قايىرىمدىلىق قورى قالاي قۇرىلادى جانە قىزمەتى قالاي رەتتەلەدى

استانا. KAZINFORM - كۇنى كەشە ەلىمىزدەگى ب ا ق-تاردا Biz Birgemiz قايىرىمدىلىق قورىنىڭ قۇرىلتايشىسى پەريزات قايرات 1,5 ميلليارد تەڭگەنى جىمقىردى دەگەن كۇدىكپەن ۇستالعانى تۋرالى اقپارات تارادى. ودان بۇرىن ەل ازاماتتارى تاعى ءبىر قور - «اسار-ۋمەنى» حالىق اقشاسىن ءراسۋا ەتتى دەپ ايىپتاعان بولاتىن. وسى جايلارعا بايلانىستى Kazinform ساراپشىلاردىڭ پىكىرىنە سۇيەنە وتىرىپ قازاقستاندا قايىرىمدىلىق قورلارىنىڭ قىزمەتى قانداي زاڭدار ارقىلى رەتتەلەتىنىن انىقتاپ كوردى.

 قور قالاي قۇرىلادى

ادىلەت مينيسترلىگىنىڭ مالىمدەۋىنشە، ەلىمىزدە قورلاردى قۇرۋ ءتارتىبى «قايىرىمدىلىق تۋرالى» جانە «كوممەرتسيالىق ەمەس ۇيىمدار تۋرالى» زاڭمەن رەتتەلەدى.

قورلار قۇرىلتايشىلاردىڭ قۇرامىنا، سونداي-اق قىزمەت سالاسىنا قاراي جەكە، كورپوراتيۆتىك، قوعامدىق، مەملەكەتتىك بولىپ قۇرىلۋى مۇمكىن.

ال قىزمەت ماقساتتارىنا قاراي الەۋمەتتىك، قايىرىمدىلىق، مادەني، بىلىم قورلارى جانە وزگە دە قورلار بولىپ قۇرىلادى.

كوممەرتسيالىق ەمەس ۇيىمنىڭ جارعىسى مىنالاردى قامتۋى كەرەك:

1) كوممەرتسيالىق ەمەس ۇيىمنىڭ اتاۋىن، سونىڭ ىشىندە ۇيىمدىق- قۇقىقتىق نىسانىن، قىزمەتىنىڭ ءمانى مەن ماقساتىن؛

2) كوممەرتسيالىق ەمەس ۇيىمنىڭ ورنالاسقان جەرىن؛

3) كوممەرتسيالىق ەمەس ۇيىمنىڭ باسقارۋ ورگاندارىنىڭ قۇرىلىمىن، قالىپتاستىرۋ ءتارتىبىن جانە قۇزىرەتىن؛

4) كوممەرتسيالىق ەمەس ۇيىم مۇشەلەرىنىڭ (قاتىسۋشىلارىنىڭ) قۇقىقتارى مەن مىندەتتەرىن؛

5) كوممەرتسيالىق ەمەس ۇيىمنىڭ مۇشەلىگىنە (ەگەر كوممەرتسيالىق ەمەس ۇيىمنىڭ مۇشەلىگى بولعان جاعدايدا) قابىلداۋ جانە ودان شىعۋ شارتى مەن ءتارتىبىن؛

6) كوممەرتسيالىق ەمەس ۇيىمنىڭ مۇلكىن قۇراۋ كوزدەرىن؛

7) كوممەرتسيالىق ەمەس ۇيىمنىڭ قۇرىلتاي قۇجاتتارىنا وزگەرىستەر مەن تولىقتىرۋلار ەنگىزۋ ءتارتىبىن؛

8) كوممەرتسيالىق ەمەس ۇيىمدى قايتا ۇيىمداستىرۋ جانە ونىڭ قىزمەتىن توقتاتۋ شارتىن؛

9) كوممەرتسيالىق ەمەس ۇيىم تاراتىلعان جاعدايدا ونىڭ مۇلكىن پايدالانۋ ءتارتىبىن؛

10) فيليالدار مەن وكىلدىكتەر تۋرالى مالىمەتتەردى.

