قايرات ساتجانوۆ بوكستان قازاقستان ەرلەر قۇراماسىنىڭ باس باپكەرى قىزمەتىنە تاعايىندالدى

استانا. KAZINFORM -قازاقستان بوكس فەدەراتسياسى قايرات ساتجانوۆتىڭ بوكستان ەرلەر قۇراماسىنىڭ باس باپكەرى قىزمەتىنە تاعايىندالعانىن مالىمدەدى.

ايتا كەتەيىك، قايرات تۇرسۇنقان ۇلى ساتجانوۆ - 54 جاستا، قازاقستان رەسپۋبليكاسىنىڭ بوكستان ەڭبەك سىڭىرگەن جاتتىقتىرۋشىسى، قازاقستان رەسپۋبليكاسىنىڭ دەنە شىنىقتىرۋ جانە سپورت ۇزدىگى.

باپكەرلىك ەڭبەك ءوتىلى - 34 جىل.

2021-2022 -جىلدارى قازاقستان ۇلتتىق قۇراماسىنىڭ باس باپكەرى قىزمەتىن اتقارعان.

2024 -جىلدان قازاقستان جاستار قۇراماسىنىڭ اعا باپكەرى.

ق. ساتجانوۆتىڭ جەتەكشىلىگىمەن 2021 -جىلى قازاقستان قۇراماسى الەم چەمپيوناتىندا (سەربيا) II كوماندالىق ورىن (2 التىن، 2 كۇمىس، 1 قولا مەدال) الدى.

2022-جىلى ازيا چەمپيوناتىندا (يوردانيا) Ⅱكوماندالىق ورىن (3 التىن، 6 كۇمىس، 3 قولا) ەنشىلەگەن.

2024 -جىلى استانادا وتكەن جاستار اراسىنداعى ازيا چەمپيوناتىندا قازاقستان كومانداسى I كوماندالىق ورىن (5 التىن، 1 كۇمىس، 3 قولا) الدى.

قايرات ساتجانوۆ جاتتىقتىرۋشى رەتىندە 7 الەم چەمپيونىن، 43 ازيا چەمپيونىن دايىنداعان.

«قازىرگى ۋاقىتتا جاڭا جاتتىقتىرۋشىلار قۇرامى قۇرىلۋدا، ونىڭ ىشىندە: شەتەلدىك جاتتىقتىرۋشى مامان، جالپى دەنە دايارلىعى بويىنشا جاتتىقتىرۋشى، سونداي-اق عىلىمي توپ ماماندارى شاقىرىلادى.

سونىمەن قاتار، باس جاتتىقتىرۋشىنىڭ جەكە شاكىرتى بولمايدى دەگەن تالاپ ەنگىزىلدى»، - دەپ جازدى ق ب ف- نان.