تەكسەرۋشىلەر زاڭنامانى دۇرىس قولدانبادى، قۇجاتتاردى قاتە باعالادى نەمەسە نەگىزسىز قورىتىندى جاسادى دەپ ەسەپتەگەن جاعدايدا ءوز ۇستانىمىن دالەلدەۋگە بولادى.
شاعىم قايدا بەرىلەدى؟
2026-جىلعى 1-قاڭتاردان باستاپ كاسىپكەرلىك سۋبەكتىلەرىنىڭ سالىق تەكسەرىسى ناتيجەسىنە شاعىمدانۋدىڭ سوتقا دەيىنگى مىندەتتى ءتارتىبى ەنگىزىلدى. سوندىقتان الدىمەن قارجى مينيسترلىگىنىڭ اپەللياتسيالىق كوميسسياسىنا جۇگىنۋ قاجەت. كوميسسيا شەشىمىمەن كەلىسپەگەن جاعدايدا عانا اكىمشىلىك سوتقا تالاپ قويۋعا بولادى.
مەرزىمى قانشا؟
اپەللياتسيالىق كوميسسياعا شاعىم تەكسەرۋ ناتيجەلەرى تۋرالى حابارلامانى العان كۇننەن باستاپ 30 جۇمىس كۇنى ىشىندە بەرىلەدى.
ەگەر كوميسسيا شەشىمىمەن كەلىسپەسە، ونىڭ شەشىمى تابىس ەتىلگەن كۇننەن باستاپ 1 كۇنتىزبەلىك اي ىشىندە اكىمشىلىك سوتقا جۇگىنۋگە بولادى.
دالەلدى سەبەپ بولسا، وتكىزىپ العان مەرزىمدى قالپىنا كەلتىرۋگە مۇمكىندىك بار. مىسالى، جەكە تۇلعانىڭ نەمەسە ۇيىم باسشىسى نە باس بۋحگالتەردىڭ ۋاقىتشا ەڭبەككە جارامسىز بولۋى وسىنداي سەبەپ رەتىندە تانىلۋى مۇمكىن.
قانداي قۇجاتتار كەرەك؟
شاعىمعا قوسىمشا ەسەپتەلگەن سالىقتىڭ زاڭسىز ەكەنىن دالەلدەيتىن قۇجاتتار تىركەلەدى. ولاردىڭ قاتارىنا:
باستاپقى بۋحگالتەرلىك جانە سالىقتىق قۇجاتتار؛
شارتتار؛
ەسەپ- قيساپتار؛
سالىق تولەۋشىنىڭ ۇستانىمىن راستايتىن باسقا دا قۇجاتتار جاتادى.
قۇجاتتاردىڭ ناقتى ءتىزىمى سالىق ورگانى قانداي زاڭ بۇزۋشىلىقتى كورسەتكەنىنە بايلانىستى. ەگەر سالىق ورگانى ءوز قورىتىندىسىن جەتكىلىكتى دالەلدەي الماسا نەمەسە وعان نەگىز بولعان قۇجاتتاردى ۇسىنباسا، بۇل دا قوسىمشا ەسەپتەۋدى زاڭسىز دەپ تانۋعا نەگىز بولۋى مۇمكىن.
شاعىم بەرىلگەن كەزدە سالىقتى تولەۋ كەرەك پە؟
شاعىم قارالىپ جاتقان كەزدە سالىق تەكسەرۋىنىڭ ناتيجەلەرى تۋرالى حابارلامانىڭ ورىندالۋى توقتاتىلا تۇرادى. ياعني داۋلى سالىق سوماسىن بىردەن تولەۋ مىندەتى بولمايدى.
دەگەنمەن سالىق تولەۋشى ءوسىمپۇلدىڭ ءارى قاراي ەسەپتەلۋىنە جول بەرمەۋ ءۇشىن داۋلى سومانى تولەپ قويۋى مۇمكىن. بۇل ونىڭ سالىق ورگانىنىڭ شەشىمىمەن كەلىسكەنىن بىلدىرمەيدى جانە كەيىن شاعىمدانۋ قۇقىعىن جويمايدى. ەگەر سوت نەمەسە اپەللياتسيالىق كوميسسيا قوسىمشا ەسەپتەۋدى زاڭسىز دەپ تانىسا، ارتىق تولەنگەن سومانى قايتارۋعا بولادى.
زاڭگەر جالداۋ مىندەتتى مە؟
جوق. سالىق تولەۋشى سوتقا ءوزى جۇگىنە الادى. الايدا كۇردەلى سالىق داۋلارىندا زاڭناما مەن بۋحگالتەرلىك قۇجاتتاردى قاتار تالداۋ قاجەت بولعاندىقتان، سالىق كونسۋلتانتى نەمەسە زاڭگەردەن كەڭەس العان دۇرىس.
جالپى، سالىق تەكسەرىسىنىڭ ناتيجەسىنە شاعىمدانۋ ءتارتىبى جەكە تۇلعالارعا، جەكە كاسىپكەرلەرگە جانە زاڭدى تۇلعالارعا نەگىزىنەن بىردەي.