- ماڭعىستاۋ وبلىسىندا قازا تاپقانداردىڭ وتباسىلارى مەن زارداپ شەككەن اسكەري قىزمەتشىلەرگە كورسەتىلگەن قارجىلاي كومەكتىڭ ءبولىنۋىن باقىلاۋ جونىندەگى كوميسسيا جۇمىسىنىڭ ناتيجەسى تۋرالى حابارلاعىم كەلەدى.
وزدەرىڭىز بىلەتىندەي، مەملەكەت باسشىسى قاسىم-جومارت كەمەل ۇلى توقايەۆتىڭ تاپسىرماسىنا سايكەس قازا تاپقانداردىڭ وتباسىلارىنا جانە زارداپ شەككەن اسكەري قىزمەتشىلەرگە قاجەتتى بارلىق كومەك پەن قولداۋ كورسەتىلىپ جاتىر، - دەدى بەكمۇرات ءجۇسىپوۆ.
ەلىمىزدىڭ ءىرى كاسىپورىندارى، كاسىپكەرلەرى مەن مەتسەناتتارىنان تۇسكەن قارجىنى جيناقتاۋ ءۇشىن ارنايى «ۇلتتىق رۋح» قورى بەلگىلەندى.
- تۇسكەن قاراجاتتىڭ ءادىل ءارى ماقساتتى ءبولىنۋىن قامتاماسىز ەتۋ ءۇشىن ارنايى كوميسسيا قۇرىلدى. ونىڭ قۇرامىنا قۇقىق قورعاۋ ورگاندارى مەن قوعام وكىلدەرى، قۇرىلتاي دەپۋتاتتارى، قازاقستان حالىق كەڭەسىنىڭ مۇشەلەرى، قوعامدىق كەڭەستەر مەن ءماسليحاتتاردىڭ وكىلدەرى كىردى.
كوميسسيا جۇمىسىنىڭ قورىتىندىسى بويىنشا قورعا تۇسكەن بارلىق قاراجات كوميسسيا قابىلداعان شەشىمدەرگە سايكەس جانە زاڭنامادا بەلگىلەنگەن تارتىپپەن قازا تاپقان اسكەري قىزمەتشىلەردىڭ وتباسىلارىنا ءادىل ءارى تەڭدەي ءبولىندى، - دەدى ول.
سونىمەن قاتار، بولعان وقيعادان امان قالعان اسكەري قىزمەتشىلەرگە دە جەكە تولەمدەر قاراستىرىلدى. ولارعا كورسەتىلگەن ماتەريالدىق كومەكتىڭ مولشەرى كوميسسيا شەشىمدەرىنە سايكەس بەلگىلەندى.
- قاراجاتتى ەسەپكە الۋ مەن بولۋگە قاتىستى بارلىق شەشىم تەك كوميسسيا شەڭبەرىندە قابىلدانىپ، ءتيىستى حاتتامالارمەن راسىمدەلدى جانە بەلگىلەنگەن قۇقىقتىق راسىمدەر تولىق ساقتالدى. بۇل جۇمىسقا قازا تاپقان ساربازداردىڭ اتا-انالارى دا قاتىستى.
كوميسسيا قاراجاتتىڭ قور شوتىنا تۇسۋىنەن باستاپ، اۋدارۋعا دەيىنگى بارلىق كەزەڭدە قاتاڭ باقىلاۋدى قامتاماسىز ەتتى.
سونىمەن بىرگە، اسكەري قىزمەتشىلەردىڭ تۋعان-تۋىستارى مەن جاقىندارىنىڭ ءوتىنىشىن ەسكەرە وتىرىپ، سونداي-اق ولاردىڭ قاۋىپسىزدىگى مەن جەكە مالىمەتتەرىنىڭ قۇپيالىلىعىن ساقتاۋ ماقساتىندا تولەمدەردىڭ ناقتى سوماسى مەن قاراجات الۋشىلاردىڭ دەربەس دەرەكتەرى جاريا ەتىلمەيدى.
قازا تاپقان جانە زارداپ شەككەن اسكەري قىزمەتشىلەردىڭ تۋعان-تۋىستارى مەن جاقىندارىنىڭ بۇل شەشىمىنە تۇسىنىستىكپەن قاراۋلارىڭىزدى سۇرايمىز.
كوميسسيا ءوز جۇمىسىن اياقتادى. تۇسكەن قاراجاتتىڭ بارلىعى بەلگىلەنگەن تارتىپپەن ءبولىنىپ، قابىلدانعان شەشىمدەر ءتيىستى قۇجاتتارمەن راسىمدەلدى. سەنىم ءبىلدىرىپ، تۇسىنىستىك تانىتقاندارىڭىز ءۇشىن العىس ايتامىن، - دەدى قازاقستان حالىق كەڭەسىنىڭ مۇشەسى.
ەسكە سالايىق، 2026-جىلعى 24-قىركۇيەكتە كاسپييدەگى اسكەري وقۋ-جاتتىعۋ كەزىندە 9 اسكەري قىزمەتشى قازا تاپقانىن حابارلاعانبىز. ءۇش اسكەري قىزمەتشى قۇتقارىلدى. ولاردىڭ بىرەۋى اۋرۋحاناعا جاتقىزىلدى.
كەيىننەن كاسپيدە قازا بولعان اسكەري قىزمەتشىلەردىڭ سانى 12 گە جەتىپ، ەكەۋى ىزدەستىرىلىپ جاتقانى حابارلاندى.
قورعانىس مينيسترلىگى وقۋ-جاتتىعۋ كەزىندە قازا تاپقان اسكەري قىزمەتشىلەردىڭ ءتىزىمىن جاريالادى.
اسكەري قىزمەتشىلەردىڭ قازا بولۋ فاكتىسى بويىنشا قىلمىستىق ءىس قوزعالىپ، تەرگەلىپ جاتقانىن جازدىق.
سونىمەن قاتار، پرەزيدەنت قاسىم-جومارت توقايەۆ ماڭعىستاۋ وبلىسىندا اسكەري وقۋ-جاتتىعۋ كەزىندەگى قايعىلى وقيعا سالدارىنان قازا تاپقان اسكەري قىزمەتشىلەردىڭ تۋعان-تۋىستارىنا كوڭىل ايتتى.
اسكەريلەردىڭ قازاسىنان كەيىن اقتاۋدا ءۇش كۇنگە جوسپارلانعان مەرەكەلىك شارالار وتپەيتىنى ايتىلدى.
سونىمەن قاتار اسكەري قىزمەتشىلەردىڭ قاۋىپسىزدىگىنە جاۋاپتى تۇلعالار كۇدىككە ىلىنگەنى تۋرالى جازعان ەدىك.
ايتا كەتەلىك كاسپيدەگى توتەنشە جاعدايدان كەيىن قۇتقارىلعان اسكەري قىزمەتشى ەسىن جيعان ەدى.
بۇگىن كاسپي تەڭىزىندە جوعالعان ەكى اسكەري قىزمەتشىنىڭ دەنەسى تابىلىپ، ىزدەستىرۋ وپەراتسياسى اياقتالعان ەدى.
سونىمەن قاتىر كاسپيدەگى اسكەري قىزمەتشىلەردىڭ قازاسىنا بايلانىستى قىلمىستىق ءىس ەكى باپ بويىنشا تەرگەلىپ جاتىر.