بۇل - دۇنيەجۇزىلىك تەندەنسيا، بىزدە دە جىلدان جىلعا ونكولوگيالىق اۋرۋلارمەن اۋىراتىندار سانى كوبەيىپ كەلە جاتىر. ماسەلەن، بىلتىر 43 مىڭنان استام ادامعا دياگنوز قويىلدى. دەگەنمەن، ءبىر قۋانتارلىق جايت - اۋرۋ كورسەتكىشى وسكەنىمەن، ءولىم مولشەرى جىلدان جىلعا ازايىپ كەلەدى. مىسالى، 5-6 جىل بۇرىن بۇل كورسەتكىش 20 مىڭنىڭ ماڭىندا بولسا، بىلتىر 13 مىڭ ادام قايتىس بولدى. ەرتەرەك دياگنوستيكالاپ ەم الساق، ناۋقاستىڭ تولىق جازىلىپ كەتۋ مۇمكىندىگى 100 پايىزعا جەتەدى، ال 5 جىلدىق ءومىر ءسۇرۋ كورسەتكىشى قازىر 60 پايىزعا جەتىپ وتىر، - دەدى ادىلبەك مۇقاجانوۆ.
ساراپشىنىڭ ايتۋىنشا، ەلىمىزدە ەرەكشە وزىق تەحنولوگيا - پروتوندىق تەراپيا ورتالىعى ىسكە قوسىلدى. بۇل - ت م د ەلدەرى مەن ورتالىق ازياداعى بىردەن-ءبىر بىرەگەي ورتالىق (الەم بويىنشا 25-ورىن). ءداستۇرلى فوتوندىق تەراپيادان ايىرماشىلىعى - پروتوندىق ساۋلە ىسىكتىڭ قاق ورتاسىنا بارىپ اسەر ەتەدى دە، جان-جاعىنداعى ساۋ تىندەر مەن ورگانداردى زاقىمدامايدى. بۇل اسىرەسە بالالارعا، سونداي-اق كوز نەرۆى، وڭەش سەكىلدى ماڭىزدى ورگانداردىڭ ماڭىنداعى ىسىكتەردى ەمدەۋدە اسا ءتيىمدى. بۇل تەراپيانى 2025-جىلدىڭ اياعىنان باستاپ قولدانا باستادىق، قازىردىڭ وزىندە 250-دەن استام ناۋقاس ەم قابىلدادى. بيىلدان باستاپ كىشكەنتاي بالالاردى دا ەمدەي باستادىق، قازىردىڭ وزىندە 5 بالا ەمدەلىپ شىقتى، بىرنەشە بالا ەم الۋ ۇستىندە. پروتوندىق تەراپيانىڭ باستى ارتىقشىلىعى - اسقىنۋ قاۋپى بىرنەشە ەسە تومەن جانە كەيىن بالا وسكەن كەزدە وعان ەشقانداي كەرى اسەرىن تيگىزبەيدى، - دەپ اتاپ ءوتتى ورتالىق باسشىسىنىڭ ورىنباسارى.
24.kz