الماتى اكىمدىگىنىڭ مالىمەتىنشە، قالادا ەكى ءىرى جوبا جۇزەگە اسىرىلىپ جاتىر. ونىڭ ىشىندە كوكتەم-3 شاعىناۋدانىندا Almaty AI Hub ورتالىعى قۇرىلماق. بۇل نىسان بۇرىن قايرات ساتىبالدىعا تيەسىلى قوناق ءۇي بولعان.
بۇگىندە اۋدانى 9,4 مىڭ شارشى مەتردەن اساتىن عيماراتتى قايتا جاڭعىرتۋ باستالعان. نىسان 556 جۇمىس ورنى بار كوپفۋنكتسيونالدى ورتالىققا اينالادى.
- مۇندا IT جانە جاساندى ينتەللەكت كومپانيالارىنا، ستارتاپتار مەن ازىرلەۋشىلەرگە ارنالعان كەڭىستىكتەر، ءبىلىم بەرۋ الاڭدارى، كوۆوركينگتەر، كەڭسەلەر، كونفەرەنتس-زالدار مەن ءىس-شارالار وتكىزۋ ايماقتارى ورنالاسادى. حاب قۇرامىنا جاساندى ينتەللەكت مەكتەبى مەن AI Campus ينفراقۇرىلىمى دا كىرەدى. سونداي-اق روبوتوتەحنيكا ەكوجۇيەسىن قۇرۋ كوزدەلگەن، - دەپ حابارلادى اكىمدىكتەن.
ەكىنشى جوبا - Almaty AI Park. ونى 4,9 گەكتار جەرگە سالۋ جوسپارلانعان. كەشەننىڭ جالپى اۋدانى شامامەن 76 مىڭ شارشى مەتر. جوبا ەكى كەزەڭدە جۇزەگە اسىرىلادى. ءبىرىنشى كەزەڭدى 2027 -جىلى جەلتوقساندا، ال ەكىنشىسىن 2028 -جىلى جەلتوقساندا اياقتاۋ كوزدەلگەن.
- Almaty AI Park قۇرامىنا عىلىمي-زەرتتەۋ جانە جاساندى ينتەللەكت زەرتحانالارى، تەحنولوگيالىق كومپانيالاردىڭ كەڭسەلەرى، كوۆوركينگ، اكسەلەراتور مەن بيزنەس-ينكۋباتور، سونداي-اق ءبىلىم بەرۋ جانە ءىس-شارالار وتكىزۋ ينفراقۇرىلىمى كىرەدى. بۇدان بولەك، تەحنولوگيالىق كلاستەردىڭ وزىندە ماماندار دايارلايتىن ۋنيۆەرسيتەت اشۋ جوسپارلانعان، - دەپ حابارلادى الماتى اكىمدىگى.