قاسىم-جومارت توقايەۆ Qarmet كرەاتيۆتى تەحنولوگيالار ورتالىعىن ارالادى
قاراعاندى. KAZINFORM - مەملەكەت باسشىسى Qarmet كرەاتيۆتى تەحنولوگيالار ورتالىعىن ارالاپ كوردى. اتالعان ورتالىق بۇگىندە مەتاللۋرگتەر قالاسىنىڭ بەلسەندى ءارى شىعارماشىل جاستارىنىڭ باسىن قوساتىن ورىنعا اينالعان.
پرەزيدەنتكە «Qarmet» اكسيونەرلىك قوعامىنىڭ پروفيلدىك ەمەس اكتيۆتەردى باسقارۋ جونىندەگى ديرەكتورى الماس سيرانوۆ ورتالىقتا روبوتتى تەحنيكا، اۆتومودەلدەۋ، ۇشقىشسىز باسقارىلاتىن دروندار سەكسيالارى، باعدارلامالاۋ، بلوگەرلەر، جۋرناليستيكا، دوكۋمەنتاليستيكا مەكتەپتەرى، پودكاست ستۋدياسى جانە باسقا دا شىعارماشىلىق باعىتتاعى ۇيىرمەلەر اشىلعانىن جەتكىزدى.
ونىڭ ايتۋىنشا، ورتالىق تەك مەتاللۋرگيالىق كومبيناتتىڭ عانا ەمەس، تەمىرتاۋ قالاسىنىڭ كورنەكتى نىسانىنا اينالادى. مۇندا جاستار كاسىبي باعدار الىپ، وزدەرىنىڭ ينجەنەرلىك داعدىلارىن شىڭدايدى.
پرەزيدەنت كاسىپورىن جۇمىسشىلارىمەن جانە ارداگەرلەرىمەن، سونداي-اق كاسىپوداق وكىلدەرىمەن اڭگىمەلەسۋ بارىسىندا ەڭبەك ادامى ەڭ جوعارى قۇرمەتكە لايىق ەكەنىن اتاپ ءوتتى. بۇل رەتتە مەملەكەت تاراپىنان ولاردىڭ ءال-اۋقاتىن جاقسارتۋ ءۇشىن بارلىق جاعداي جاسالىپ جاتقانىن جەتكىزدى.
ەسكە سالا كەتەيىك، بۇعان دەيىن مەملەكەت باسشىسى قاسىم-جومارت توقايەۆتىڭ قاراعاندى وبلىسىنا جۇمىس ساپارىمەن كەلگەنىن جازعان ەدىك. سونداي-اق پرەزيدەنت Qarmet مەتاللۋرگيالىق كومبيناتىنا باردى.
اۆتور
ابىلايحان جۇماشيەۆ