قازاق بالاسى قانداي ويىندارعا قۇمار - كيبەرسپورتشىمەن سۇحبات

استانا. قازاقپارات - YouTube پەن Tik-Tok-تا 1,5 ميلليوننان استام وقىرمانى بار كيبەرسپورتشى بەردەن سارين اگەنتتىك تىلشىسىنە بەرگەن سۇحباتىندا قازاق ءتىلدى بالالاردىڭ كيبەرسپورتقا اۋەستىگى تۋرالى پىكىر ءبىلدىردى.

- بەردەن، كيبەرسپورتقا كەلگەنىڭىزگە قانشا بولدى؟

- جالپى مەن ءوزىم كاسىبي كيبەرسپورتشى ەمەسپىن. باسىندا ءوزىمىزدىڭ پروديۋسەرلىك ورتالىعىمىز بولعان. 2023 -جىلدىڭ تامىز ايىندا جابىلدى. سول ورتالىق ارقىلى موبيلدى كيبەرسپورتتى قازاق تىلىندە دامىتقان ەدىك. العاشقىلاردىڭ ءبىرى بولدىق دەپ ايتا الامىن.

- موبيلدى كيبەرسپورتتىڭ بىلايعى كيبەرسپورتتان ايىرماشىلىعى نەدە؟

- موبيلدى كيبەرسپورت دەگەن موبيلدى ويىنداردىڭ سپورتى عوي. كيبەرسپورت - جالپى كيبەر ويىنداردىڭ جارىسى بولسا، بۇل - موبيلدى قۇرىلعىلارعا ارنالعان ويىنداردىڭ جارىسى.

- قازىر سوندا موبيلدى كيبەر ويىنداردى قازاقشا ناسيحاتتاپ ءجۇرسىز بە؟

- تەك موبيلدى ويىنداردى عانا ەمەس، جالپى قازاق تىلىندەگى كونتەنتتى، قازاق تىلىندەگى گەيمينگتى دامىتۋعا اتسالىسىپ ءجۇرمىز دەۋگە بولادى.

- قازاق تىلىندەگى گەيمينگ دەپ وتىرسىز عوي، بالالار YouTube-تە قازاقشا جازىلعان ويىنداردى كورىپ وتىرعاندا بالاعات سوزدەردى كوپ ەستيتىنىن بايقاپ ءجۇرمىز. بۇل قالىپتى جاعداي دەپ ويلايسىز با؟

- جالپى، قازاق ءتىلدى YouTuber- لەردىڭ كوبى - بالالار، ستۋدەنتتەر. ولاردىڭ ىشىندە تاراتىپ وتىرعان كونتەنتىنىڭ جاۋاپكەرشىلىگىن سەزىنەتىندەر از. ال ەرەسەك تاراتۋشىلار ءوز وقىرماندارىن تاربيەلەۋگە تىرىسادى. ءوزىمدى سولاردىڭ ءبىرىمىن دەپ ەسەپتەيمىن. مىسالى، مەنىڭ ءوز بالالارىم بار. ولار دا مەنىڭ جازعان ويىندارىمدى كورەدى. سونى بىلە تۇرىپ، قالايشا بالاعات ءسوز قوسامىن؟ سوندىقتان ىزىمىزدەن ەرگەن ىنىلەرگە بالاعات ءسوز قوسپاي كونتەنت جاساۋ كەرەكتىگىن ۇنەمى ايتىپ وتىرامىز. ءبىر قۋانتاتىنى، قازاق ءتىلدى بالالار بالاعات ءسوز بار كونتەنتكە ءجيى شاعىمدانادى. ويتكەنى، كوبى ءبىز YouTube-كە جازعان ويىنداردى Smart TV ارقىلى وتباسىمەن بىرگە كورەدى. سولار كوممەنتاريگە جازىپ جاتادى: «ەموتسياعا بەرىلىپ بالاعات ءسوز ايتپاي-اق قويىڭىزدارشى»، - دەپ. بۇل قازاق تىلدە كونتەنت تۇتىناتىن ورتانىڭ ورىس ءتىلدى ورتادان وسىنداي جاقسى ايىرماشىلىعى بار.

- قازاق ءتىلدى گەيمينگتى العاش بولىپ باستاعانداردىڭ ءبىرىمىن دەدىڭىز عوي، اۋديتورياڭىز قانشا ادامدى قامتيدى؟

- YouTube ،Tik-Tok ،Telegram ۆكونتاكتە سياقتى بۇكىل پلاتفورمالارداعى وقىرمانداردىڭ سانىن قوسساق، 2 ميلليون ادامداي بولادى. نەگىزگى ارنام YouTube-تە. ول جەردەگى وقىرمان سانى 1,1 ميلليون ادامنان استى. ال Tik-Tok-تا جارتى ميلليونعا جەتتى.

