قايتارىلعان اكتيۆتەردىڭ قانشاسى مەملەكەت مەنشىگىنە ءوتتى
استانا. KAZINFORM - «قايتارىلعان اكتيۆتەردى باسقارۋ كومپانياسى» ج ش س ءوز بالانسىنا قابىلداناتىن مۇلىكتىڭ مالىمەتتەرىنەن سايكەسسىزدىك كورسە، مەملەكەت مەنشىگىنە الۋدان باس تارتا الادى. بۇل تۋرالى قارجى مينيسترلىگىنىڭ Kazinform ساۋالىنا جولداعان جاۋابىندا ايتىلعان.
«قايتارىلعان اكتيۆتەردى باسقارۋ كومپانياسى» ج ش س 0 مەملەكەتتىڭ مەنشىگىندەگى مەكەمە بولىپ ەسەپتەلەدى. باسقارۋشى كومپانيانىڭ نەگىزگى مىندەتتەرىنىڭ ءبىرى - مەملەكەتكە قايتارىلعان اكتيۆتەردى مەملەكەتتىڭ اتىنان مەنشىككە قابىلداۋ. اقشالاي قاراجات تۇرىندەگى اكتيۆتەر باسقارۋشى كومپانيانى اينالىپ ءوتىپ، تىكەلەي ارنايى مەملەكەتتىك قورعا اۋدارىلادى.
اكتيۆتەردىڭ مالىمدەلگەن جاي-كۇيىنە سايكەس كەلمەۋى انىقتالعان كەزدە اكتيۆتەردىڭ سايكەسسىزدىگى تۋرالى اكت جاسالىپ، اكتيۆتەردى قايتارۋ جونىندەگى ۋاكىلەتتى ورگانعا حابارلانادى. ەگەر اكتيۆ جوعالعان نەمەسە اكتيۆكە قاجەتتى قۇقىقتى راستايتىن قۇجاتتار بولماعان جاعدايدا، باسقارۋشى كومپانيا ونى قابىلداۋدان باس تارتۋى مۇمكىن»، - دەپ جازىلعان مينيسترلىك مالىمەتىندە.
اكتيۆتەر قابىلدانعاننان كەيىن باسقارۋشى كومپانيا ولاردىڭ ساقتالۋىن جانە قىزمەتىن قامتاماسىز ەتۋ ءۇشىن كۇزەت ۇيىمدارىن تارتىپ، كوممۋنالدىق جانە وزگە دە قىزمەت كورسەتۋ شارتتارىن جاساۋعا، مۇلىكتى جوعالتۋ تاۋەكەلدەرىنەن ساقتاندىرۋعا حاقىلى.
اكتيۆتەر ساتىلعانعا دەيىن كومپانيا ولاردى جالعا بەرۋ، سەنىمگەرلىك باسقارۋ، ءوز بەتىمەن باسقارۋ ارقىلى ۇزدىكسىز جۇمىس ىستەۋىن قامتاماسىز ەتەدى.
«باسقارۋشى كومپانيا قۇرىلعان ساتتەن باستاپ (2023 -جىلدىڭ 21-قىركۇيەگى - رەد. ) 2024 -جىلعى 17-قازانعا دەيىن كومپانيانىڭ بالانسىنا 62 اكتيۆ بەرىلدى: 1 تۇرعىن ءۇي؛ 2 اكىمشىلىك عيمارات؛ 7 كوممەرتسيالىق عيمارات؛ «دۋمان» قوناق ءۇي كەشەنى؛ «دۋمان» قوناق ءۇي كەشەنىنىڭ نەگىزگى قۇرالدارى جانە تەحنيكالىق-ماتەريالدىق قۇندىلىقتارى؛ 5 زاڭدى تۇلعانىڭ جارعىلىق كاپيتالىنا قاتىسۋ ۇلەستەرى؛ 1 وندىرىستىك بازا؛ 1 اسحانا؛ 1 جانارماي قۇيۋ ستانسياسى؛ 13 جەر ۋچاسكەسى؛ «وريون» بيزنەس ورتالىعىنىڭ 1 اياقتالماعان قۇرىلىسى جانە «بايسات» ساۋدا ءۇيى تۇرىندەگى 1 مۇلىك»، - دەپ جازادى مينيسترلىكتەگىلەر.
سونداي-اق، كومپانياعا 196 دانا زەرگەرلىك بۇيىم، كوللەكتسيالىق مونەتا، كادەسىي جانە اكسەسسۋار تاپسىرىلعان.
«سونىمەن قاتار، شەتەلدەن قايتارىلعان اكتيۆتەر بار: 2 اۆتوكولىك، دۋبايداعى 2 ۆيللا، فرانسيانىڭ انتيب قالاسىنداعى 4 پاتەر، تۇركياداعى 2 ءۇي جانە 1 پاتەر، ماسكەۋدەگى 5 پاتەر، 5 قويما جانە 5 اۆتوتۇراق ورنى.
بۇعان قوسا، جالپى قۇنى 2,5 ميلليارد تەڭگە بولاتىن 7 جەر ۋچاسكەسى مەن تۇرعىن ءۇيدى بەرۋ تۋرالى كەلىسىمشارتتارعا قول قويىلدى. سونداي-اق، 390 ميلليون تەڭگە سوماسىنداعى كومپانيانىڭ جارعىلىق كاپيتالىنا قاتىسۋ ۇلەسىن بەرۋ پروتسەسى ءجۇرىپ جاتىر»، - دەلىنگەن جاۋاپتا.
ايتا كەتسەك، بۇعان دەيىن قازاقستان قايتارىلعان اكتيۆتەردى ساتۋدان قانشا تابىس تاپقانى تۋرالى مالىمەت بەرىلگەن بولاتىن.
سونداي- اق ۇكىمەتتىڭ باسپا ءسوز قىزمەتى تۇركىستان جانە اقمولا وبلىستارىندا مەملەكەتكە قايتارىلعان قاراجات ەسەبىنەن الەۋمەتتىك نىساندار سالىناتىنىن ءمالىم ەتتى.
اۆتور
ەسىمجان ناقتىباي