قوردى كىم باسقارادى

قۇقىق قورعاۋشى، قازاقستاننىڭ قۇرمەتتى زاڭگەرى، ق ر جوعارى سوت كەڭەسى سۋديالاردى بايقاۋ ارقىلى ىرىكتەۋ كوميسسياسىنىڭ مۇشەسى، سەنات جانىنداعى ساراپشىلار كلۋبىنىڭ مۇشەسى سەرىك بەركامالوۆتىڭ ايتۋىنشا، قايىرىمدىلىق ۇيىمىنىڭ جوعارى باسقارۋ ورگانى بولىپ ونىڭ القالى ورگانى - قامقورشىلىق كەڭەس سانالادى. ول القالى بولا الادى - باسقارما، سونداي-اق جەكە-دارا بولا الادى - ديرەكتور، ءتوراعا.

ودان بولەك، زاڭگەردىڭ ايتۋىنشا، قوردىڭ باقىلاۋشى ورگان - تەكسەرۋ كوميسسياسى نەمەسە ۇيىمنىڭ باسقارۋ ورگانى تاعايىنداعان نە سايلاعان تەكسەرۋشىسى بولۋى كەرەك.

سونداي- اق ول ق ر زاڭنامالارىندا قور قىزمەتشىلەرىنىڭ سانى مەن بىلىكتىلىگى جايلى بەلگىلەنگەن تالاپ جوقتىعىن اتاپ ءوتتى.

قورلاردىڭ قانداي ءتۇرى بولادى؟

قايىرىمدىلىق ۇيىمدارى مارتەبەسى بويىنشا حالىقارالىق جانە رەسپۋبليكالىق بولىپ بولىنەدى.

حالىقارالىق قايىرىمدىلىق ۇيىمدارىنا قىزمەتى قازاقستان رەسپۋبليكاسىنىڭ اۋماعىنا جانە ودان تىسقارى جەرلەرگە تارالاتىن قايىرىمدىلىق ۇيىمدارى جاتادى.

رەسپۋبليكالىق قايىرىمدىلىق ۇيىمدارىنا فيليالدارى مەن وكىلدىكتەرىنىڭ قىزمەتى قازاقستان رەسپۋبليكاسىنىڭ اۋماعىنا تارالاتىن قايىرىمدىلىق ۇيىمدارى جاتادى.

قايىرىمدىلىقتىڭ تۇرلەرى - فيلانتروپيالىق، دەمەۋشىلىك، مەتسەناتتىق قىزمەت، كىشى وتانعا قولداۋ كورسەتۋ جونىندەگى قىزمەت.

زاڭگەر قور ءوز جارعىسىندا كورسەتىلگەن قىزمەتتى عانا جۇزەگە اسىراتىنىن، قايىرىمدىلىقتان باسقا ماقسات قويۋعا قۇقىعى جوعىن ايتادى. سوندىقتان نەگىزگى ماقساتتىڭ باعىتىن وزگەرتۋگە جول بەرىلمەيدى.

قورلاردىڭ كىرىس كوزى

قايىرىمدىلىق ۇيىمىنىڭ كىرىس كوزدەرى مىنالار:

1) مۇلىكتى، سونداي-اق وعان قۇقىقتاردى سىيعا تارتۋ، وسيەت ەتىپ قالدىرۋ نەمەسە وتەۋسىز بەرۋ؛

2) ەرىكتى قايىرمالدىقتار؛

3) قايىرىمدىلىق اۋكتسيوندارىنان، كونكۋرستارىنان تۇسكەن كىرىستەر؛

4) نىسانالى كاپيتال (ەنداۋمەنت)؛

5) قايىرىمدىلىق گرانتتارى؛

6) كاسىپكەرلىك قىزمەتتەن الىنعان كىرىستەر جانە باسقا دا زاڭمەن رۇقسات بەرىلگەن كوزدەر.

سونداي-اق، زاڭگەر ەرىكتى تۇردە قايىرىمدىلىق جاساۋدى سۇرايتىن قورلار ق ر زاڭنامالارىنداعى قىلمىستىق جولمەن تابىلعان زاڭسىز تابىستاردى زاڭداستىرۋعا، تەرروريزمدى قارجىلاندىرۋعا قارسى تالاپتاردى ساقتاۋعا مىندەتتى ەكەنىن ايتادى. ياعني، ولار وزدەرىنىڭ كىرىس كوزىن باقىلاۋى كەرەك جانە ولار جايلى ءتيىستى ورگانعا حابارلاۋعا مىندەتتى.

