قاتار ءامىرى ماسكەۋگە كەلدى
استانا. KAZINFORM - قاتار ءامىرى تاميم بەن حاماد ءال تاني رەسەيگە رەسمي ساپارمەن كەلدى، دەپ حابارلايدى Kazinform مەنشىكتى ءتىلشىسى رەسەيدىڭ بۇقارالىق اقپارات قۇرالدارىنا سىلتەمە جاساپ.
ەكى ەل باسشىلارىنىڭ كەزدەسۋى بۇگىنگە جوسپارلانعان.
كرەملدىڭ باسپا ءسوز قىزمەتى بۇعان دەيىن مەملەكەت باسشىلارى ساۋدا-ەكونوميكالىق جانە گۋمانيتارلىق سالالارعا باسا نازار اۋدارا وتىرىپ، ەكىجاقتى ىنتىماقتاستىق ماسەلەلەرىن، سونداي-اق حالىقارالىق كۇن تارتىبىندەگى نەگىزگى تاقىرىپتاردى تالقىلايتىنىن حابارلاعان.
بۇعان دەيىن رەسەي پرەزيدەنتىنىڭ باسپا ءسوز حاتشىسى دميتري پەسكوۆ پرەزيدەنت ۆلاديمير پۋتين مەن قاتار ءامىرى تاميم بەن حاماد ءال-تاني رەسەيگە ساپارى بارىسىندا ۋكراينا مەن تاياۋ شىعىستاعى جاعداي تۋرالى پىكىر الماساتىنىن ايتقان.
قاتار الەمدەگى كوپتەگەن جاعدايلاردى رەتتەۋگە دەگەن ۇمتىلىس بويىنشا ۇلكەن ءارى ماڭىزدى ءرول اتقارادى.
قاتار سىرتقى ىستەر مينيسترلىگىنىڭ باسپا ءسوز حاتشىسى مادجيد ءال-انساري قاتار ۋكرايناداعى قاقتىعىستى شەشۋگە كۇش سالا الاتىن كەز كەلگەن ءرولدى قۇپتايتىنىن ايتتى.
وسىعان دەيىن حاماس بىتىمگەرشىلىك كەلىسسوزىن جالعاستىرۋ ءۇشىن قاتارعا دەلەگاتسيا جىبەرگەنى تۋرالى جازدىق.