قاسىم-جومارت توقايەۆ پەن گۋربانگۋلى بەردىمۇحامەدوۆ اشحابادتاعى اباي ەسكەرتكىشىن سالتاناتتى تۇردە اشتى
اشحاباد. KAZINFORM - قازاقستان پرەزيدەنتى مەن تۇرىكمەنستان حالك ماسلاحاتىنىڭ ءتوراعاسى اشحاباد تورىندە ۇلتىمىزدىڭ ۇلى ويشىلى اباي قۇنانباي ۇلىنا ارنالعان ەسكەرتكىشتىڭ اشىلۋ راسىمىنە قاتىستى. بۇل تۋرالى اقوردانىڭ باسپا ءسوز قىزمەتى ءمالىم ەتتى.
ەڭ الدىمەن، قاسىم-جومارت توقايەۆ گۋربانگۋلى بەردىمۇحامەدوۆ پەن تۇرىكمەن حالقىنا ماقتىمق ۇلى پىراعىنىڭ 300 جىلدىق مەرەيتويىنا وراي ارنايى شىعارىلعان مەدالمەن ماراپاتتاعانى ءۇشىن العىس ايتتى. سونىمەن قاتار مۇنى ەكى ەل اراسىنداعى ءوزارا سىي-قۇرمەت پەن دوستىقتىڭ بەلگىسى رەتىندە قابىلدايتىنىن جەتكىزدى.
مەملەكەت باسشىسى سالتاناتتى جيىندا سويلەگەن سوزىندە بۇل ەسكەرتكىشتىڭ اشىلۋىن تۇرىكمەن باۋىرلاردىڭ قازاق حالقىنا ايرىقشا قۇرمەتىنىڭ كورىنىسى دەپ سانايتىنىن اتاپ ءوتتى.
- اباي - الەمدىك اۋقىمداعى الىپ تۇلعا. ونىڭ شىعارمالارى بۇكىل ادامزاتتىڭ اسىل مۇراسىنا اينالدى. جەر جۇزىندەگى كوپتەگەن قالادا حاكىم ابايدىڭ ەسكەرتكىشى بار. ۇلى اقىن سانالى عۇمىرىن اعارتۋ ىسىنە ارنادى. اباي «تالاپ قىل ارتىق بىلۋگە» دەپ، ونەر-ءبىلىم فيلوسوفياسىن كەڭىنەن ناسيحاتتادى. ول تەڭدەسسىز تۋىندىلارى ارقىلى مىزعىماس قۇندىلىقتاردى دارىپتەدى. جۇرتتى وتانشىلدىققا، ءبىلىمپازدىققا، ەڭبەكقورلىققا باۋلىدى. جاقسىلىق پەن پاراساتتىلىققا ۇندەدى. اشحابادتا اباي ەسكەرتكىشىنىڭ اشىلۋى - باۋىرلاستىعىمىزدى نىعايتا تۇسەتىن بىرەگەي باستاما، - دەدى قاسىم-جومارت توقايەۆ.
پرەزيدەنت بيىل استانادا تۇرىكمەن حالقىنىڭ ۇلى ويشىلى ماقتىمق ۇلى پىراعىنىڭ ەسكەرتكىشى اشىلعانىن ەسكە سالىپ، قازاق ەلى تۇركى جۇرتىنا ورتاق تۇلعانىڭ شىعارماشىلىعىنا زور قۇرمەتپەن قارايتىنىن جەتكىزدى.
- شىن مانىندە، اباي مەن ماقتىمق ۇلى ەڭبەكتەرى - تۇركى دۇنيەسىنىڭ قۇندى قازىناسى. ونى ساقتاپ، كەيىنگى ۇرپاققا قالدىرۋ - بارشامىزعا ورتاق مىندەت. ۇلى اقىندارىمىزدىڭ پوەزياسىندا ءوزارا ساباقتاستىق مىسالدارى كوپ. ءبىز - ءتۇبى ءبىر، تاريحى ورتاق، ءتىلى مەن مادەنيەتى ۇقساس حالىقتارمىز. وسى باۋىرلاستىق ەلدەرىمىزدىڭ قارىم- قاتىناسىنا ارقاۋ بولىپ وتىر. قازىر بۇل بايلانىس ستراتەگيالىق سەرىكتەستىك رۋحىندا دامىپ كەلە جاتىر. تۇرىكمەنستانعا بۇگىنگى رەسمي ساپارىم - سونىڭ ايقىن دالەلى. ابايدىڭ ەسكەرتكىشى قازاق-تۇرىكمەن دوستىعىنىڭ سيمۆولىنا اينالادى دەپ سەنەمىن، - دەدى پرەزيدەنت.
تۇرىكمەنستان حالك ماسلاحاتىنىڭ ءتوراعاسى باۋىرلاس حالىقتاردىڭ تاريحي جانە مادەني ومىرىندە جارقىن ءىز قالدىرعان بەلگىلى تۇلعالار، ويشىلدار مەن اقىندار مۇراسىن ساقتاۋدىڭ جانە ونى بولاشاق ۇرپاققا جەتكىزۋدىڭ ءمانى زور ەكەنىنە توقتالدى.
- بۇگىن ءبىز استانامىز اشحابادتىڭ تاماشا مۇيىسىندە ورنالاسقان عاجاپ ساياباقتا باۋىرلاس قازاق حالقىنىڭ ۇلى اقىنى، كورنەكتى مادەنيەت جانە ونەر قايراتكەرى اباي قۇنانباي ۇلىنىڭ ەسكەرتكىشىن اشۋ راسىمىندە باس قوسىپ وتىرمىز. بارشاڭىزدى وسى سالتاناتتى ساتپەن شىن جۇرەكتەن قۇتتىقتايمىن! تۇرىكمەن جانە قازاق حالىقتارى الەمنىڭ مادەني- رۋحاني قازىناسىنا ۇلكەن ۇلەس قوستى. سوعان سايكەس، بۇل مادەني مۇرانى تىڭعىلىقتى زەرتتەۋ، ونى كەڭىنەن ناسيحاتتاۋ جانە وسى سالاداعى حالىقارالىق ارىپتەستىكتى دامىتۋ اسا ماڭىزدى مىندەت بولىپ سانالادى، - دەدى گۋربانگۋلى بەردىمۇحامەدوۆ.
ءىس-شاراعا تۇرىكمەنستاننىڭ زيالى قاۋىم وكىلدەرى جانە قازاقستاننىڭ رەسمي دەلەگاتسيا مۇشەلەرى قاتىستى.
سالتاناتتى جيىندا «كالكىنىش» ءبي توبى قوس حالىقتىڭ اراسىنداعى مادەني بايلانىستاردىڭ تەرەڭ تامىرىن تانىتاتىن «تۇرىكمەن- قازاق دوستىعى» اتتى كومپوزيتسياسىن ۇسىندى.
اۆتور
باقىتگۇل اباي قىزى