قازاق بالاسى بۋراباي وزەنىن ءبىر قول، ءبىر اياقسىز ءجۇزىپ ءوتتى

الەۋمەتتىك جەلىدە ءبىر قولى مەن اياعىنان ايىرىلعان اقنازار ءمۇتالىپ دەگەن قازاق جىگىتىنىڭ بۋراباي وزەنىنىڭ و شەتى مەن بۇ شەتىن ەركىن ءجۇزىپ وتكەن ۆيدەوسى تارادى، دەپ حابارلادى Ulysmedia.kz.

اقنازاردىڭ ۆيدەوسى تەز تارالىپ، كوپشىلىكتى ءتانتى ەتتى. ول ءبىر قولى مەن اياعىنان ايىرىلسا دا 2,5 شاقىرىمدى شارشاماي، شالدىقپاي، 1 ساعات 25 مينۋتتا ەركىن ءجۇزىپ ءوتتى. مۇنى شىنىندا دا ەرلىك دەۋگە بولادى.

اقنازار ءمۇتالىپ تۋرالى ءبىر مالىمەت

اقنازار ءمۇتالىپ 2018 -جىلى 5-ساۋىردە ءبىر اياعى مەن ءبىر قولىنان ايىرىلعان ەكەن. سول كەزدە ول ومىردەن ءتۇڭىلىپ كەتە جازداعاندا ونىڭ جانىنان وتباسى مەن جاقىن ادامدارى تابىلىپ، مورالدىق تۇرعىدا دەمەۋ بەرىپ، كوپ كومەكتەسىپتى. قازىر ول سول جاعدايدى ەسكە العاندا وتباسى مەن ەت-باۋىر جاقىن ادامدارىن اۋزىنان تاستاماي، ريزاشىلىعىن ءبىلدىرىپ وتىرادى.

مەن ءبىر اياعىم مەن قولىمنان ايىرىلعاننان كەيىن ءبىراز ۋاقىت ءوز-وزىمە كەلە الماي ءجۇردىم. جاسىراتىن ەشتەڭەسى جوق، ومىردەن ءتۇڭىلىپ تە كەتە جازدادىم. ويتكەنى، ەشقاشان مۇگەدەك بولىپ قالامىن دەپ ويلاعان ەمەسپىن عوي. سول كەزدە ماعان وتباسى مەن تۋىستارىم كوپ كومەكتەستى. نە ىستەرىمدى بىلمەي ءجۇردىم. سودان كەيىن ءبىر كەزدە سۋعا ءجۇزۋدى ەرمەك ەتىپ، وسىنى كورەيىنشى دەپ جاتتىعا باستادىم، - دەيدى اقنازار.

2019 جىلى العاش رەت ءبىر اياق، ءبىر قولسىز جۇزە باستادى

ول العاش رەت 2019 -جىلى بالقاش كولىندە سۋعا ءجۇزىپ كورىپتى. سوندا ازداپ قوبالجىپ، سۋعا باتىپ كەتەمىن بە دەپ تە ويلاعان ەكەن. ءبىراق ۋاقىت وتە كەلە ءبىر قول مەن اياقسىز جۇزۋگە دە بويى ۇيرەنىپ، سپورتتىڭ وسى تۇرىمەن شىنداپ كىرىسە باستاپتى.

ءيا، جاسىراتىنى جوق، العاش كەزدە مەن قورىقتىم. قالاي دەگەنمەن دە قيىن ەمەس پە؟! سول كەزدە مەن ءوزىمدى قايراپ، ىشتەي «اقنازار بەرىلمە، سەنىڭ قولىڭنان ءبارى كەلەدى. سەن جۇزە الاسىڭ»، دەپ وزىمە سەنىمىمدى وياتقىم كەلدى. سونىڭ ناتيجەسى بولار، قازىر كەز كەلگەن جەردى ەركىن ءجۇزىپ كەتە الامىن. ونىڭ مىسالى، وزدەرىڭىز كورىپ وتىرعانداي، مىنا بۋراباي وزەنىن ءجۇزىپ وتكەنىم، - دەدى ول.

وسى جەردە ءبىر ايتا كەتەتىن نارسە، اقنازار ءمۇتالىپ بيىل 400 مەترگە ەركىن جۇزۋدەن قازاقستان چەمپيونى اتانىپتى. ال مامىر ايىندا بۋراباي وزەنىنىڭ و شەتى مەن بۇ شەتىن ءجۇزىپ ءوتۋدى ماقسات ەتىپتى. سول ماقساتىنا 6-تامىزدا جەتتى. ول 2,5 شاقىرىمدى شارشاماي، شالدىقپاي، 1 ساعات 25 مينۋتتا ەركىن ءجۇزىپ ءوتتى.

بيىل جازدا بريتاندىق ساياحاتشى كارل بۋشبي كاسپي تەڭىزى ارقىلى قازاقستاننان ازەربايجانعا دەيىن 300 شاقىرىمدى ءجۇزىپ ءوتۋدى جوسپارلاپ وتىرعانىن ايتىپ ەدى. ونىڭ قاشان ءجۇزىپ وتەتىنى ازىرشە بەلگىسىز.