قازاق بوكسشىلارى پاريجدەن كەمى ءبىر التىن الادى - ەرماحان ىبرايىموۆ

استانا. KAZINFORM - بوكسشى، حالىقارالىق سپورت شەبەرى، 2000-جىلعى سيدنەي وليمپياداسىنىڭ جەڭىمپازى ەرماحان ىبرايىموۆ پاريجدە قاي بوكسشىعا سەنىم ارتاتىنىن ايتتى.

- ەرماحان ساعي ۇلى، الداعى جازعى وليمپيادادا قاي بوكسشىدان ءۇمىت كۇتەسىز؟

- نەگىزى الدىن-الا اناۋ التىن، مىناۋ كۇمىس، ول قولا الادى دەپ ايتۋ دۇرىس ەمەس. ونداي بولجام ۇلتتىق قۇرامداعى ءاربىر بوكسشىعا كەرى اسەرىن تيگىزبەسە، پايداسىن اكەلمەيدى. سوندىقتان، بارلىعىنان ءۇمىت كۇتە بىلەيىك، بارلىق بوكسشىمىزعا سەنىم ارتا بىلەيىك. قازىرگى ۇلتتىق قۇرامادا جۇرگەن جىگىتتەرىمىزدىڭ ءبىرى - الەم چەمپيونى، ءبىرى - ازيا ويىندارىنىڭ جۇلدەگەرى. ءبارىنىڭ دە كوپ-كورىم جەتىستىكتەرى، تاجىريبەلەرى بار. سوندىقتان، ءوز باسىم بارىنە سەنىممەن قارايمىن. كەيدە، مۇلدەم سەن ويلاماعان، مەن ويلاماعان ءبىر بوكسشى جارىق ەتىپ شىعا كەلۋى مۇمكىن. مەنىڭ ويىمشا، قازاق بوكسشىلارى پاريجدەن كەمى ءبىر التىن الادى.

- توكيو وليمپياداسىنا دەيىن ءار ءتورتجىلدىقتىڭ باستى دوداسىنان بوكسشىلارىمىز التىنسىز كەلمەگەن بولاتىن. ءتىپتى، 69 كەلى «قازاقتىڭ سالماعى» اتانىپ كەتكەن. 2020-جىلداعى ساتسىزدىكتى اقتاپ الۋعا بولا ما؟

- ءبىر وليمپيادادا التىنسىز قالعانىمىز قازاق بوكسىنىڭ قۇلاپ قالعانىن، قۇلدىراپ كەتكەنىن بىلدىرمەيدى. ول ءبىزدىڭ بوكسشىلار ءۇشىن دە، باپكەرلەر ءۇشىن دە ۇلكەن ساباق بولدى. ەندى، پاريجدە سول كەتكەن ولقىلىقتىڭ ورىنىن تولتىرىپ جاتسا، نۇر ۇستىنە نۇر بولار ەدى. رينگ ەشقاشان قاتەلىكتى كەشىرمەيدى. سول ءۇشىن مەن بوكسشىلارىمىزدىڭ بارىنشا شارشى الاڭدا قاتەلىككە بوي الدىرماي، باپكەردىڭ تاپسىرماسىن بۇلجىتپاي ورىنداۋعا تىرىسۋ كەرەك. جاتتىقتىرۋشىنىڭ كەڭەسىن ەشقاشان ۇمىتپاۋ كەرەك. شارشى الاڭدا جۇدىرىقپەن بىرگە باستى دا ىستەتە بىلۋلەرى ءتيىس. سوندا عانا جەڭىس تۇعىرىنا شىعۋعا بولادى.

- بۇل كۇندەرى ەلىمىزدىڭ بوكس فەدەراتسياسىندا كادرلىق وزگەرىستەر بولىپ جاتىر. بۇل باستى دودا الدىندا بىزگە نە بەرۋى مۇمكىن؟

- كادرلىق اۋىس-ءتۇيىس بوكسشىلارىمىزدىڭ جاتتىعۋىنا كەرى اسەرىن جاساماۋى كەرەك. ەڭ باستىسى ۇلتتىق قۇرامانىڭ باس باپكەرى ءوز ورنىندا قالدى. وليمپيادا ويىندارى تاقاپ قالعاندا باسشىلىق وزگەرگەنىمەن باپكەرلىك قۇرام وزگەرمەۋى ءتيىس. بۇل - مەنىڭ جەكە كوزقاراسىم. ەندى، جاڭا كەلىپ جاتقان باسشىلىق بوكسشىلارىمىزعا قولداۋ كورسەتىپ، الاڭسىز وليمپياداعا دايىندالۋىنا بار جاعدايدى جاسايدى دەگەن ۇمىتتەمىز.

- ۇلتتىق وليمپيادالىق كوميتەتىندە دە ۇلكەن وزگەرىستەر ورىن العالى جاتقانىن ەستىپ جاتىرمىز. اتالعان مەكەمەنى بەلگىلى كاسىپقوي بوكسشى گەننادي گولوۆكين باسقارادى دەگەن اڭگىمە الەۋمەتتىك جەلىدە جەلدەي ەسىپ ءجۇر. وسى تۋرالى نە ايتار ەدىڭىز؟

- بۇل اڭگىمەنى مەن دە وزدەرىڭىز سياقتى سول الەۋمەتتىك جەلىدەن ەستىپ، وقىپ وتىرمىن. ناقتىسىن بىلمەيمىن. ونى وليمپيادالىق كوميتەتتىڭ وزىنەن سۇراۋ كەرەك شىعار.

- ەگەر، گولوۆكين كەلگەن جاعدايدا بۇل جاۋاپتى قىزمەتتىڭ «جۇگىن» كوتەرىپ جۇرە الادى دەپ ويلايسىز با؟

- مۇمكىن. ول جالعىز بولمايدى عوي. كەڭەسشىسى، كومەكشىسى بولادى دەگەندەي. ونى ۋاقىت كورسەتەدى.

اۆتور كۇنسۇلتان وتارباي