- قازاق ءتىلدى گەيمينگتىڭ بالالارعا بەرەتىن پايداسى نە سوندا؟ ءبىر جاعىنان عىلىمعا، بىلىمگە باۋليتىن كونتەنت دەۋگە كەلمەيدى. الدە كەزىندەگى «سينيي كيت» سياقتى قاۋىپتى ويىنداردان قورعاۋ ءۇشىن كەرەك پە؟

- ول دا بار. ءبىراق نەگىزگى ماقساتىمىز ول ەمەس. نەگىزگى ماقساتىمىز - قازاق تىلىندەگى ساپالى كونتەنتتىڭ ۇلەسىن ارتتىرۋ. ويتكەنى، بالا بولعان سوڭ ويىنعا قىزىقپاي تۇرا المايدى. ال قازىر بالالاردىڭ كوبى ورىس تىلىندەگى گەيمينگتى تۇتىنادى. سولاردىڭ بەتىن ءوز تىلىمىزگە بۇرۋ ءۇشىن قازاق تىلىندەگى گەيمينگ قاجەت. ءبىر جاعىنان قازاقستاننىڭ ءبىر تۇكپىرىندە جاتقان، ورىس ءتىلىن بىلمەيتىن بالالاردىڭ سۇرانىسىن قاناعاتتاندىرىپ جاتىرمىز.

- ساپالى كونتەنت دەپ كوپ ايتىپ وتىرسىز. گەيمينگتى ساپالى ەتۋ ءۇشىن نە كەرەك؟

- تەحنيكانىڭ، دەربەس كومپيۋتەردىڭ مۇمكىندىكتەرى جوعارى بولۋ كەرەك. دىبىسى، كەسكىنى ساپالى بولۋى شارت. كەز كەلگەن كونتەنتكە قويىلاتىن تالاپتاردى مۇندا دا ۇستانۋ قاجەت. ويىندى دۇرىس تاڭداپ، بارىنشا قىزىقتى ەتىپ ءتۇسىرۋ كەرەك. ويتكەنى، ورىس تىلىندەگى گەيمينگتە تاڭداۋ كوپ. قازاق بالالار سولارعا كەتىپ قالماۋ ءۇشىن باسەكەدە وزىپ شىعاتىنداي ساپا بولعانى دۇرىس.

- قازاقشا گەيمينگ وكىلدەرى ۇيىمشىل دەپ ايتا الاسىز با؟

- جالپى گەيمينگتىڭ كوميۋنيتيى ەڭ ۇلكەن قاۋىمداستىقتاردىڭ ءبىرى بولىپ ەسەپتەلەدى. ويتكەنى، كيبەرسپورت تۋرنيرلەرى كوبەيىپ كەلەدى. ءوز ىشىمىزدە جيىندار، كەشتەر، يۆەنتتەر كوپ. شەتەلگە كوپ شاقىرتۋ الامىز. سول كەزدە ءبىر-ءبىرىمىزدى قولداپ، كومەك بەرۋگە تىرىسامىز. وسىنىڭ ءبارى بىرلىگىمىزدى نىعايتىپ جاتىر. ونداي تانىستىقتار كوللابوراتسياعا ۇلاسىپ جاتادى.

- بالاسىنىڭ ويىنقۇمارلىعىنا الاڭدايتىن اتا-انا كوپ. سولارعا نە ايتاسىز؟ گەيمينگتىڭ بولاشاعى بار دەۋگە بولا ما؟

- ءيا، بولاشاعى بار. ءبىراق زيانى دا بار. كەز كەلگەن ويىن-ساۋىق ءونىمى مولشەردەن اسسا زياندى عوي. گەيمينگكە ارنايتىن ۋاقىتى كوبەيسە، ساباعىندا، پسيحولوگيالىق دامۋىندا، ادامدارمەن بايلانىسىندا قيىندىقتار تۋىنداۋى مۇمكىن. ساعاتتاپ گادجەتكە نەمەسە كومپيۋتەرگە ءۇڭىلىپ وتىرا بەرسە، دەنساۋلىعىنا دا زيانى تيەدى.

ال جاقسى جاعىنا كەلسەك، ۋاقىتىن ءتيىمدى جۇمساي بىلسە، ءوزىنىڭ تەحنولوگيامەن بايلانىستى قابىلەتتەرىن وياتىپ، دامىتا الادى. موبيلدى كيبەرسپورتپەن سانالى تۇردە اينالىسىپ جۇرگەن وقۋشىلار الەمدىك دەڭگەيدەگى جارىستاردا كوزگە ءتۇسىپ ءجۇر. ونداي جارىستاردىڭ جۇلدە قورى دا قوماقتى. وقۋشى جاسىندا ۇيىنە تابىس اكەلىپ جاتقاندار بار. ودان كەيىن موبيلدى كيبەرسپورت جىلدام شەشىم قابىلدايتىن ويىندارعا قۇرىلعان. بۇل دا بالانىڭ پسيحيكالىق قابىلەتتەرىن شىڭدايدى. گەيمينگكە جاقىن بالالاردىڭ وي-ءورىسى كەڭ بولادى. قورىتىپ ايتقاندا، مولشەرىن بىلگەن بالاعا گەيمينگتىڭ زيانىنان پايداسى كوپ.