قور جەكە شىعىندارىنا قانشا قارجى جۇمساي الادى

ق ر مادەنيەت جانە اقپارات مينيسترلىگىنىڭ مالىمدەۋىنشە، قايىرىمدىلىق جاساۋشىلار كىرىستەردى:

1) ءبىر جىلدىڭ ىشىندە ءبىر رەت نەمەسە بىرنەشە رەت قايىرىمدىلىق كومەككە؛

2) ۇزاق مەرزىمدى قايىرىمدىلىق كومەككە؛

3) الەۋمەتتىك جارنامانى وتكىزۋگە جاردەمدەسۋگە؛

4) قايىرىمدىلىق ۇيىمىنىڭ قىزمەتىن جۇزەگە اسىرۋعا جۇمساي الادى.

قايىرىمدىلىق ۇيىمدارىنىڭ اكىمشىلىك- باسقارۋشىلىق شىعىندارىنىڭ سوماسى زاڭمەن رەگلامەنتتەلمەگەن، ونى سول ۇيىمنىڭ باسقارۋشى ورگانى بەلگىلەيدى.

سەرىك بەركامالوۆتىڭ ايتۋىنشا، جۇمىسشىلارعا جالاقى تولەۋ قور شىعىندارىنىڭ ىشىندە قاراستىرىلعان.

قور كىمگە ەسەپ بەرۋگە مىندەتتى

مادەنيەت جانە اقپارات مينيسترلىگىنىڭ مالىمدەۋىنشە، قايىرىمدىلىق ۇيىمدارى جىلىنا كەمىندە ءبىر رەت ورىندالعان قايىرىمدىلىق باعدارلاماسى تۋرالى ەسەپتى بۇقارالىق اقپارات قۇرالدارىندا نەمەسە قايىرىمدىلىق ۇيىمىنىڭ ينتەرنەت-رەسۋرسىندا جاريالاۋعا مىندەتتى.

ەسەپتە قايىرىمدىلىق باعدارلاماسىن ورىنداۋ شەڭبەرىندەگى كىرىستەر مەن شىعىستار، قول جەتكىزىلگەن ماقساتتار تۋرالى قىسقاشا اقپارات قامتىلۋعا ءتيىس.

سونداي-اق، ۇ ە ۇ، سونىڭ ىشىندە قايىرىمدىلىق ۇيىمدارى جىل سايىن 31-ناۋرىزعا دەيىن ءوز قىزمەتى تۋرالى ەسەپتى ۇكىمەتتىك ەمەس ۇيىمداردىڭ مالىمەتتەر بازاسىنا (ۇ ە ۇ م ب) ۇسىنادى.

اتاپ وتەرلىك جايت، «اسار- ۋمە» قايىرىمدىلىق قورى ءوز ەسەبىن جىل سايىن جاريالاپ وتىرادى.

زاڭگەر قور قارجىسى ءتيىستى ماقساتتا جۇمسالۋىن سول ۇيىمنىڭ قامقورشىلىق كەڭەسى نە تەكسەرۋ كوميسسياسى تەكسەرەتىنىن ايتتى. ال اقشا قولدى بولعانى انىقتالسا، بۇل ىسپەن قۇقىق قورعاۋ ورگاندارى، اتاپ ايتقاندا ق ر قارجىلىق مونيتورينگ اگەنتتىگى اينالىسادى.

سونداي- اق، ساراپشىنىڭ ايتۋىنشا، ق ر اكىمشىلىك قۇقىق بۇزۋشىلىق تۋرالى كودەكستە «كوممەرتسيالىق ەمەس ۇيىمدار تۋرالى ق ر زاڭناماسىن بۇزۋ» اتتى 489-1-باپ بار. مىسالى، وسى باپتىڭ ءبىرىنشى بولىگىندە ۇيىم ءوز قىزمەتى، قۇرىلتايشىلارى، مۇلكى، كىرىسى جانە شىعىسى تۋرالى دەر كەزىندە اقپارات بەرمەسە نەمەسە جالعان اقپارات بەرسە، ەسكەرتۋ جاسالاتىنى جازىلعان.

قانداي جاعدايدا قايىرىمدىلىق قورىنىڭ قىزمەتىن ءتيىستى مەملەكەتتىك ورگاندار تەكسەرەتىنىن ءبىلۋ ءۇشىن Kazinform ق ر باس پروكۋراتۋراسىنا جانە ق ر سىبايلاس جەمقورلىققا قارسى ءىس-قيمىل اگەنتتىگىنە ساۋال جولدادى.

ەسكە سالا كەتەيىك، بۇعان دەيىن قورلار قارجىنىڭ قايدا جۇمسالعانى تۋرالى ەسەپ بەرۋگە مىندەتتى ەكەنى تۋرالى جازعان بولاتىنبىز.

اۆتور

ەربول جانات