قاتەرلى ىسىكتى ەمدەيتىن ۋلترادىبىستىق ءتاسىل

ەلىمىزدە قاتەرلى ىسىك دەس بەرمەي بارادى. سوڭعى 20 جىلدا اۋرۋ قارقىنى 25 پايىزعا ارتقان. جىل سايىن ونكولوگيادان 13 مىڭ ادام كوز جۇمادى. الايدا، ۋلترادىبىسپەن جامان اۋرۋدىڭ بەتىن قايتارۋعا بولادى ەكەن، دەپ حابارلايدى قازاقپارات.

وتاندىق دارىگەر نۇرلان حامزابايەۆ جاڭا تەحنولوگيا ارقىلى مىڭ جارىمنان استام ادامدى دەرتىنەن ەمدەپ شىعارعان. ەلوردالىق ولەگ دولگيحقا دارىگەرلەر وسىدان 13 جىل بۇرىن پروستاتا وبىرى دياگنوزىن قويىپتى. اۋرۋىن وتكىزىپ العان ول العاشقىلاردىڭ ءبىرى بولىپ جاڭا ادىستەمە بويىنشا ەمدەلگەن. قازىر دەرتتىڭ ءىزى دە قالماعانىن ايتادى.

ولەگ دولگيح، قالا تۇرعىنى:

- باسىندا ارينە وڭاي بولعان جوق. جەتىنشى سەانستان كەيىن ءبارى قالىپقا كەلە باستادى. مەن جالپى سانى 12 رەت ەم- شارا الدىم. قازىر جاعدايىم جاقسى. ءتىپتى بۇگىن عانا ءوزىم باۋ- باقشادا جيىن- تەرىم جاساپ كەلدىم. اۋرۋ مازالامايدى.

ونكولوگ نۇرلان حامزابايەۆ وبىردى ەمدەۋدىڭ ەرەكشە ءادىسىن قولدانادى. ول تىڭ تەحنولوگيا ارقىلى جۇزدەگەن ادامنىڭ اۋرۋىنا شيپا بولعان. ازىرگە ەلىمىزدە HIFU تەراپياسىن مەڭگەرگەن جالعىز مامان بولىپ تۇر. زاماناۋي قۇرىلعىنىڭ كومەگىمەن ەمدەۋ ءتاسىلى قىتاي، وڭتۇستىك كورەيا جانە جاپونيا ەلدەرىندە عانا قولدانىستا بار.

نۇرلان حامزابايەۆ، ونكولوگ:

- ەمدەۋدىڭ جوعارى تەحنولوگيالىق ءادىسى. ناۋقاستار ەمحاناعا جاتپايدى، ۇيدەن كەلەدى. ول وتە كەرەك نارسە. ەشقانداي انەستەزيا، ساۋلە، حيميوتەراپيا جوق. كەيدە حيرۋرگتارمەن ناۋقاسقا ستەند قويۋ ءۇشىن كەلىسەمىز. ءبىراق ول كاي فۋ تەراپياسىنا كەدەرگى كەلتىرمەيدى. 1 سەانس 40 مينۋت 1 ساعات ارالىعىندا وتەدى. قازاقستاندىق ءبىر عانا اپپارات بولمايدى، ول وتە از. ناۋقاستاردىڭ % 99 بىزگە كەلە الماۋىنىڭ سەبەبى، كۆوتا مەن كەزەكتى كۇتىپ قالۋىندا. ناۋقاستاردى ەمدەۋگە كۆوتا جاعىنان ۇكىمەت تولەۋ كەرەك. سوعان قازىر ۇلكەن جۇمىس جاسايىن دەپ جاتىرمىز.

شەتەلدە مۇنداي پىشاقسىز وپەراتسيانىڭ قۇنى 100 مىڭ ەۋروعا دەيىن بارادى. امالى تاۋسىلعان وتانداستارىمىز وسى ءادىستى ىزدەپ تالاي شەت ەل اسقان. ونكولوگتىڭ ايتۋىنشا، ەندى ءوزىمىزدىڭ ەلدە كۆوتا بويىنشا ەمدەلۋگە مۇمكىندىك قاراستىرىلىپ جاتىر.

حايفۋ دەپ اتالاتىن مىنا قۇرىلعى قاتەرلى ىسىكتىڭ 4 ساتىسىن پىشاقسىز ەمدەيدى ەكەن. ياعني ۋلترا دىبىس ارقىلى مەتاستازعا ءوتىپ كەتكەن ىسىكتى دالدىكپەن كۇيدىرەدى. ونكولوگيانى ەمدەۋدىڭ تىڭ ءادىسىن وتاندىق جانە شەتەلدىك عالىمدار دا مويىنداپ وتىر.

سەرىك اقشولاقوۆ، مەديتسينا عىلىمدارىنىڭ دوكتورى:

- بۇل ونكولوگيالىق اۋرۋلاردى ەمدەۋدىڭ جوعارى تەحنولوگيالىق ءادىسى. پروفەسسور حامزابايەۆتىڭ كۇش- جىگەرى مەن كاسىبي قىزمەتىنىڭ ارقاسىندا بۇل ءادىس ءبىزدىڭ ەلىمىزدە دە قولدانىلا باستادى. بۇگىندە بۇل تەحنولوگياعا ءبىرقاتار ەل قىزىعۋشىلىق تانىتىپ وتىر. قازاقستاندا 1000-نان استام ادام ەمدەلىپ، جاقسى ناتيجە كورسەتكەن.

وبىر دەرتىنىڭ دەندەپ بارا جاتقانىن ستاتيستيكالىق دەرەكتەرگە سۇيەنىپ قاراۋعا بولادى. ەلىمىزدە جىل سايىن 37 مىڭنان استام ادامنان جاڭا قاتەرلى ىسىك انىقتالادى. وكىنىشكە قاراي ولاردىڭ 13 مىڭنان استامى دۇنيە سالادى. قازىردىڭ وزىندە 200 مىڭنان استام ادام وسى دەرتپەن تىركەۋدە تۇر. وسى تۇستا ونكولوگتار اتى جامان اۋرۋدىڭ الدىن الۋ ءۇشىن جاڭا تەحنولوگيالارعا بارىنشا اشىق بولۋىمىز كەرەك دەپ وتىر.

www.24.kz