بۇل سۇراقتىڭ جاۋابىن ق ر د س م سانيتاريالىق- ەپيدەميولوگيالىق باقىلاۋ كوميتەتىنىڭ ۆاكسيناعا كونەتىن ينفەكسيالاردى باقىلاۋ باسقارماسىنىڭ باسشىسى نۇرشاي ازىمبايەۆا تالداپ ايتىپ بەردى، دەپ حابارلايدى قازاقپارات ءتىلشىسى.
«بيولوگيالىق قاۋىپسىزدىك پروبلەمالارى جونىندەگى ۇلتتىق عىلىمي ينستيتۋت بۇعان دەيىن كوروناۆيرۋسقا قارسى ۆاكسينانىڭ بىرنەشە ءتۇرىن جاساپ شىعارعان ەدى. بۇگىنگە دەيىن ولاردىڭ اراسىنان Qaz Covid-in تيىمدىلىگىن كورسەتتى. ول ءوزىنىڭ تەحنولوگياسى جاعىنان سپۋتنيك V ۆاكسيناسىنان قاتتى ەرەكشەلەنەدى. سپۋتنيك V - كوپۆەكتورلى ۆاكسينا. ونى ازىرلەۋ كەزىندە ادەناۆيرۋس رەتىندە كوروناۆيرۋستىڭ تىكەنەگى تاڭداپ الىنعان. ياعني ونىڭ ادەناۆيرۋستى ۆەكتورىندا كوروناۆيرۋستىڭ ءوزى تولىعىمەن جوق. ول شاعىن بولىكتەر نەگىزگى ۆيرۋستى «تانۋعا» كومەكتەسەدى. قاراپايىم تىلمەن ايتقاندا، سول بولىكتەر ارقىلى انتيدەنەلەر ۆيرۋستى «تانيدى».
ال Qaz Covid-in - يناكتيۆتەلگەن ەكپە. وندا ۆيرۋس تولىعىمەن ءولى كۇيىندە ساقتالعان. سوندىقتان ول وزدىگىمەن جۇمىس ىستەمەسە دە، بۇل ءولى ۆيرۋستار دا انتيدەنە تۇزەدى»، - دەدى نۇرشاي ازىمبايەۆا ونلاين كونفەرەنسيا بارىسىندا.
مىنە، سول سەبەپتى Qaz Covid-in مەن سپۋتنيك V ۆاكسينالارىن جاساۋ تەحنولوگياسى مۇلدە بولەك.
«الايدا ءبىلىم جانە عىلىم مينيسترلىگى ۆەكتورلى ۆاكسينالاردى دا ازىرلەپ جاتقانىن اتاپ ءوتۋ كەرەك. ءبىراق بۇل ۆاكسينا ازىرگە جانۋارلارعا سىنالىپ جاتىر. ادامدار اراسىندا سىناۋ ساتىلارىنا تاياۋدا وتەتىن بولۋى كەرەك. ول جايلى ءبىلىم جانە عىلىم مينيسترلىگى تولىعىراق ءتۇسىندىرىپ بەرەدى»، - دەدى ول.
اۆتور: ايان بەكەن ۇلى