قاسىم-جومارت توقايەۆ پرەمەر-ءمينيستردىڭ ءبىرىنشى ورىنباسارى رومان سكلياردى قابىلدادى

استانا. KAZINFORM - مەملەكەت باسشىسى قاسىم-جومارت توقايەۆ پرەمەر-ءمينيستردىڭ ءبىرىنشى ورىنباسارى رومان سكلياردى قابىلدادى. بۇل تۋرالى اقوردانىڭ باسپا ءسوز قىزمەتى ءمالىم ەتتى.

پرەزيدەنتكە يندۋستريالىق جوبالاردى جۇزەگە اسىرۋ جانە وتاندىق تاۋار وندىرۋشىلەردى قولداۋ باعىتىندا اتقارىلىپ جاتقان جۇمىستار تۋرالى باياندالدى. رومان سكلياردىڭ ايتۋىنشا، ءبىرىنشى جارتىجىلدىقتا وندەۋ ونەركاسىبى 105,1 پايىزعا، ماشينا جاساۋ سالاسى 9,4 پايىزعا، ال تاۋ-كەن جانە مەتاللۋرگيا كەشەنى 8,3 پايىزعا وسكەن.

«سونىمەن قاتار مەملەكەت باسشىسىنا مۇناي جانە گاز قۇبىرلارىن سالۋمەن، گاز وڭدەۋ زاۋىتتارى مەن مۇناي حيمياسى ءوندىرىسىن ىسكە قوسۋمەن بايلانىستى جوبالاردىڭ ورىندالۋ بارىسى تانىستىرىلدى. جىل باسىنان بەرى 44,7 ميلليون توننا مۇناي مەن گاز كوندەنساتى، سونداي-اق 30 ميلليارد تەكشە مەتر گاز وندىرىلگەن. وسى جىلدىڭ سوڭىنا دەيىن 128 ەلدى مەكەنگە گاز قۇبىرى جۇرگىزىلىپ، كوگىلدىر وتىنمەن قامتاماسىز ەتۋ دەڭگەيى 61,8 پايىزعا جەتەدى»، - دەلىنگەن حابارلامادا.

بۇدان بولەك كولىك جانە ەنەرگەتيكا سالالارىنداعى جاڭا ينفراقۇرىلىمدىق جوبالار جونىندە باياندالدى.

رومان سكليار پرەزيدەنتكە جىلىتۋ ماۋسىمىنا دايىندىق بارىسى جونىندە مالىمەت بەردى. قازىرگى كەزدە 309 شاقىرىم جىلۋ جەلىسىن رەكونسترۋكتسيالاۋ جانە كۇردەلى جوندەۋ جۇمىستارى جۇرگىزىلىپ جاتىر. بۇعان شامامەن 154 ميلليارد تەڭگە جۇمسالادى. سونىمەن قاتار بيىل جالپى سوماسى 327 ميلليارد تەڭگەگە 10 ەنەرگيا بلوگىن، 55 قازاندىقتى جانە 45 تۋربينانى كۇردەلى جوندەۋدەن وتكىزۋ جوسپارلانعان.

قاسىم-جومارت توقايەۆقا ينۆەستيتسيا تارتۋ جونىندەگى كەڭەستىڭ قىزمەتى، اتاپ ايتقاندا شەتەلدىك سەرىكتەستەرمەن بىرگە ىسكە اسىرىلىپ جاتقان ءىرى ينۆەستيتسيالىق جوبالار جونىندە ايتىلدى. ولاردىڭ ءبىرقاتارىنا قاتىستى ۋاعدالاستىققا مەملەكەت باسشىسىنىڭ شەتەلدەرگە ساپارى كەزىندە قول جەتكىزىلگەن.

كەڭەس قىزمەتىن قايتا قۇرىلىمداعان ساتتەن باستاپ جالپى سوماسى 40 ميلليارد دوللارعا جۋىق 77 ينۆەستيسيالىق جوبانىڭ تۇيتكىلدى ماسەلەلەرى شەشىمىن تاپتى. بۇل رەتتە ماشينا جاساۋ، تاماق جانە حيميا ونەركاسىبى، تاۋ-كەن، مەتاللۋرۋگيا كەشەنى، ەنەرگەتيكا، جەر قويناۋىن پايدالانۋ سالالارىنداعى قوسىلعان قۇنى جوعارى جوبالارعا ايرىقشا ءمان بەرىلىپ وتىر.

پرەزيدەنت قابىلدانىپ جاتقان شارالاردىڭ ماڭىزدى ەكەنىنە نازار اۋدارىپ، اتالعان باعىتتار بويىنشا جۇمىستى ودان ءارى جالعاستىرۋدى تاپسىردى.