قايرات ساتىبالدى مەملەكەتكە تاعى 50 ميلليارد تەڭگەدەن استام اكتيۆىن قايتارادى - باس پروكۋراتۋرا

استانا. KAZINFORM - باس پروكۋراتۋرانىڭ اكتيۆتەردى قايتارۋ جونىندەگى كوميتەتى ق. ساتىبالدى ۇلىنىڭ كىناسىن مويىنداۋ جانە زاڭسىز يەمدەنگەن اكتيۆتەرىن قايتارۋ تۋرالى پروتسەستىك كەلىسىمىنىڭ شارتتارىن ورىنداۋ جۇمىستارىن جۇرگىزۋدە.

بۇل اكتيۆتەردىڭ جالپى سوماسى باعالاۋدى ەسكەرگەندە، 50 ميلليارد تەڭگەدەن اسادى. قازىرگى تاڭدا 18 ميلليارد تەڭگەنىڭ اكتيۆتەرى قايتارىلدى.

«ولاردىڭ قاتارىندا الماتىداعى 2 ءىرى بيزنەس ورتالىعى، كوممەرتسيالىق جىلجىمايتىن مۇلىك جانە استانانىڭ بەدەلدى اۋدانىنداعى ەليتالىق ءۇي بار.

ساتىبالدى ۇلىنان ءتىنتۋ بارىسىندا الىنعان 95 مىڭ ا ق ش دوللارى ارنايى مەملەكەتتىك قورعا اۋدارىلدى.

سونىمەن قاتار جۇزدەگەن ميلليون تەڭگەگە ەكسكليۋزيۆتى زەرگەرلىك بۇيىمدار، برەندتىك ساعاتتار، كوللەكتسيالىق مونەتالار جانە باسقا دا ءساندى بۇيىمدار (كولەمى 174 اتاۋ بار) مەملەكەتكە قايتارىلدى»، - دەپ جازدى باقىلاۋشى ورگاننان.

بىرىككەن اراب امىرلىكتەرىنەن جالپى قۇنى 192 ميلليون تەڭگەنى قۇرايتىن Rolls-Royce Cullinan جانە Aston Martin ماركالى كولىكتەر تۇرىندەگى اكتيۆتەر قايتارىلدى.

جالپى سوماسى 33 ميلليارد تەڭگەنى قۇرايتىن ق. ساتىبالدى ۇلى مەن ونىڭ جاقىندارىنا تيەسىلى شەتەلدىك مۇلىكتىڭ تاپسىرىلۋى اياقتالۋ ساتىسىندا.

«ونىڭ قاتارىندا دۋباي قالاسىنداعى قۇنى 20 ميلليارد تەڭگە تۇراتىن ەكى باعالى ۆيللا؛ فرانسيانىڭ كوكشىل جاعالاۋىنداعى قۇنى 4 ميلليارد تەڭگە تۇراتىن ءتورت ەليتالىق پاتەر؛ قۇنى 5 ميلليارد تەڭگە تۇراتىن رەسەيدىڭ ماسكەۋ قالاسىنداعى بەدەلدى تۇرعىن ءۇي كەشەندەرىندەگى 15 -جىلجىمايتىن مۇلىك؛ قۇنى 4 ميلليارد تەڭگەدەن استام تۇركيانىڭ بودرۋم جانە ستامبۋل قالالارىنداعى ەكى ەليتالىق ۆيللا جانە پاتەر جاتادى.

باسقا ىستەردى ەسكەرە وتىرىپ، ق. ساتىبالدى ۇلى 2,5 جىل ىشىندە مەملەكەتكە 783 ميلليارد تەڭگەگە اكتيۆتەردى قايتاردى»، - دەلىنگەن اقپاراتتا.