قاسىم- جومارت توقايەۆ: قازاقستان سانكسيالىق تەكەتىرەستى كەرى ناتيجە دەپ سانايدى

مەملەكەت باسشىسى قاسىم- جومارت توقايەۆ گەرمانياعا رەسمي ساپارى بارىسىندا قازاقپاراتتىڭ بەرليندەگى مەنشىكتى تىلشىسىنە قازىرگى ساياسي جاعدايلارعا قاتىستى ەكسكليۋزيۆتى پىكىر ءبىلدىردى.

- كەيبىر رەسەيلىك باق پەن ساياسي قايراتكەرلەر گەرمانياعا رەسمي ساپارىڭىز بارىسىندا بەرليندە وتكەن باسپا ءسوز ءماسليحاتىنداعى مالىمدەمەلەرىڭىزگە سىن ايتتى. ولار قازاقستان رەسەيمەن ىنتىماقتاستىقتان الشاقتاپ، باتىسپەن جاقىن بايلانىس ورناتىپ جاتىر دەپ وتىر. مۇنداي ايىپتاۋعا نە ايتار ەدىڭىز؟

- قازاقستان «انتيرەسەيلىك» ەمەس، ءبىز الەمدە ەڭ ۇزىن شەكارا بىرىكتىرىپ وتىرعان رەسەيمەن جان- جاقتى ىنتىماقتاستىق باعىتىن بەرىك ۇستانىپ كەلەمىز. سول باسپا ءسوز ءماسليحاتىندا ايتقانىمداي، بىزدە ءارتۇرلى سالالاردا، سونىڭ ىشىندە ساۋدا جانە گۋمانيتارلىق بايلانىستارداعى ىنتىماقتاستىقتىڭ ەجەلدەن قالىپتاسقان ءداستۇرى بار. سانكسيالارعا كەلەتىن بولساق، ب ۇ ۇ باس اسسامبلەياسىنىڭ جاقىندا وتكەن سەسسياسىندا جانە باسقا دا سويلەگەن سوزىمدە سانكسيالىق تەكەتىرەس جاھاندىق داعدارىستىڭ شيەلەنىسۋى جاعدايىندا ەروزياعا ۇشىراعان حالىقارالىق قاتىناستاردى جاقسارتۋ تۇرعىسىنان مۇلدەم كەرى ناتيجە بەرەتىنىن اتاپ ءوتتىم.

قازاقستاندا سانكسيالىق شەكتەۋلەرگە جاتاتىن تاۋارلار جوق. قازاقستان سونداي- اق رەسەيگە پاراللەل دەپ اتالاتىن يمپورتقا قاتىسپايدى. ءداستۇرلى تاۋارلار ساۋداسىنا كەلەر بولساق، ول ءوسىپ، وتكەن جىلى قازاقستان - رەسەي تاۋار اينالىمىنىڭ كولەمى 25 ميلليارد دوللارعا جەتتى.

جاقىندا استانادا «يننوپروم» كورمەسى ءساتتى ءوتتى. وعان پرەمەر- مينيستر ميحايل ميشۋستين باستاعان رەسەيلىك دەلەگاتسيا كەلدى. بۇل رەتتە قازاقستان سانكسيالىق شەكتەۋلەردى ەسكەرۋگە ءماجبۇر جانە بۇل ماسەلە بويىنشا ءتيىستى حالىقارالىق ۇيىمدارمەن بايلانىستا.

مۇمكىندىكتى پايدالانا وتىرىپ، مەن ديپلوماتتاردى رەسەي مەن ۋكراينا اراسىنداعى بەيبىتشىلىك تۋرالى كەلىسسوزدەر ءۇشىن ءوزارا قولايلى نەگىز تابۋعا نازار اۋدارتقىم كەلەدى. بۇل وتە ماڭىزدى. ويتكەنى الەم ادامزاتتىڭ كوپشىلىگى ءۇشىن سالدارى اپاتتى بولاتىن جانە ولىمگە اكەلەتىن قاقتىعىستىڭ قاۋىپتى نۇكتەسىنە جاقىندادى.

اۆتور

زارينا تۋعانبايەۆا