قايتىس بولعان 1 دونوردىڭ اعزالارى بەس ادامعا ءساتتى ترانسپلانتتالدى
استانا. قازاقپارات - University Medical Center كلينيكالارىندا دونورلىق اعزالاردى ترانسپلانتتاۋ بويىنشا ءساتتى جۇرگىزىلگەن وپەراتسيالار اعزانى ترانسپلانتاتتاۋدى كۇتۋ پاراعىندا تۇرعان بەس ادامنىڭ ءومىرىن ساقتاپ قالدى، دەپ حابارلايدى ق ر د س م باسپا ءسوز قىزمەتى.
دونور گەمورراگيالىق ينسۋلت العان 44 جاستاعى ايەل بولدى، دارىگەرلەر كونسيليۋمى ميدىڭ ءولىمىن راستادى. قيىن جاعدايدا ونىڭ تۋىستارى بۇل قادامنىڭ ماڭىزدىلىعىن ءتۇسىنىپ، قايتىس بولعاننان كەيىن اعزالاردىڭ دونورلىعىنا كەلىسىم بەردى.
UMC جۇرەك ورتالىعىندا مەديتسينالىق توپ بۇرىن مەحانيكالىق قان اينالىمىن قولداۋ قۇرىلعىسى LVAD يمپلانتاتتالعان 43 جاستاعى پاتسيەنتكە دونورلىق جۇرەكتى ترانسپلانتتاۋدى جۇرگىزدى. ەكىنشى پاتسيەنتكە وكپەنى ترانسپلانتاتتاۋ جۇرگىزىلدى. UMC انا مەن بالا ورتالىعىندا 15 جاسار قىزعا بۇيرەكتى ترانسپلانتاتتاۋ جۇرگىزىلدى. بارلىق رەتسيپيەنتتەردىڭ جاعدايى قاناعاتتانارلىق، ولار مامانداردىڭ باقىلاۋىمەن وڭالتۋدان وتەدى.
سونداي-اق، ەكىنشى دونورلىق بۇيرەك پەن باۋىر استانا قالاسىنىڭ ۇلتتىق عىلىمي ونكولوگيالىق ورتالىعىندا پاتسيەنتتەرگە ترانسپلانتتالدى.
دونورلىق اعزالاردى ترانسپلانتتاۋ - ەڭ كۇردەلى وپەراتسيالاردىڭ ءبىرى، الايدا تاجىريبە، داعدىلار جانە تەحنيكالىق جاراقتاندىرۋ ولاردى ءبىزدىڭ ەلىمىزدە جوعارى دەڭگەيدە ورىنداۋعا مۇمكىندىك بەرەدى. جۇرەك پەن وكپەنى ترانسپلانتتاۋ قايتىس بولعاننان كەيىنگى دونوردان، ميدىڭ ءولىمى راستالعان كەزدە عانا جۇزەگە اسىرىلادى. الايدا، ودان ءارى پروتسەسس كوبىنەسە الەۋەتتى دونوردىڭ جاقىن تۋىستارىنىڭ شەشىمىنە بايلانىستى.
اعزالاردى ترانسپلانتتاۋدى ءساتتى جۇرگىزۋ - بۇل ءارتۇرلى مەملەكەتتىك جانە مەديتسينالىق قىزمەتتەردىڭ ۇيلەسىمدى توپتىق جۇمىسى. ترانسپلانتولوگتار توبى ءبىرىنشى كەزەكتە دونوردىڭ جاقىندارى مەن تۋىستارىنا، اعزالاردى ترانسپلانتتاۋ بويىنشا ءبىرقاتار كۇردەلى وپەراتسيالاردى قاۋىپسىز جۇزەگە اسىرۋعا كومەكتەسكەندەردىڭ بارلىعىنا العىسىن بىلدىرەدى.