قاسىم-جومارت توقايەۆ ۆەتنامنىڭ جاڭادان سايلانعان پرەزيدەنتىن قۇتتىقتادى
استانا. KAZINFORM - قاسىم-جومارت توقايەۆ تو لامعا ۆەتنام سوتسياليستىك رەسپۋبليكاسىنىڭ پرەزيدەنتى بولىپ سايلانۋىنا وراي قۇتتىقتاۋ جەدەلحاتىن جولدادى، دەپ حابارلايدى اقوردانىڭ باسپا ءسوز قىزمەتى.
مەملەكەت باسشىسى ۆەتنام پرەزيدەنتىنىڭ الداعى بارلىق باستاماسىنا تابىس، ال دوستاس ۆەتنام حالقىنا باق-بەرەكە تىلەدى.
«ءسىز وسى لاۋازىمدا قىزمەت ەتكەن كەزەڭدە عاجاپ ەلىڭىز ودان ءارى گۇلدەنىپ، ۇيلەسىمدى جانە ورنىقتى قوعام قۇرۋ جولىندا تۇراقتى دامي بەرەتىنىنە سەنىمدىمىن. قازاقستان مەن ۆەتنامدى ءوزارا سەنىم مەن ورتاق مۇددەگە نەگىزدەلگەن تىعىز قارىم- قاتىناستار بايلانىستىرادى. ەلدەرىمىزدىڭ مۇددەسى جولىنداعى كوپقىرلى ىقپالداستىقتى وركەندەتۋ ءۇشىن جاڭا مۇمكىندىكتەردى سىزبەن بىرلەسىپ پايدالانۋعا دايىنمىن»، - دەپ جازىلعان جەدەلحاتتا.
وسىعان دەيىن ۆەتنامنىڭ ۇلتتىق جينالىسى (ءبىر پالاتالى پارلامەنت) سارسەنبى كۇنى ۆەتنام كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى تو لامدى ەلدىڭ جاڭا پرەزيدەنتى ەتىپ سايلانعانىن جازعان ەدىك.