قايرات بورانبايەۆقا ەلەكتروندى بىلەزىك تاعۋ تۋرالى شەشىم قابىلدانعان جوق - اگەنتتىك

استانا. KAZINFORM - قايرات بورانبايەۆ بيۋدجەت قاراجاتىن جىمقىرۋ، سالىق تولەۋدەن جالتارۋ كۇدىگىنە ىلىكتى. بۇل تۋرالى اتالعان قارجىلىق مونيتورينگ اگەنتتىگى ءتوراعاسىنىڭ ورىنباسارى جەڭىس ەلەمەسوۆ ايتتى.

بۇگىن پارلامەنت ماجىلىسىندە بولعان باسپا ءسوز ءماسليحاتىندا تىلشىلەر «ءىستى بولعان قايرات بورانبايەۆقا قاتىستى جاڭا قىلمىستىق ءىستى قوزعاۋ قاراستىرىلدا ما؟» دەپ سۇرادى.

«بۇعان دەيىن سوت ۇكىمىمەن ول كىنالى دەپ تانىلىپ، قىلمىستىق جاۋاپكەرشىلىككە تارتىلدى. وعان باس بوستاندىعىنان ايىرۋ جازاسى تاعايىندالعانىن، كەيىن كەلتىرىلگەن زالالدى تولىعىمەن وتەگەندىكتەن، باس بوستاندىعىن شەكتەۋگە اۋىستىرىلعانىن بىلەسىزدەر»، - دەدى ج. ەلەمەسوۆ.

وعان قاتىستى باسقا شارالار قاراستىرىلماعان، ياعني ەلەكتروندى بىلەزىك تاعۋ سياقتى شەشىم قابىلدانباعان.

«ەلەكتروندى بىلەزىك تاعىپ جۇرگەن جوق. ونىڭ باس بوستاندىعىن شەكتەۋ بار. بۇلتارتپاۋ شاراسىن تاڭداۋدىڭ قاجەتى جوق، ويتكەنى ول سوتتالعان ءىس اياسىندا قازىردىڭ وزىندە شەكتەۋ بار»، - دەدى جەڭىس ەلەمەسوۆ.

سونىمەن قاتار تىلشىلەر جاڭا ىستەر قاي جاعدايعا قاتىستى جالعاسىپ جاتقانىن سۇرادى.

«ول بيۋدجەت قاراجاتىن جىمقىرۋ، سالىق تولەۋدەن جالتارۋ كۇدىگىنە ىلىكتى»، - دەدى اگەنتتىك ءتوراعاسىنىڭ ورىنباسارى.

ونىڭ ايتۋىنشا، «قايرات» فۋتبول كلۋبى بويىنشا بورانبايەۆقا قاتىستى تەرگەۋ امالدارى قاراستىرىلماعان.

بيىل ناۋرىز ايىندا قايرات بورانبايەۆ بيۋدجەتكە تاعى 120 ميلليارد تەڭگە اۋدارعانى حابارلانعان ەدى.

ەسكە سالا كەتەيىك، باس بوستاندىعىنان ايىرۋ جازاسىنىڭ وتەلمەگەن بولىگى باس بوستاندىعىن شەكتەۋ تۇرىندەگى جازاعا اۋىستىرىلعان قايرات بورانبايەۆ 2023 -جىلعى 6-قاراشادا باس بوستاندىعىنان ايىرۋ ورىندارىنان بوساتىلىپ، تۇرعىلىقتى جەرى بويىنشا جازاسىن وتەۋ ورنىنا جىبەرىلدى.

اتاپ ايتقاندا، 2023 -جىلدىڭ قازان ايىندا ونىڭ جازاسى جەڭىلدەتىلگەن ەدى.

اۆتور

رۋسلان عابباسوۆ