Qazaq Air- ءدىڭ Vietjet Qazaqstan رەتىندە جۇمىسقا كىرىسۋى نەگە كەشىگىپ جاتىر
استانا. قازاقپارات - Vietjet Qazaqstan-نىڭ جاڭا ۇشاقتارى قازاقستاننىڭ اۋە نارىعىنا بيىل كىرىپ باستايدى. بۇل تۋرالى كولىك ءمينيسترى مارات قارابايەۆ سەنات وترىسىنان كەيىن وتكەن باسپا ءسوز ءماسليحاتىندا ايتتى.
- بيىلعا قويىلعان مىندەت - العاشقى ۇشاقتى جەتكىزۋ. ازىرگە كەشىگۋ بار. ءبىراق ءبىز جىل اياعىنا دەيىن جەتەدى دەپ كۇتىپ وتىرمىز. كەشىگۋ Vietjet تارابىنان عانا بولىپ وتىرعان جوق. بۇل - جاھاندىق پروبلەما. اۋە كومپانياسىنىڭ مالىمەتى بويىنشا، Boeing پەن Airbus-قا ۇزىن سانى 200 ۇشاقتىڭ تاپسىرىسى بەرىلگەن. وكىنىشكە قاراي، وندىرۋشىلەر كەشىكتىرىپ جاتىر. بۇل ءوز كەزەگىندە كومپانيانىڭ قازاقستان نارىعىنا شىعۋىن كەشەۋىلدەتىپ جاتىر، - دەدى مينيستر.
ونىڭ سوزىنشە، Vietjet Qazaqstan كومپانياسى الداعى بەس جىلدا قازاقستان اۋە نارىعىنا جاڭا 5 ۇشاق ەنگىزبەكشى. ۆەتناممەن بىرلەسكەن كاسىپورىن قازاقستاننىڭ ءوز ىشىندە دە، سىرتقا دا جولاۋشى تاسىمالداۋعا نيەتتەنىپ وتىر.
بۇعان دەيىن ۆەتنامدىق ينۆەستور Qazaq Air اۋە كومپانياسىنىڭ اتاۋىن وزگەرتكەنىن جازعان ەدىك.