قازاق بالۋاندارىنا قارىمدى قارسىلاس بولعان تانىمال سپورتشى قازا بولدى

استانا. KAZINFORM - گرەك-ريم كۇرەسىنەن گرۋزيانىڭ تانىمال بالۋانى نۋگزاري تسۋرتسۋميا 27 جاسىندا قايتىس بولدى. تۋىستارى ونىڭ ءمايىتىن ەلدىڭ سولتۇستىك-باتىسىندا ورنالاسقان حوبي قالاسىنداعى ۇيىنەن تاپقان.

بالۋاننىڭ نەدەن قايتىس بولعانى بەلگىسىز. الدىن الا ايتىلعان مالىمەتتەر بويىنشا، سپورتشى سۋيتسيد جاساعان. Sportball24.com اقپاراتى بويىنشا، كەيىنگى جارتى جىلدا نۋگزاري تسۋرتسۋميانىڭ اتا-اناسى جانە اعاسى قازا تاپقان. بۇل سپورتشىعا اۋىر سوققى بولعان.

نۋگزاري تسۋرتسۋميا ۇزاق جىلدار بويى 55 كيلو سالماقتا بەلدەسىپ، سوڭعى وتكەن 5 الەم چەمپيوناتىندا قاتارىنان جۇلدە الدى. ماسەلەن، 2018 جانە 2021-جىلدارى قولا جۇلدەگەر اتانسا، 2019 استانادا وتكەن الەم چەمپيوناتىندا جەڭىمپاز بولدى. سول جولى ول فينالدا قازاقستاندىق قورلان جاقانشادان باسىم ءتۇستى.

2022-2023-جىلدارى فينالعا دەيىن جەتىپ، الەم چەمپيوناتىندا ەكى رەت كۇمىس جۇلدەگەر اتاندى. سونداي-اق، ول ەۋروپا چەمپيوناتىنىڭ 4 دۇركىن جۇلدەگەرى ەدى.