قاسيەتتى تازالىق: مۇحتار اۋەزوۆتىڭ تۋعان جەرىندە سەنبىلىك ءوتتى
سەمەي. KAZINFORM - مەمكەلەكەت كولەمىندە ءوتىپ جاتقان رەسپۋبليكالىق «تازا قازاقستان» ەكولوگيالىق اكسياسىنا اباي اۋدانى حالقى دا بەلسەندى قاتىسىپ جاتىر.
اۋدان كولەمىندە تازالىق جۇمىستارى، اباتتاندىرۋ، كوركەيتۋ شارالارى قاتار جۇرگىزىلىپ جاتىر. كيەلى مەكەنىمىزدەگى تاريحي-مادەني ورىندار، ەسكەرتكىشتەر مەن كەسەنەلەر اۋماعى تازارتىلىپ، اباتتاندىرىلدى.
22-ساۋىردە قاراۋىل اۋىلىندا «اۋىل - ەل بەسىگى» باعدارلاماسى اياسىندا جولداردى اسفالتتاۋ جانە جارىقتاندىرۋ جۇمىستارى باستالدى.
«قاراۋىل اۋىلىندا ماماي كوشەسى مەن توقتامىس كوشەسىن اسفالتتاۋ جۇمىستارى باستالدى. بۇل جۇمىس مامىر ايىنىڭ سوڭىنا دەيىن اياقتالادى دەپ جوسپارلانىپ وتىر. سونىمەن قاتار توقتامىس كوشەسىندە 73 جارىق شامىن ورناتۋدى كوزدەپ وتىرمىز، مامىر ايىنىڭ سوڭىنا دەيىن جۇمىستار اياقتالادى»، - دەيدى قاراۋىل اۋىلدىق وكرۋگىنىڭ اكىمى ەرىك دۇيسەنبەكوۆ.
سونىمەن قاتار مۇحتار اۋەزوۆتىڭ تۋعان جەرىندەگى «ءبورىلى» مۇراجايىنىڭ اۋماعىندا دا سەنبىلىك ءوتتى. قاسقابۇلاق اۋىلدىق وكرۋگىنىڭ تۇرعىندارى، بەلسەندى جاستار مەن مۇراجاي قىزمەتكەرلەرى تازالىق جۇمىستارىن جۇرگىزىپ، اعاشتاردى اكتەدى.
«رەسپۋبليكالىق «تازا قازاقستان» اكسياسى اياسىندا اپتا سايىن ءتۇرلى ءىس-شارالار ۇيىمداستىرىلىپ جاتىر. تاريحي جانە كيەلى ورىندار اباتتاندىرىلىپ، قوقىستان تازارتىلدى. اۋدان تۇرعىندارىنا، اۋقىمدى ىسكە ۇيىمشىلدىقپەن قاتىسقان قوعام بەلسەندىلەرىنە العىسىمدى بىلدىرەمىن. الداعى سەنبىلىكتەردە دە وسىلاي بەرەكە- بىرلىگىمىزدى كورسەتەيىك»، - دەيدى اۋدان تۇرعىنى قۇسمان بەرلەشوۆ.