىن سۇراپ، مەملەكەتتىك تىلدە سويلەۋىن تالاپ ەتەدى. ال الماتىلىق قىز بۇل سۇراققا دورەكى جاۋاپ بەرەدى.

«ول قازاق ءتىلىن ۇناتپايتىنىن ايتىپ، بۇل تىلدە تەك «مامبەتتەر» سويلەيتىنىن جەتكىزگەن. سونداي-اق ول الماتىداعى اباي كوشەسىندەگى كەپتەلىستەرگە اۋىلدان كەلگەندەردى كىنالى دەپ ايىپتاعان. قالا بەردى قالادا ەشكىم قازاقشا سويلەمەيتىنىن باسا ايتىپ، جازىلۋشىسىنا ۇرىسقان»، - دەيدى جۋرناليست.

وسىلايشا، ليۋدىڭ ەفيردەگى ءسوزى ينتەرنەتتە تارالىپ، الەۋمەتتىك جەلىنى باقىلايتىن جەدەل ۋاكىل وندا الاۋىزدىق بەلگىلەرىن كورگەن.

ساراپشى ليۋ سوزدەرىندە قازاق ۇلتى وكىلدەرىنىڭ ار-نامىسىنا قاتىستى قورلاۋ جانە ۇلتتىق ارازدىق پەن الاۋىزدىقتى قوزدىرۋ بەلگىلەرى بار ەكەنىن العا تارتقان. ناقتىراق ايتساق، «قازاق ۇلتىنىڭ وكىلدەرىن كەمسىتۋ» جانە «قازاق ۇلتىنىڭ ءتىلىن مەنسىنبەۋشىلىك» بار دەگەن قورىتىندىعا كەلگەن.

سوتتا ليۋ وزىنە جازىلۋشىنىڭ مەملەكەتتىك ءتىلدى بىلمەگەننەن كەيىن، قازاقستاننان كەتۋىن تالاپ ەتىپ «ارانداتۋشىلىققا بوي الدىرعانىن ايتقان». ول كىناسىن مويىنداماي، تەك جاعىمسىز پىكىر جازعانداردىڭ «نامىسىنا تيگىسى كەلگەنىن، «ۇسقىنسىز ءتىل» دەگەن ءسوزدى قازاق تىلىندەگى بەيادەپ سوزدەرگە قاتىستى ايتقانىن تۇسىندىرگەن. ءبىراق سۋديا قاليما دۋانبەكوۆا ونىڭ جاۋابىن قاناعاتتاندىرمادى.

«سوت ليۋدىڭ كىناسىنىڭ دالەلدەنگەنى تۋرالى قورىتىندىعا كەلىپ، ول ءوزىنىڭ ءىس-ارەكەتىمەن ۇلتارالىق الاۋىزدىقتى تۋدىرعانىمەن، ۇلتتىق ار-نامىس پەن قادىر-قاسيەتتى قورلاۋمەن، ازاماتتاردىڭ قازاق ۇلتى وكىلدەرىنىڭ نامىسىنا تيگەن. ليۋدىڭ سوزدەرى قازاقستان رەسپۋبليكاسىنىڭ ازاماتتارىنا ازاماتتىق جانە ساياسي دەسترۋكتيۆتى كوزقاراس تۋدىرادى»، - دەلىنگەن سوت ۇكىمىندە.

ناتيجەسىندە سوت ونى ۇلتارالىق الاۋىزدىقتى قوزدىرعانى ءۇشىن كىنالى دەپ تاۋىپ، ەكى جىلعا سوتتادى. ەلينا جازاسىن تومەنگى قاۋىپسىزدىك كولونياسىندا وتەيدى. ال بالاسى اجەسىنىڭ تاربيەسىنە بەرىلدى. ۇكىم ءالى زاڭدى كۇشىنە ەنگەن جوق.