قازاق ءتىلىن جاساندى ينتەللەكت ارقىلى دامىتۋدىڭ مودەلى ازىرلەنىپ جاتىر
استانا. KAZINFORM - نازاربايەۆ ۋنيۆەرسيتەتى جانىنداعى اقىلدى جۇيەلەر جانە جاساندى ينتەللەكت ينستيتۋتى (ISSAI) قازاق ءتىلىنىڭ اۋقىمدى مودەلىن (LLM) دايىنداپ جاتىر.
جوبا - قازاقستاندا جانە ورتالىق ازيادا جاساندى ينتەللەكت مۇمكىندىكتەرىن دامىتۋعا ارنالعان.
«KAZ- LLM جۇيەسى سىزبەن قازاقشا سويلەسە الادى، سۇراقتارعا قازاقشا جاۋاپ بەرەدى. قوسىمشا ورىس، اعىلشىن جانە تۇرىك ءتىلى قاتار جۇرەدى. بۇل جوبانى بيىل ساۋىردە قولعا الدىق، قازىر شامامەن 30 ميلليارد توكەن جينادىق. قىركۇيەكتە دەرەكتەردى جيناۋ جۇمىسىن اياقتايمىز، ال ايدىڭ ورتاسىندا بولجامدى مودەل دايىن بولادى دەپ جوسپارلاپ وتىرمىز. 16 -جەلتوقساندا جوبانى قالىڭ جۇرتقا جاريالايمىز»، - دەدى نازاربايەۆ ۋنيۆەرسيتەتى اقىلدى جۇيەلەر جانە جاساندى ينتەللەكت ينستيتۋتى (ISSAI) ديرەكتورىنىڭ وپەراتسيالىق قىزمەتتەر جونىندەگى ورىنباسارى ەربول ابسالياموۆ باسپا ءسوز ءماسليحاتىندا.
ودان ءارى قازاق ءتىلىنىڭ اۋقىمدى مودەلىن سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى جۇزەگە اسىرادى.
«جۇيە ۆيكيپەدياداعى ماقالالار، جاڭالىقتار، مەملەكەتتىك سايتتار جانە جالپى قولدانىمداعى (Common Crawl) دەرەككوزدەردەن تۇرادى. كەيىنگى 5 جىلدا ISSAI ارنايى قازاق ءتىلى تۋرالى كوپتەگەن دەرەكتەر جيناعىن ازىرلەدى. كەڭ اۋقىمدى پايدالانۋدى قامتاماسىز ەتۋ ءۇشىن پلاتفورماعا تىركەلۋ ۇسىنسا، وزىق قولدانۋشىلار ءۇشىن ارنايى قولدانبالى باعدارلامالاۋ ينتەرفەيسىن (API) ۇسىنادى»، - دەيدى ول.
سونداي-اق ISSAI ينستيتۋتى تاعى بىرنەشە جوبانى ۇسىنىپ وتىر:
- KazEmoTTS - قازاق ءتىلىنىڭ ەموتسيونالدى دىبىستالۋىنا ارنالعان دەرەكتەر جيناعى؛
- Tilmash - قازاق، ورىس، اعىلشىن، تۇرىك، تاتار جانە وزبەك تىلدەرىنە ەكى جاقتى اۋدارما جاساۋعا مۇمكىندىك بەرەتىن جوبا؛
- Umay - ايەل داۋسىندا قازاق تىلىندە ەركىن سويلەيتىن ۆيرتۋالدى كومەكشى.
اۆتور
داۋلەت ىزتىلەۋ