قاتەرلى ىسىك جايلى بىلمەي قالماس ءۇشىن قاشان جانە قانداي تەكسەرىستەن ءوتۋ كەرەك؟

قاتەرلى ىسىكتى قانشالىقتى ەرتە انىقتاسا، ونى ەمدەۋ مۇمكىندىگى سونشالىقتى جوعارى بولادى. جوسپارلى تۇردە تەكسەرىلىپ تۇرۋ كەرەگى جايلى ءجيى ەستىسەك تە، ادەتتە وعان نەمقۇرايلى قاراپ، ۋاقىت بولە قويمايمىز. راديولوگ دارىگەرلەر قاتەرلى ىسىك تۇرلەرىنىڭ بەلگىلەرىن ۋاقىتىندا انىقتاۋ ءۇشىن قانداي تەكسەرىستەردەن ءوتۋ كەرەگىن ۇسىندى، - دەپ حابارلايدى ماسساگەت ءتىلشىسى «دوكتور پيتەر» پورتالىنا سىلتەمە جاساپ.

وكپە قاتەرلى ىسىگى

ەرەكشە قاۋىپ توبىنا تەمەكى تارتاتىن ادامدار جاتادى. مىناداي ەرەجە بار: وسى زياندى ادەتتى باستاعاننان باستاپ 15 -جىل وتكەننەن كەيىن جىل سايىن وكپەنى ك ت-عا (كومپيۋتەرلىك توموگرافيا) ءتۇسىرىپ تۇرۋ كەرەك. مىسالى، جوعارى سىنىپتا وقىپ جۇرگەندە تەمەكى تارتىپ باستاساڭىز، 30 جاسقا تولعاننان كەيىن جۇيەلى تۇردە تەكسەرىستەن ءوتىپ تۇرۋىڭىز كەرەك. ال مۇنداي زياندى ادەتى جوق ادامدار 40 جاسقا تولعاننان كەيىن جىل سايىن تەكسەرىستەن ءوتىپ تۇرعانى ءجون.

اسقازان قاتەرلى ىسىگى

45 جاسقا تولعاننان سوڭ جىل سايىن گاستروپانەلگە قان تاپسىرىپ تۇرۋ كەرەك. ەگەر دارىگەر كۇماندى وزگەرىستەر بايقاسا، گاستروسكوپياعا جىبەرەدى. ەگەر تۋىسقاندارىڭىزدىڭ اراسىندا اسقازان قاتەرلى ىسىگىمەن اۋىرعان ادامدار بولسا، گاستروسكوپياعا 40 جاستان سوڭ ءتۇسىپ باستاعان ءجون.

ىشەك قاتەرلى ىسىگى

اۋرۋدىڭ بەلگىلەرىن ۋاقىتىندا بايقاۋ ءۇشىن 40 جاستان سوڭ جىل سايىن جاسىرىن قانعا ءناجىس اناليزىن تاپسىرىپ تۇرۋ كەرەك. ەگەر اناليزدەن سوڭ ناتيجە وڭ بولىپ شىقسا، دارىگەر ناۋقاستى كولونوسكوپياعا جىبەرەدى. ەگەر تۋىستارىڭىزدا ىشەك قاتەرلى ىسىگى بولعان بولسا، كولونوسكوپيادان جىل سايىن ءوتۋ كەرەك.

ءسۇت بەزى قاتەرلى ىسىگى

ءسۇت بەزى قاتەرلى ىسىگىنىڭ الدىن الۋ ءۇشىن 20 جاستان باستاپ جىل سايىن گينەكولوگ تەكسەرىسىنەن ءوتۋ كەرەك. سونداي-اق جىل سايىن ءسۇت بەزدەرىن ۋ د ز-عا ءتۇسىرىپ تۇرعان ءجون.

جاتىر مويىنى قاتەرلى ىسىگى

بارلىق ايەل جىنىستىق تولىسقاننان كەيىن جىل سايىن گينەكولوگقا قارالىپ، جاعىندى تاپسىرىپ تۇرۋ كەرەك. سونداي-اق ادام پاپيللوماسى ۆيرۋسىنا تەست تاپسىرۋ قاجەت.

انالىق بەز قاتەرلى ىسىگى

بۇل اۋرۋدىڭ دا بەلگىلىرەىن ۋاقىتىندا انىقتاۋ ءۇشىن جىل سايىن گينەكولوگ مامانىنا قارالىپ تۇرۋ ماڭىزدى. دارىگەر ءسىزدى كىشى جامباستى ۋ د ز-عا تۇسىرۋگە جىبەرۋى مۇمكىن. سونداي-اق 125-CA ماركەرىنە قان تاپسىرۋىڭىزدى سۇراۋى مۇمكىن.

قالقانشا بەز قاتەرلى ىسىگى

ونكولوگيانىڭ بۇل تۇرىنە 35 جاستان باستاپ قارالۋ كەرەك. دارىگەرلەر 5 جىلدا ءبىر رەت قالقانشا بەزدى قولمەن باسىپ تەكسەرۋدى جانە قالقانشا بەز ديسفۋنكتسياسىنا سكرينينگ ءوتۋدى ۇسىنادى. قاجەت بولسا، قوسىمشا ۋدز ءتۇسىرۋدى تالاپ ەتۋى مۇمكىن.

قۋىقاستى بەزى قاتەرلى ىسىگى

بۇل اۋرۋدى ۋاقىتىندا ۇستاپ الۋعا پروستاتا سپەتسيفيكالىق انتيگەنىنە قان اناليزىن تاپسىرۋ جانە كىشى جامباس ورگاندارىن ۋ د ز-عا ءتۇسىرۋ كومەكتەسەدى. تۋىسقاندارىنىڭ اراسىندا وسىنداي قاتەرلى ىسىككە شالدىققان ادام بولسا، تەكسەرىستى 40 جاستا باستاپ، ودان سوڭ جىل سايىن ءوتىپ تۇرۋ كەرەك. ال باسقا ادامدار ونى 45 جاستا باستاسا بولادى.

تەرى قاتەرلى ىسىگى

بۇل وڭاي بايقالاتىن قاتەرلى ىسىك ءتۇرىنىڭ ءبىرى. ەگەر مىنا بەلگىلەردى بايقاساڭىز، دارىگەرگە كورىنۋ كەرەك:

ولشەمى جىلدام ءوسىپ كەلە جاتىرعان جاڭا مەڭ؛

مەڭ نەمەسە قال ءپىشىنىنىڭ، ءتۇسىنىڭ جانە ولشەمىنىڭ وزگەرۋى؛

مەڭنەن نەمەسە قالدان ءىرىڭ شىعۋ؛

جازىلمايتىن جارالار.