قازاق عالىمدارى جاساعان «تايماس» بيدايىنىڭ ساپاسى شەتەلدىك جانە وتاندىق سورتتاردان اسىپ ءتۇستى
استانا. KAZINFORM - سەرىك جۇمانعارين اقمولا وبلىسىنداعى ا. ي. بارايەۆ اتىنداعى استىق شارۋاشىلىعىنىڭ عىلىمي-وندىرىستىك ورتالىعىنا باردى. كليماتتىڭ وزگەرۋى - عىلىمي وندىرىستىك ورتالىقتىڭ قىزمەتتىك باعىتىن انىقتايتىن نەگىزگى زەرتتەۋ جۇمىسىنىڭ ءبىرى. ع ءو و قۇرعاقشىلىققا جانە ىستىققا ءتوزىمدى ءداندى داقىلداردى، ءداندى- جەمشوپ داقىلدارىن، كوپجىلدىق بۇرشاق جانە ازىقتىق شوپتەرىن ىرىكتەۋمەن، تۇقىم شارۋاشىلىعىمەن جانە كوممەرتسيالاندىرۋ جۇمىستارمەن اينالىسادى.
ورتالىق عالىمدارى شىعارعان «تايماس» جۇمساق جازدىق بيدايدىڭ جاڭا سورتىنىڭ ساپاسى شەتەلدىك جانە وتاندىق سەللەكتسيالىق سورتتاردان الدەقايدا جاقسىراق، شارۋالار اراسىندا ۇلكەن سۇرانىسقا يە.
بىلتىر اتالعان سورت قاراعاندى وبلىسىنىڭ فەرمەرلەرىنە ءبىر گەكتاردان 30 سەنتنەر ءونىم الۋعا مۇمكىندىك بەردى.
ورتالىق قىزمەتكەرلەرىنىڭ جوعارى عىلىمي مۇمكىندىكتەرى مەن جەتىستىكتەرى حالىقارالىق دەڭگەيدە تانىمال. ع ءو و 2027 -جىلى اۋىل شارۋاشىلىعى باعىتى بويىنشا تابيعاتتى قورعاۋ 10 دۇنيەجۇزىلىك كونگرەسسىن وتكىزۋدى جوسپارلانىپ وتىر.
سونداي-اق ورتالىق كوپجىلدىق ءشوپتىڭ تۇرلەرى مەن سورتتارىنىڭ الۋان تۇرلىلىگى بويىنشا ەلىمىزدە كوش باستاپ تۇر. بۇرشاقتى شوپتەردىڭ جانە ءبىر جىلدىق جەمشوپ داقىلدارىنىڭ 10 ءتۇرىنىڭ 29-دان استام سورتى شىعارىلدى.
جينالعان تاجىريبە مەن ورتالىقتىڭ عىلىمي بازاسىن ەسكەرە وتىرىپ، سەرىك جۇمانعارين ورتالىققا جايىلىمداردىڭ دەگراداتسياسىن تومەندەتۋ بويىنشا ۇسىنىستار جاساۋدى تاپسىردى.
«بىلتىر جەرگىلىكتى تۇرعىندارعا قوعامدىق جايىلىمدارعا قول جەتكىزۋگە مۇمكىندىك بەرەتىن جايىلىم تۋرالى زاڭ قابىلداندى. ءبىراق ماسەلەنىڭ ەكىنشى جاعى - ولاردىڭ دەگراداتسياسى. الداعى بىرنەشە جىلدا ءبىزدىڭ الدىمىزدا بارلىق جايىلىمدىق جەرلەرگە قايتا سەبۋ مىندەتى تۇر. ماسەلەنى ءتيىمدى شەشۋ جانە قاجەتتى كولەمدى جەمشوپ داقىلدارىنىڭ تۇقىمىن ءوندىرۋدى جانە بارلىق قاجەتتىلىكتەرمەن قامتاماسىز ەتۋ جونىندە ۇسىنىس بەرۋلەرىڭىزدى سۇرايمىن»، - دەدى ۆيتسە-پرەمەر ينستيتۋت قىزمەتكەرلەرىنە.
جايىلىم جەرلەرىنىڭ دەگراداتسياسى ماسەلەسىن شەشۋ ءۇشىن كوپجىلدىق جانە بۇرشاق تۇقىمداس شوپتەر، سونىمەن قاتار ءبىر جىلدىق جەمشوپ داقىلدارىنىڭ تۇقىمىن ارتتىرۋ ۇسىنىلدى.
سونداي-اق مال ازىعى داقىلدارىنىڭ وتاندىق سورتتارىن كوبەيتۋمەن اينالىساتىن ەليتالىق تۇقىم جانە تۇقىم شارۋاقوجالىقتارىن كەڭەيتۋ جوسپارلانعان.
بۇدان بولەك، سەرىك جۇمانعارين ورتالىق بازاسىندا كومىرتەكتى ەگىنشىلىكتى زەرتتەۋدى ۇسىندى. ول نارىقتاعى قۇنى بيدايدان الدەقايدا جوعارى جەمشوپتىڭ جوعارى ەكسپورتتىق الەۋەتىن اتاپ ءوتتى.
ۆيتسە-پرەمەر قازاقستاندا جۇرگىزىلىپ جاتقان اۋىلشارۋاشىلىق داقىلدارىن ءارتاراپتاندىرۋ ساياساتىن ەسكەرە وتىرىپ، قۇرعاقشىلىققا ءتوزىمدى، مايلى، مال ازىعى داقىلدارىن كوبەيتۋ اۋىل شارۋاشىلىعى عىلىمىن دامىتۋدىڭ باعدارىنا اينالۋعا ءتيىس ەكەنىن ايتتى.
اۆتور
جانات قاپالبايەۆا