قاتاردا شولگە ءتوزىمدى سۋ ساقتاۋ جوبالارى ىسكە قوسىلماق
دوحا. KAZINFORM - قاتاردا ءشول دالادا سۋ رەسۋرستارىن ساقتاۋ بويىنشا جاڭا كليماتقا ءتوزىمدى باستامالار جۇزەگە اسىرىلماقشى.
Media City ۇيىمىمەن بىرلەسە وتىرىپ، ءشولدى ءارى قۇرعاق كليمات ەسكەرىلىپ، سۋ رەسۋرستارىن ساقتاۋ بويىنشا يننوۆاتسيالىق كليماتقا ءتوزىمدى باستامالار قولعا الىنىپ وتىر، دەپ جازدى Euronews.
ەكى قاتارلىق ەكوتەحنولوگيالىق كومپانيا اسپاننان ىلعال جيناپ، ودان سۋ ءوندىرۋ تەحنولوگياسىن قولدانباقشى: بىرەۋى - ادامداردىڭ ءشولىن قاندىرۋعا ارنالعان، ال ەكىنشىسى - اۋىل شارۋاشىلىعى داقىلدارىن سۋارۋعا ارنالعان سۋ وندىرەدى.
Qatar 365 باعدارلاماسىنىڭ جاڭا شىعارىلىمىندا قاتارداعى تۇراقتى دامۋ باعىتىنداعى باستامالار مەن تاجىريبەلەر تالقىلاندى. باعدارلاما جۇرگىزۋشىسى ادەل حاليم بانگلادەشتىڭ ۋاقىتشا كوشباسشىسى، نوبەل سىيلىعىنىڭ لاۋرەاتى پروفەسسور مۇحاممەد يۋنۋسپەن سۇحباتتاسىپ، عالامشاردى قورعاۋعا باعىتتالعان جاھاندىق ارەكەتتەردىڭ نە سەبەپتى ساتسىزدىككە ۇشىراپ جاتقانىن تالقىلادى.
سونداي-اق باعدارلاما توبى ConocoPhillips كومپانياسىنىڭ عالامدىق سۋ رەسۋرستارىن تۇراقتى دامىتۋ ورتالىعىنا باردى. دجواننا حوەس ەكى ەكوتەحنولوگيالىق كومپانيانى - Skydrops پەن اگروتەحنولوگيالىق ستارتاپ VFarms تى ارالاپ شىقتى. بۇل كومپانيالار جەرگىلىكتى جەردە «اقىلدى» سۋ مەن ازىق-تۇلىك شەشىمدەرىن ۇسىنادى.
ەسكە سالا كەتەيىك، قاتاردىڭ Power International Holding (PIH) كومپانياسى Astana Hub حالىقارالىق تەحنوپاركىنە تىركەلدى. الپاۋىت حولدينگ وزىنە تيەسىلى سيفرلىق شەشىمدەردى استاناداعى ستارتاپ الاڭىندا ىسكە اسىرۋ مۇمكىندىكتەرىن قاراستىرىپ جاتىر.