قامشى ءورۋ - ۇلكەن شەبەرلىكتى، توزىمدىلىكتى جانە دالدىكتى تالاپ ەتەتىن ونەر. عاريفوللا بۇل ونەر جىلقىعا دەگەن قىزىعۋشىلىعىمنان باستالدى دەيدى. بەس جاسىنان اتقا مىنگەن ول ءقازىر ەرتوقىمنان باسقا ابزەلدەردى ءوزى جاساي بەرەدى.
عاريفوللا امانگەلدى، جاڭاارقا كەنتىنىڭ تۇرعىنى:
- جۇگەن اتتارعا قۇيىسقان، ومىلدىرىك، قامشى، شىدەر جاسايمىن. اتاقتى اتتارعا جۇگەن جاساپ بەردىم. قاراپ وتىرساڭىز، ايتورىنىڭ جۇگەنى ءىلىنىپ تۇر. قۇداي قالاسا ەرتەڭ وزىنە تابىستايمىن. بەلدىك، كەمەل بەلدىك جاسايمىن.
اتبەگىلىك پەن ساياتشىلىق عاريفوللانىڭ ارعى اتاسىنان بەرى جالعاسقان ونەر. اتاسى سەيپىش ءيت جۇگىرتىپ، قۇس سالعان اڭشى بولعان. وسى قۇندىلىقتى ەندى بالالارى مەن نەمەرەلەرى جالعادى. 13 جاستاعى عاريفوللانىڭ ەكى بۇركىتى، بىرنەشە تازىسى مەن قانسونارعا مىنەتىن تۇلپارى بار. ال، قايىستان تاسپا ءتىلىپ، قامشى ءورۋدى وڭىرگە اتى ءماشھۇر قولونەر شەبەرى بولات قايرانبەكوۆتەن ۇيرەنگەن.
قايسار سەيپىشوۆ، ع. امانگەلدىنىڭ اكەسى:
- قازىر قولونەردەن بالام ماعان ۇستاز بولىپ جاتىر. مەن ءوزىم تەرى ونىمدەرىن يلەيمىن، ءبىراق ورەتىن دۇنيەلەرگە قول يكەمىم كەلە قويمايدى. سونىڭ ءبىرىن بىلاي بولادى دەپ ۇيرەتىپ جاتادى. ونىڭ بارلىعى ءبىر-ءبىرىمىزدى تولىقتىرىپ تۇرادى.
قامشى ءورىلۋ جانە قولدانۋ ماقساتىنا قاراي بىرنەشە تۇرگە بولىنەدى. عاريفوللا سونىڭ كەڭ تاراعان 4 ءتۇرىن ورەدى. قولونەردەن بولەك سپورتتىڭ بىرنەشە ءتۇرىن مەڭگەرگەن. اسىق اتۋ، ءداستۇرلى ساداق اتۋ، قۇسبەگىلىك پەن اۋدارىسپاقتان سپورت شەبەرلىگىنە ۇمىتتە.
عاريفوللا امانگەلدى، جاڭاارقا كەنتىنىڭ تۇرعىنى:
- وسكەن سوڭ ەرتوقىم، ات ابزەلدەرىن جاساعىم كەلەدى. حوببي سياقتى جاقسى كورەسىڭ. جاقسى كورىپ ىستەسەڭ، تاستاۋ قيىن. بولاشاق ارمانىم - ۇلتتىق سپورتتى دامىتۋ، شەبەرلىكتى كاسىپ قىلۋ. ۇلكەن برەند قىلسام دەپ ارماندايمىن.
عاريفوللا بۇگىنگە دەيىن 200-گە جۋىق قامشى ورگەن. توبىلعى ساپتى، تازا قايىستان جاسالعان قامشىعا قىزىعاتىندار كوپ دەيدى. ءتىپتى، اتا جۇرتتان الىستا جۇرگەن قانداستار دا ارنايى تاپسىرىس بەرەدى ەكەن.
24.kz