قازاق عالىمى ءبىر مارتە ەگىلىپ، 5-6 جىل بويى ءونىم بەرەتىن بيدايدى نارىققا شىعارماق
ءال-فارابي اتىنداعى قازاق ۇلتتىق ۋنيۆەرسيتەتى بيولوگيا جانە بيوتەحنولوگيا فاكۋلتەتىنىڭ دەكانى، قاۋىمداستىرىلعان پروفەسسور، بيولوگيا عىلىمىنىڭ دوكتورى مەرۋەرت قۇرمانبايەۆا 2023 -جىلعى مەملەكەتتىك عىلىمي ستيپەنديا يەگەرى اتاندى، دەپ حابارلايدى Kazinform.
عالىم بايقاۋعا «قازاقستاننىڭ وڭتۇستىك جانە وڭتۇستىك- شىعىسىندا بيوالۋانتۇرلىلىك پەن توپىراقتىڭ قۇنارىن ساقتاۋدا كوپجىلدىق بيدايدى ەگىنشىلىككە ەنگىزۋ» عىلىمي جوباسىن ۇسىنعان.
جوبانىڭ ماقساتى - ەكولوگيالىق جانە ەكونوميكالىق تۇرعىدان ءتيىمدى كوپجىلدىق بيدايدى نارىققا شىعارۋ.
جوبا جەتەكشىسىنىڭ ايتۋىنشا، قازىرگى تاڭدا ءبىرجىلدىق بيداي مول ءونىم بەرگەنىمەن، توپىراقتىڭ بۇلىنۋىنە اكەلەدى.
سونداي-اق ەگىستىك ناۋقانىندا ءبىرجىلدىق بيدايدى ەككەن كەزدە جىل سايىن كوپ شىعىن جۇمسالادى.
پروفەسسور مەرۋەرت قۇرمانبايەۆا ۇسىنعان كوپجىلدىق بيداي توپىراقتى ەروزياعا ۇشىراۋدان ساقتايدى.
سونىمەن قاتار جىل سايىنعى جەر جىرتۋ مەن داقىلدى ەگۋ جۇمىستارىن قاجەت ەتپەيدى.
«قازاقستاننىڭ ۇلتتىق برەندتەرىنىڭ ءبىرى - بيداي. كوپجىلدىق بيدايدى ءبىر رەت قانا ەگىپ، 5-6 جىل ءونىم الامىز. بۇل ەلىمىز ءۇشىن وتە ءتيىمدى. قازىرگى ۋاقىتتا بۇكىل الەمدە 40 تان استام زەرتتەۋ ورتالىقتارى كوپجىلدىق داقىلداردى زەرتتەۋمەن اينالىسادى. ءبىزدىڭ جوبامىز قازاقستانداعى كوپجىلدىق بيدايعا جۇرگىزىلگەن تۇڭعىش زەرتتەۋ بولىپ تابىلادى. قازىرگى تاڭدا عىلىمي جوبامىزدى نارىققا شىعارۋدى جوسپارلاپ وتىرمىز. كوپجىلدىق داقىلدىڭ ءبىرجىلدىق داقىلدان ارتىقشىلىعى - ولاردا تامىر جۇيەسى جاقسى دامىعان. بۇعان قوسا، توپىراقتىڭ ساپاسىن جاقسارتۋ، كومىرتەكتىڭ ءسىڭۋىن ارتتىرۋ، سۋدىڭ ەنۋىن قامتاماسىز ەتۋدە ىقپالى زور. تۇقىمىنان بولەك، جەرۇستى بولىگى ەلىمىزدەگى جەمشوپ تاپشىلىعى ماسەلەسىنە وڭ اسەرىن تيگىزەتىنى ايقىن»، - دەيدى عالىم مەرۋەرت قۇرمانبايەۆا.
بۇگىندە قاز ۇ ۋ عالىمدارى عىلىمي جوباعا پاتەنت العان.
قازىرگى تاڭدا كوممەرتسيالاندىرۋ جۇمىستارى ءجۇرىپ جاتىر.