قازاق عالىمدارى سەلەن مەتالىن بايىتۋ ارقىلى 15 ميلليون دوللار تابىس اكەلگەن

استانا. KAZINFORM - قازاقستاندىق عالىمداردىڭ ادىسىمەن تازارتىلعان سەلەننەن جىلىنا 15 ميلليون دوللار كىرىس تۇسەدى. عىلىم جانە جوعارى ءبىلىم ءمينيسترى ساياسات نۇربەك تازارتىلعان سەلەننىڭ ۇلگىسىن جۋرناليستەرگە تانىستىردى.

«ءبىزدىڭ قانىش ساتپايەۆ ۋنيۆەرسيتەتىنىڭ بازاسىنداعى كەن بايىتۋ جانە مەتاللۋرگيا ينستيتۋتى بىرنەشە جىلدار بويى سەلەن دەگەن سيرەك مەتالدى بايىتۋدىڭ جاڭا ادىستەمەسىن پىسىقتاعان. التى جىلداي ەكى ۇلكەن نىسانالىق گرانت بويىنشا جۇمىس ىستەگەن. الدىڭعى جىلى ءبىز كەن بايىتۋ ينستيتۋتىنا ناقتى تاپسىرما بەردىك. «ەندى تەوريالىق تۇرعىدا جاساعان ادىستەمەڭىزدى ناقتى قولدانبالى فورماتقا اۋىستىرىڭىز» دەدىك. ولار ءبىر جىلدىڭ ىشىندە ارنايى پەشتى جاساپ شىقتى. بۇل - مىرىش، مىس سياقتى مەتالداردىڭ بالقىتۋدان شىققان قالدىق. ونىڭ ىشىندە قورعاسىن، التىن جانە سەلەن بار. لاس سەلەننىڭ ءبىر كەلىسى نارىقتا 10-12 دوللار تۇرادى. ءبىزدىڭ عالىمداردىڭ ادىسىمەن وسى سەلەن 99,5 دەيتىن تازالىق كورسەتكىشىمەن رافينادتالدى. ءبىر جاقسى جەرى، رەاگەنتسىز. قازىر وسىلاي تازارتىلعان سەلەننىڭ ءبىر كەلىسى 150 دوللار تۇرادى. وسىلاي عالىمدارىمىز كاسىپورىننىڭ كىرىس كوزىن 15 ەسە ۇلعايتتى»، - دەدى ساياسات نۇربەك.

سونداي- اق، ول بىلتىر تامىزدا وسى جوباعا ارناپ بالقاش مىس زاۋىتىندا ەكسپەريمەنتالدى سەح اشىلعانىن ەسكە سالدى.

«ەندى جىلىنا 100 تونناداي تازارتىلعان سەلەن شىعارامىز. بۇل - 15 ميلليون دوللارداي تازا كىرىس دەگەن ءسوز»، - دەدى مينيستر.

اۆتور

ەسىمجان ناقتىباي