قاڭتار ايىندا 134 مىڭعا جۋىق تالاپكەر ۇ ب ت تاپسىردى
استانا. KAZINFORM - قاڭتار ايىندا 134 مىڭعا جۋىق ادام ۇ ب ت تاپسىردى. عىلىم جانە جوعارى ءبىلىم مينيسترلىگىنىڭ مالىمەتىنشە، تالاپكەرلەردىڭ 76,4 پايىزى قازاق تىلىندە، 23,5 پايىزى ورىس تىلىندە، 83 ادام اعىلشىن تىلىندە تەستىلەۋدەن وتكەن.
ۇ ب ت باستالعالى شەكتى بالدى 77,5 پايىزعا جۋىق تالاپكەر جينادى. ورتاشا بال - 69. ەڭ جوعارى بال - 137. جالپى، 72 تالاپكەر 130 دان جوعارى بال جينادى.
تەستكە قاتىسۋشىلاردىڭ باسىم بولىگى «بيولوگيا-حيميا» كومبيناتسيالارىن تاڭداعان، اتاپ ايتقاندا، 18 پايىزى تاپسىردى. ماتەماتيكا، فيزيكا پاندەرىن 17 پايىزى تالاپكەر تاڭداعان. سونداي-اق، توپ-3 قاتارىنا تالاپكەرلەردىڭ 12 پايىزى تاڭداعان «ماتەماتيكا-ينفورماتيكا» كومبيناتسياسى كىردى. ەڭ از تاڭدالعان كومبيناتسيا - «حيميا-فيزيكا»، ونى 149 ادام تاپسىرعان.
2024-جىلعى قاڭتار ۇ ب ت- سىنىڭ قورىتىندىسى بويىنشا تالاپكەرلەر «وقۋ ساۋاتتىلىعى» ءپانىن جوعارى دەڭگەيدە تاپسىردى. ورتاشا ەسەپپەن، سۇراقتاردىڭ 78 پايىزىنا دۇرىس جاۋاپ بەرىلگەن. ال «فيزيكانى» تاپسىرعان تالاپكەرلەردىڭ تەك 33 پايىزى تاپسىرمانى دۇرىس ورىنداعان، ولار ءۇشىن «سالىستىرمالىلىق تەورياسىنىڭ ەلەمەنتتەرى» تاقىرىبى قيىن بولدى. وسىلايشا، ۇبت ناتيجەلەرى بويىنشا ۇلتتىق تەستىلەۋ ورتالىعى تەك ساندار ەمەس، سونىمەن قاتار تاقىرىپتار بويىنشا ەگجەي-تەگجەيلى تالداۋدى دا ۇسىنادى.
«ءبىلىم-عىلىمعا قۇشتار بارشا تالاپكەرلەردى ۇ ب ت- نىڭ اياقتالۋىمەن شىن جۇرەكتەن قۇتتىقتايمىن! قالاعان ماماندىقتارىڭىزدىڭ يەسى بولۋعا تىلەكتەستىگىمدى بىلدىرەمىن. سۇلتانماحمۇت تورايعىروۆ ايتقانداي، قازاقتىڭ كوگىندە كۇن بولىپ، ۇلتقا ايانباي قىزمەت ەتە بەرىڭىزدەر»، - دەدى قر عىلىم جانە جوعارى ءبىلىم ءمينيسترى ساياسات نۇربەك.
ەرەكشە ءبىلىم بەرۋ قاجەتتىلىكتەرى بار وقۋعا تۇسۋشىلەر ءۇشىن قولايلى جاعداي جاساۋدىڭ ناتيجەسىندە قاڭتار ۇ ب ت- سىنا 321 تالاپكەر قاتىسقانىن ايتا كەتكەن ءجون.
ۇ ب ت وتكىزۋ بارىسىندا 157 ەرەجە بۇزۋشىلىق انىقتالعان. ونىڭ ىشىندە 107 تالاپكەر سمارتفون، شپارگالكا جانە باسقا دا تىيىم سالىنعان زاتتاردى الىپ ءوتۋ ارەكەتى سالدارىنان تەست تاپسىرۋ مۇمكىندىگىنەن ايىرىلدى. تەستىلەۋ كەزىندە ەرەجەلەردى بۇزعانى ءۇشىن اۋديتوريادان 50 ادام شىعارىلىپ، ولاردىڭ ناتيجەلەرى جويىلدى. بوگدە تۇلعالار انىقتالعان جوق. تالاپكەرلەر تەستىلەۋ اياقتالعاننان كەيىن 30 مينۋت ىشىندە اپەللياتسياعا بەرە الدى. سەرتيفيكات اپەللياتسيا تۋرالى شەشىم قابىلدانعاننان كەيىن تەستىلەنۋشىنىڭ جەكە كابينەتىندە قولجەتىمدى بولادى.
ايتا كەتسەك، 2024-جىلعى ۇبت اياقتالعاننان كەيىن كۇنتىزبەلىك جىلدىڭ 31- قازانىنا دەيىن تەستىلەۋدىڭ بەينەجازبالارىنا تالداۋ جۇرگىزىلەدى. تىيىم سالىنعان زاتتاردى پايدالانۋ نەمەسە ەرەجەلەردى بۇزۋ فاكتىلەرى انىقتالعان جاعدايدا ءتۇسۋشىنىڭ ۇبت ناتيجەلەرى جويىلادى.
ەستەرىڭىزگە سالا كەتسەك، قاڭتارداعى ۇ ب ت- عا شارتتى تۇردە اقىلى نەگىزدە كۇندىزگى وقۋ نىسانى بويىنشا جوعارى وقۋ ورىندارىنا قابىلدانعان، جازعى ۇبت ناتيجەلەرى بويىنشا شەكتى بالل جيناماعاندار، شىعارماشىلىق ب ب ت- دان باسقا دايىندىق باعىتتارىنا، پەداگوگيكالىق باعىتقا اقىلى نەگىزدە اۋىسقىسى كەلەتىندەر، سونداي-اق مەكتەپ بىتىرەتىن تۇلەكتەر جوعارى وقۋ ورىندارىنا اقىلى نەگىزدە ءتۇسۋ ءۇشىن قاتىستى.