قازاق باپكەر باپتايتىن تايەكۆوندوشى وليمپيادا چەمپيونى اتاندى
پاريج. KAZINFORM - فرانسيا استاناسى پاريج قالاسىندا ءوتىپ جاتقان وليمپيادا ويىندارىندا قازاق باپكەرى ەسبول سۇلتانوۆ جاتتىقتىراتىن تايەكۆوندوشى چەمپيون اتاندى.
ناقتىراق ايتساق، بۇگىنگى تاڭدا قازاقستاندىق ەسبول سۇلتانوۆ تۋنيس ەلىنىڭ تايەكۆوندو قۇراماسىندا باس باپكەر بولىپ قىزمەت ەتىپ ءجۇر. كەشە سول قازاق ازاماتى باپتايتىن تۋنيس تاەكۆوندوشىسى 80 كەلى سالماقتا پاريج وليمپياداسىنىڭ چەمپيونى اتاندى.
تۋنيستىك فيراس كاتوۋسي فينالدا يران وكىلىن جەڭىپ، جەڭىس تۇعىرىنىڭ ەڭ بيىك ساتىسىنا كوتەرىلدى. بۇل تۋنيس ەلىنىڭ تاريحىنداعى وسى سپورت تۇرىنەن العاشقى التىن جۇلدە.
ەسبول سۇلتانوۆ سپورتشى رەتىندە 2007 -جىلى بەيجىڭدە وتكەن الەم چەمپيوناتىندا، 2006 -جىلى دوحادا وتكەن ازيا ويىندارىندا جانە 2007 -جىلى بانگكوكتا وتكەن جازعى ۋنيۆەرسيادادا ەل نامىسىن قورعاعان بولاتىن. ول 2023 -جىلدىڭ قىركۇيەك ايىنان باستاپ، تايەكۆوندودان تۋنيس قۇراماسىنىڭ باس باپكەرى قىزمەتىن اتقارىپ ءجۇر.
اۆتور
كۇنسۇلتان وتارباي