قاسىم-جومارت توقايەۆ وزبەكستان پرەزيدەنتى شاۆكات ميرزيەيەۆپەن بەيرەسمي كەزدەسۋ وتكىزدى

استانا. KAZINFORM - قاسىم-جومارت توقايەۆ پەن شاۆكات ميرزيەيەۆ قازاقستان مەن وزبەكستان اراسىنداعى ستراتەگيالىق سەرىكتەستىك پەن وداقتاستىقتى ودان ءارى نىعايتۋ ماسەلەلەرىن تالقىلادى.

قازاقستان پرەزيدەنتى يسلام وركەنيەتى مەن ساۋلەت ونەرىنىڭ جاۋھارى سانالاتىن حيۋا قالاسىندا ءوتىپ جاتقان كەزدەسۋدىڭ سيمۆولدىق ءمانى بار ەكەنىنە نازار اۋدارىپ، بارلىق باعىت بويىنشا تابىستى دامىپ كەلە جاتقان ەكىجاقتى ىنتىماقتاستىققا كوڭىلى تولاتىنىن مالىمدەدى.

مەملەكەت باسشىسىنىڭ ايتۋىنشا، ەكى ەل ۇكىمەتتەرى قول جەتكىزىلگەن ۋاعدالاستىقتاردى جۇزەگە اسىرۋ ىسىمەن بەلسەندى اينالىسىپ جاتىر. ءتيىستى «جول كارتالارى» جوسپارلى تۇردە ورىندالىپ، قول قويىلعان كەلىسىمدەر مەن ساۋدا كەلىسىمشارتتارى بويىنشا جۇمىس جۇرگىزىلۋدە. ءوزارا تاۋار اينالىمىنىڭ كورسەتكىشتەرى جامان ەمەس. وتكەن جىلدىڭ قورىتىندىسى بويىنشا ونىڭ كولەمى 4,4 ميلليارد دوللاردى قۇرادى. ونەركاسىپ، ەنەرگەتيكا، كولىك جانە لوگيستيكا، اۋىل شارۋاشىلىعى سالالارىندا بىرلەسكەن جوبالار جۇزەگە اسىرىلىپ جاتىر. بۇگىندە پورتفەلىمىزدە ينۆەستيتسيا كولەمى 2,5 ميلليارد دوللاردان اساتىن 60 بىرلەسكەن جوبا بار. ونىڭ اياسىندا 13 مىڭنان استام جۇمىس ورنى اشىلادى. حالىقارالىق ونەركاسىپ كووپەراتسياسى ورتالىعىن سالۋ جوباسى دا ءساتتى ىلگەرىلەپ كەلەدى.

پرەزيدەنت قازاق- وزبەك تاندەمى ومىرلىك قاجەتتىلىكتەن تۋعانىن جانە بىرگە ءارى جۇمىلا ارەكەت ەتكەندە عانا ەلدەرىمىزدىڭ ورنىقتى دامۋىن قامتاماسىز ەتۋگە بولاتىنىن ايتتى. وسى ورايدا مەملەكەت باسشىسى قازاقستان مەن وزبەكستان اراسىنداعى ستراتەگيالىق سەرىكتەستىك پەن وداقتاستىقتىڭ 2034 -جىلعا دەيىنگى باعدارلاماسىن قابىلداۋ باستاماسىن قولدادى.

كەزدەسۋدە پرەزيدەنتتەر ءوزارا تاۋار اينالىمىن ۇلعايتۋ، ەنەرگەتيكا، كولىك، سۋ شارۋاشىلىعى، IT سالالارىنداعى ىنتىماقتاستىقتى دامىتۋ سياقتى ەكونوميكالىق ىقپالداستىقتىڭ سان الۋان ماسەلەسى جونىندە پىكىر الماستى.

اڭگىمەلەسۋ بارىسىندا مادەني-گۋمانيتارلىق بايلانىستاردى وركەندەتۋ، سونداي-اق قازاقستان مەن وزبەكستاننىڭ بىرەگەي تۋريستىك الەۋەتىن پايدالانۋ مۇمكىندىكتەرىنە ايرىقشا ءمان بەرىلدى.

سونىمەن قاتار قاسىم-جومارت توقايەۆ پەن شاۆكات ميرزيەيەۆ وڭىرلىك كۇن ءتارتىبىن تالقىلاپ، حالىقارالىق قۇرىلىمدار اياسىنداعى ءوزارا ىقپالداستىق ماسەلەلەرىن قاراستىردى.