قاسىم-جومارت توقايەۆ رەجەپ تايپ ەردوعانعا كوڭىل ايتۋ جەدەلحاتىن جولدادى
08:43, 24 - قازان 2024
استانا. KAZINFORM - مەملەكەت باسشىسى انكارا قالاسىنىڭ ماڭىنداعى TUSAŞ اەروعارىش كورپوراتسياسىنىڭ عيماراتىنا جاسالعان لاڭكەستىك شابۋىل سالدارىنان بىرنەشە ادامنىڭ قازا تابۋىنا بايلانىستى تۇركيا پرەزيدەنتى رەجەپ تايپ ەردوعانعا كوڭىل ايتتى.
بۇل تۋرالى اقوردانىڭ باسپا ءسوز قىزمەتى حابارلادى.
- سۋىت حاباردى تەرەڭ كۇيزەلىسپەن قابىلدادىم. قازاقستان بەيبىت تۇرعىندارعا قارسى قاستاندىق ارەكەتتى قاتاڭ ايىپتايدى. وسىنداي اۋىر ساتتە سىزگە جانە بارشا تۇرىك حالقىنا، سونداي-اق قايتىس بولعان ازاماتتاردىڭ جاقىن تۋىستارىنا قايعىرىپ كوڭىل ايتامىن. مارقۇمداردىڭ جانى جانناتتا بولسىن. زارداپ شەككەندەردىڭ تەزىرەك ساۋىعىپ كەتۋىنە تىلەكتەستىك بىلدىرەمىن، - دەپ جازىلعان جەدەلحاتتا.
وسىعان دەيىن تۇركيادا تەراكت بولعانىن حابارلادىق.