الەۋمەتتىك جەلىلەردە 30-قازان كۇنى حەللوۋين مەرەكەسىن تويلاپ، ءتۇرلى كوستيۋم كيگەن جاستاردىڭ ۆيدەوسى تارادى. جەلى قولدانۋشىلاردىڭ سوزىنشە، ارتىنان ولاردىڭ ءبارىن پوليتسەيلەر ۇستاپ اكەتتى.
الماتى پوليتسيا دەپارتامەنتى باسپا ءسوز قىزمەتىنىڭ مالىمدەۋىنشە، المالى اۋدانىنىڭ پوليتسيا قىزمەتكەرلەرى قوعامدىق ءتارتىپ پەن ازاماتتاردىڭ قاۋىپسىزدىگىن قامتاماسىز ەتۋگە باعىتتالعان پروفيلاكتيكالىق ءىس-شارالار وتكىزدى.
- پوليتسيا مەرەكەلىك ءىس-شارالارعا، بۇقارالىق دەمالىس پەن قالا تۇرعىندارىنىڭ بوس ۋاقىتىن وتكىزۋىنە كەدەرگى كەلتىرمەيدى. ىشكى ىستەر ورگاندارىنىڭ باستى مىندەتى - قوعامدىق ورىندارداعى قاۋىپسىزدىكتى قامتاماسىز ەتۋ، قۇقىق بۇزۋشىلىقتار مەن ىقتيمال وقيعالاردىڭ الدىن الۋ، - دەپ ءتۇسىندىردى پ د.
رەيدتىك ءىس-شارالار بارىسىندا «اربات» جاياۋ جۇرگىنشىلەر ايماعىندا تۇنگى ۋاقىتتا اتا-اناسىز جۇرگەن 28 جاس ءوسپىرىم انىقتالدى. ولاردىڭ اتا-انالارىنا قاتىستى اكىمشىلىك ماتەريالدار جيناقتالدى.
پوليتسيا كامەلەتكە تولماعاندارعا ساعات 23:00 دەن 06:00 گە دەيىن زاڭدى وكىلدەرىنسىز تۇرعىن ۇيدەن تىس جەردە جۇرۋگە تىيىم سالىناتىنىن ەسكە سالدى.
سونداي-اق مەرەكە قارساڭىندا كولىكتەردى بەزەندىرىپ، ءتۇرلى قان ىزدەرى، جۇكسالعىشتان سالبىراپ تۇرعان ادام دەنەسىنىڭ بولىكتەرىن سالعان ادامدارعا ەسكەرتۋ جاسالدى. پوليتسيانىڭ سوزىنشە، بىرەۋلەر ءۇشىن قىزىق كورىنەتىن بۇل ارەكەت وزگەلەردىڭ الاڭداۋشىلىعىن تۋدىرۋى مۇمكىن.
- قالا كوشەلەرىندە قىلمىس ورنىن يميتاتسيالاۋ - كۇماندى باستاما. مۇنداي كورىنىستەر ادامداردى ۇرەيلەندىرىپ، شۇعىل قىزمەتتەرگە حابارلاسۋعا سەبەپ بولۋى مۇمكىن. سونداي-اق جول قوزعالىسىنا قاتىسۋشىلاردىڭ نازارىن اۋدارىپ، جولداعى قاۋىپسىزدىككە قاتەر توندىرەدى، - دەلىنگەن حابارلامادا.
سونىمەن قاتار كولىكپەن تاسىمالداناتىن زاتتار جۇرگىزۋشىنىڭ كورۋ مۇمكىندىگىن شەكتەمەۋى، كولىكتى باسقارۋعا كەدەرگى كەلتىرمەۋى، مەملەكەتتىك نومىرلەر مەن جارىق قۇرالدارىن جاپپاۋى جانە اينالاداعىلارعا قاۋىپ توندىرمەۋى ءتيىس.
دەكوراتسيالاردىڭ سيپاتى مەن انىقتالعان قۇقىق بۇزۋشىلىقتارعا قاراي جۇرگىزۋشىگە، سونىڭ ىشىندە اكىمشىلىك قۇقىق بۇزۋشىلىق تۋرالى كودەكسىنىڭ 590-بابى بويىنشا اكىمشىلىك جاۋاپكەرشىلىك جۇكتەلۋى مۇمكىن.
پوليتسيا جۇرگىزۋشىلەردى قوعامدىق جولداردى كۇماندى تاجىريبەلەر الاڭىنا اينالدىرماۋعا شاقىردى.
ەسكە سالايىق، الماتى پوليتسياسى جول ەرەجەسىن بۇزۋمەن تانىلعان بلوگەر نازار روللانعا نەگە ىزدەۋ جاريالاعانىن ءتۇسىندىردى.