- مەكتەپ وقۋشىلارىنىڭ اراسىنداعى الىمجەتتىك، قاتىگەزدىك پەن زورلىق-زومبىلىق كوپ ەكەنىن الەۋمەتتىك جەلىدەگى ءتۇرلى ۆيدەولاردان كورىپ ءجۇرمىز. ءتىپتى، بالاباقشانىڭ وزىندە وسىنداي تەندەنتسيالار بار ەكەنىن كوردىك. بۇعان گەيمينگ تە ءوز «ۇلەسىن» قوسىپ جاتىر دەپ ويلامايسىز با؟

- پروديۋسەرلىك ورتالىعىمىز بولعان كەزدە قازاق بالالارى قانداي ويىنعا اۋەستىگىنە تەرەڭ تالداۋ جاساعانبىز. 2020 -جىلى قازاق ءتىلدى اۋديتوريادا Garena Free Fire دەگەن ويىن قاتتى تانىمال بولدى. سوڭىندا ويىنشى ءبارىن ولتىرە كەلىپ، جالعىز جەڭىمپاز اتانادى. قازاق بالالارى نەگە وسىعان قاتتى اۋەس بولعانىنا زەرتتەۋ جاساساق، قاراپايىم تەلەفونمەن دە ويناۋعا بولادى ەكەن. قولجەتىمدىلىك شەشۋشى ءرول اتقارىپ كەتكەن. ءبىر جاعىنان كوروناۆيرۋس شەكتەۋلەرى دە اسەر ەتكەن سياقتى. 2021 -جىلعا دەيىن بۇكىل ت م د بويىنشا بىزدە قاتتى تانىمال بولدى، ءتىپتى رەسەيلىكتەردەن اسىپ كەتتى. ءوز ارامىزدا «قازاقتىڭ حالىق ويىنى» دەپ اتاپ كەتكەنبىز.

- ەندى وسىنداي ويىندارمەن كۇرەسۋ كەرەك پە؟

- جالپى اعارتۋ جۇمىستارى كەرەك دەپ ويلايمىن. بالالار اراسىندا ناسيحات، ءتۇسىندىرۋ جۇمىستارى كەرەك. نەنىڭ جامان، نەنىڭ دۇرىس ەكەنىن ۇنەمى قۇلاعىنا قۇيىپ وتىرۋ ماڭىزدى.

- ال ءسىز ويىن جازار كەزدە قانداي ولشەم-شارتتارعا قاراپ تاڭدايسىز؟

- ءبىز بۇل سالادا تالايدان بەرى جۇرگەندىكتەن ستۋديالاردىڭ ءوزى شىعىپ جاتادى. كوبىمەن ۇزاق مەرزىمگە جاسالعان كەلىسىمشارتتار بار، ياعني ستۋديالاردىڭ تاپسىرىسى باستى ءرول وينايدى.

- قانداي ستۋديالاردى اتاي الاسىز؟

- ءارتۇرلى. مىسالى، سينگاپۋرلىق Garena بار، PUBG-دى شىعاراتىن Tencent بار.

- دەمەك، سىزدەر ۆيدەو ءتۇسىرۋ ارقىلى سول ويىندى شىعاراتىن ستۋديالاردىڭ ونىمدەرىنە جارناما جاسايسىزدار؟

- ءوز قالاۋىمىز بويىنشا دا ويىنداردى جازامىز. ءبىراق نەگىزىنەن تاپسىرىسقا باسىمدىق بەرەمىز. ويتكەنى، بۇل - بيزنەس. قاي ويىن كوبىرەك تاپسىرىس اكەلەدى، سونى جازۋعا تۋرا كەلەدى.

- سوندا الپاۋىت ستۋديالارعا قازاق ءتىلدى بالالاردى تارتۋ ماڭىزدى بوپ تۇر ما؟

- ولار ءار تىلدە كونتەنت جاساپ جۇرگەن ادامداردى زەردەلەيتىن بولۋ كەرەك. كونتەنت جاساۋشىنىڭ اۋديتورياسىنا، اۋقىمىنا قاراپ تاپسىرىس بەرەدى. ناقتى مىنا تىلدەگى كونتينگەنتتى كوبىرەك تارتۋىمىز كەرەك دەگەن ماسەلە ەمەس. بىزگە تىكەلەي شىعاتىنى، قازاق تىلدە مۇنداي كونتەنت تاراتاتىن ادامدار وتە از. ورىس تىلىندە باسەكە جوعارى. مەنىڭ ءوزىم نەگىزى ورىس ءتىلدى قازاق بولعانمىن. كەڭىستىكتىڭ مۇلدە بوس جاتقانىن كورىپ، 2017 -جىلدان باستاپ قازاقشا ۇيرەنىپ، كەيىن ءبىرجولا اۋىستىم.

اۆتور
ەسىمجان ناقتىباي