قاتارمەن بىرگە جۇزەگە اسىراتىن گاز جوبالارىنىڭ شارتتارى قاشان بەلگىلى بولادى

استانا. KAZINFORM - قاتارلىق ينۆەستورمەن گاز سالاسىنداعى جوبالاردى جۇزەگە اسىرۋ مامىلەسىنىڭ سوڭعى شارتتارى ەكى اي ىشىندە انىقتالادى.

ەنەرگەتيكا مينيسترلىگىندە قاتارلىق Power International Holding UCC Holding كومپانياسىنىڭ قاتىسۋىمەن گاز سالاسىنداعى جوبالاردى ىسكە اسىرۋ بويىنشا جيىن ءوتتى.

مەملەكەت باسشىسىنىڭ 13-14- اقپانداعى قاتارعا مەملەكەتتىك ساپارى اياسىندا QazaqGaz Power International Holding UCC Holding-پەن كەلەسى جوبالاردى بىرلەسىپ جۇزەگە اسىرۋدىڭ نەگىزگى شارتتارى بويىنشا مىندەتتى كەلىسىمدەرگە قول قويدى:

قاشاعان كەن ورنىندا 1 ميلليارد كۇپمەتر قۋاتى بار گاز وڭدەۋ زاۋىتىنىڭ قۇرىلىسى؛

قاشاعان كەن ورنىندا قۋاتى 2,5 ميلليارد كۇپمەتر گاز وڭدەۋ زاۋىتىنىڭ قۇرىلىسى؛

جاڭا ك س-14 كومپرەسسور ستانساسىنىڭ جانە «ك س-14-قوستاناي» ماگيسترالدى گاز قۇبىرىنىڭ قۇرىلىسى؛

«بەينەۋ - بوزوي - شىمكەنت» ماگيسترالدى گاز قۇبىرىنىڭ ەكىنشى جەلىسىنىڭ قۇرىلىسى.

ەستەرىڭىزگە سالا كەتسەك، بۇل كەلىسىمدەر قازاقستاننىڭ گاز سالاسىن دامىتۋعا ىقپال ەتەتىن جوبالاردى جۇزەگە اسىرۋعا باعىتتالعان.

اقتوبە جانە قوستاناي وبلىستارىندا «ك س-14 - قوستاناي» ماگيسترالدى گاز قۇبىرىن سالۋ جوباسىنىڭ ستراتەگيالىق ماڭىزى بار جانە قوستاناي وبلىسىنداعى ەلدى مەكەندەردى دە، ءىرى ينۆەستيتسيالىق جوبالاردى دا گازداندىرۋعا باعىتتالعان.

بەينەۋ-بوزوي-شىمكەنت گاز قۇبىرىنىڭ ەكىنشى جەلىسى - قازاقستاننىڭ وڭتۇستىك جانە ورتالىق ايماقتارىن گازبەن قامتاماسىز ەتەتىن ماڭىزدى گاز ارتەرياسى.

قاشاعاندا گاز وڭدەۋ زاۋىتتارىن سالۋ ەلىمىزدەگى تاۋارلىق گازدىڭ وڭدەۋ قۋاتى مەن رەسۋرستىق بازاسىن ۇلعايتۋعا مۇمكىندىك بەرەدى.