قايتارىمسىز 3 ميلليون تەڭگە گرانتتى كىمدەر الا الادى
استانا. قازاقپارات - 14 جاستان 35 جاسقا دەيىنگى جاستار 3 ميلليون تەڭگە مولشەرىندە «تاۋەلسىز ۇرپاقتار» گرانتىن الا الادى. كونكۋرسقا وتىنىمدەردى قابىلداۋ 18 تامىزعا دەيىن جالعاسپاق.
بۇل تۋرالى ق ر مادەنيەت جانە اقپارات مينيسترلىگى جاستار جانە وتباسى ىستەرى كوميتەتىنىڭ ءتوراعاسى «دارىن» مەملەكەتتىك جاستار سىيلىعى جانە «تاۋەلسىزدىك ۇرپاقتارى» گرانتى ماسەلەلەرى بويىنشا وتكەن باسپا ءسوز كونفەرەنسياسىندا حابارلادى.
- 2021-جىلدان باستاپ، مەملەكەت باسشىسىنىڭ باستاماسىمەن شىعارماشىل جاستاردى قولداۋ ءۇشىن جىل سايىن جاستارعا 3 ميلليون تەڭگە مولشەرىندە «تاۋەلسىز ۇرپاقتار» گرانتى بەرىلەدى. گرانتقا 14-35 جاس ارالىعىنداعى ق ر ازاماتى ۇمىتكەر بولا الادى. قاعيدالارعا سايكەس كونكۋرس 2 كەزەڭدە وتكىزىلەدى. 1-كەزەڭ - كونكۋرستىق وتىنىمدەردى قابىلداۋ جانە قاراۋ. 2-كەزەڭ - كونكۋرستىق وتىنىمدەردى باعالاۋ جانە كونكۋرستىق كوميسسيانىڭ جەڭىمپازدارىن انىقتاۋ. بيىل گرانتقا ۇمىتكەرلەردىڭ كونكۋرستىق وتىنىمدەرىن قابىلداۋ ءراسىمى 16-ماۋسىم – 18-تامىز ارالىعىندا جۇرگىزىلەدى، - دەيدى قايرات قامباروۆ.
بيىل جالپى رەسپۋبليكالىق گرانتتىڭ يەگەرلەرىنەن بولەك تاعى 277 جاس وڭىرلىك كونكۋرستاردى جەڭىپ الۋ مۇمكىندىگىنە يە بولماق.
- كونكۋرستىڭ قورىتىندىسى بويىنشا اعىمداعى جىلدىڭ سوڭىنا دەيىن 30 ازاماتقا 3 ميلليون تەڭگە كولەمىندە «تاۋەلسىز ۇرپاقتار» گرانتى بەرىلەدى. 2025-جىلى اكىمدىكتەردىڭ اقپاراتى بويىنشا جەرگىلىكتى بيۋجەتتەن 277 وڭىرلىك گرانت بەرۋ جوسپارلانىپ وتىر. بۇل رەتتە اكىمدىكتەر گرانتتىڭ سانى مەن مولشەرىن، سونداي-اق باعىتىن دەربەس بەكىتەتىنىن اتاپ وتكەن ءجون. گرانتتى پايدالانۋ مەرزىمى 1 جىلدان اسپايدى. كونكۋرس تۋرالى تولىق اقپاراتتى مادەنيەت جانە اقپارات مينيسترلىگىنىڭ رەسمي سايتىنان، سونداي-اق الەۋمەتتىك جەلىلەردەگى رەسمي اككاۋنتتاردان بىلۋگە بولادى، - دەيدى جاستار جانە وتباسى ىستەرى كوميتەتىنىڭ ءتوراعاسى.
مادەنيەت جانە اقپارات مينيسترلىگىنىڭ مامانى «تاۋەلسىزدىك ۇرپاقتارى» گرانتىن 2029-جىلعا دەيىن بەرۋ جوسپارلانعانىن ايتتى.
- گرانت كونكۋرس نەگىزىندە 6 باعىت بويىنشا جوبالاردى ىسكە اسىرۋ ءۇشىن بەرىلەدى. ولار: عىلىم، مادەنيەت، اقپاراتتىق تەحنولوگيالار، بيزنەس، مەديا جانە ۆولونتەرلىك باعىتتار. گرانتتى جۇزەگە اسىرۋ كەزەڭدەرىندە 123 جاس ازامات رەسپۋبليكالىق دەڭگەيدە «تاۋەلسىز ۇرپاقتار» گرانتىنىڭ يەگەرى اتاندى. جالپى، ق ر پرەزيدەنتىنىڭ «ادىلەتتى قازاقستان - ءبارىمىز جانە ءارقايسىمىز ءۇشىن، قازىر جانە ءاردايىم» سايلاۋالدى باعدارلاماسىن ىسكە اسىرۋ جونىندەگى ءىس-قيمىل جوسپارى اياسىندا «تاۋەلسىز ۇرپاقتار» گرانتىن 2029-جىلعا دەيىن بەرۋ جوسپارلانعان، - دەيدى ول.
ايتا كەتەيىك، بۇعان دەيىن «دارىن» سىيلىعىنىڭ يەگەرلەرىنە 1 ميلليون تەڭگە سىياقى بەرىلەتىنىن جازعان ەدىك.