ەكولوگيا جانە تابيعي رەسۋرستار ءمينيسترى الىبەك قۋانتىروۆ ۇكىمەتتە الداعى اۋا رايى بولجامىن ايتتى.
- اۋا رايى بولجامىنا سايكەس، قازان ايىندا رەسپۋبليكانىڭ باسىم بولىگىندە ايلىق اۋا تەمپەراتۋراسى نورمادان 1-2 گرادۋس جوعارىلايدى. ال شىعىس قازاقستان وبلىسىندا، پاۆلودار وبلىسىنىڭ سولتۇستىك-شىعىس جارتىسىندا جانە اباي وبلىسىندا نورماعا جۋىق بولادى دەپ كۇتىلەدى،- دەدى ەكولوگيا ءمينيسترى.
قازان ايىندا جاۋىن-شاشىن مولشەرى رەسپۋبليكانىڭ باسىم بولىگىندە نورماعا جۋىق بولماق. ەلدىڭ قيىر باتىسى مەن سولتۇستىك-باتىسىندا (باتىس قازاقستان وبلىسىندا، اتىراۋ، ماڭعىستاۋ وبلىستارىنىڭ باتىسىندا، اقتوبە وبلىسىنىڭ سولتۇستىگىندە جانە قوستاناي وبلىسىنىڭ سولتۇستىك- باتىسىندا) نورمادان اسادى.
ال وڭتۇستىك پەن وڭتۇستىك- شىعىستىڭ جازىق بولىگىندە، ەلىمىزدىڭ ورتالىق وبلىستارىنىڭ وڭتۇستىگىندە جانە اباي وبلىسىنىڭ وڭتۇستىگىندە نورمادان ازىراق جاۋىن-شاشىن كۇتىلىپ وتىر.
- قاراشا ايى جىلى بولادى دەپ كۇتىلەدى. رەسپۋبليكانىڭ باسىم بولىگىندە اۋا تەمپەراتۋراسى نورمادان 1-2 گرادۋس جوعارى بولادى. جاۋىن-شاشىن مولشەرى رەسپۋبليكانىڭ باسىم بولىگىندە - سولتۇستىك قازاقستان وبلىسىندا، سونداي-اق پاۆلودار، اقمولا جانە قوستاناي وبلىستارىنىڭ سولتۇستىك بولىكتەرىندە نورمادان جوعارى بولادى دەپ كۇتىلەدى،- دەدى ءا. قۋانتىروۆ.
تولىعىراق بولجامداردى قازگيدرومەت اپتاسىنا ەكى رەت، دۇيسەنبى جانە سارسەنبى كۇندەرى، اۋىل شارۋاشىلىعى مينيسترلىگىنە جانە ۇكىمەت اپپاراتىنا ۇسىنادى. بولجام ءبىر اپتاعا، وبلىستار مەن كۇندەر بويىنشا ناقتىلانىپ بەرىلەدى.
بۇعان دەيىن ەنەرگەتيكا ۆيتسە-ءمينيسترى قايىرحان تۇتقىشبايەۆ ەلىمىزدىڭ قاي وڭىرلەرىندە جىلىتۋ ماۋسىمى باستالاتىنىن ايتقان ەدى.