قاسىم-جومارت توقايەۆ مەملەكەتتىك قىزمەتكەرلەرگە سىياقى بەرۋگە قاتىستى پىكىر ءبىلدىردى

استانا. KAZINFORM - اۋىل شارۋاشىلىعى قىزمەتكەرلەرىنىڭ ءبىرىنشى فورۋمىندا مەملەكەت باسشىسى قاسىم- جومارت توقايەۆ مەملەكەتتىك قىزمەتكەرلەرگە سىياقى بەرۋگە قاتىستى پىكىر ءبىلدىردى.

«سونىمەن قاتار جاقىندا مەملەكەتتىك قىزمەتكەرلەرگە سىياقى بەرۋگە تىيىم سالىناتىندىعى تۋرالى ماسەلە قىزۋ تالقىلاندى. قارجى مينيسترلىگى وعان تىيىم سالۋعا نەگىز جوق ەكەنىن ءتۇسىندىرىپ بەردى. مەملەكەتتىك قىزمەتشىلەر - ەلدەگى جۇيەلى وزگەرىستەردىڭ باستى جولباسشىلارى. ولاردىڭ تابىسى ايتارلىقتاي كوپ ەمەس. كەي كەزدەرى تۇنىمەن جۇمىستا وتىرادى. مەملەكەتتىك قىزمەتشىلەردىڭ دە وتباسى مەن مىندەتى، قالا بەردى قاراپايىم ادام رەتىندەگى قالاۋى مەن جوسپارى بار»، - دەدى پرەزيدەنت.

قاسىم-جومارت توقايەۆ مەملەكەتتىك ورگانداردىڭ تيىمدىلىگىن ارتتىرۋ ءۇشىن قاتارداعى قىزمەتكەرلەردىڭ ەڭبەكاقىسى باسەكەگە قابىلەتتى بولۋى كەرەك دەپ ويلايتىندىعىن اشىق ايتتى.

«سىياقى اتالعان ماسەلەنى شەشۋگە مۇمكىندىك بەرەدى. باسقا جولمەن مەملەكەتتىك قىزمەتكە بىلىكتى مامانداردى تارتىپ، كادر تۇراقسىزدىعى پروبلەماسىن شەشۋ قيىن»، - دەدى مەملەكەت باسشىسى.

«جىلىتۋ ماۋسىمىن ءمىنسىز وتكىزۋ - وزەكتى ماسەلەلەردىڭ ءبىرى. بۇل مەنىڭ ەرەكشە باقىلاۋىمدا. ساران قالاسى اۋا- رايىنىڭ سۋىتۋىنا دايىن بولماي شىقتى. مۇنداعى ۇيلەر جاقىندا عانا جىلۋ جۇيەسىنە قوسىلعان ەدى. كەمشىلىككە جول بەرگەن جاۋاپتى تۇلعالار ءتيىستى جازاسىن الدى. بۇل بارلىق اكىمگە ساباق بولۋى كەرەك. جىلىتۋ ماۋسىمىنا دايىن بولماۋ باسشىلاردىڭ ءوز قىزمەتىنە ساي كەلمەيتىنىن كورسەتەدى. دەگەنمەن بيىل ەل اۋماعىندا ەنەرگيا كوزدەرى مەن جىلۋمەن جابدىقتاۋ جەلىلەرىن جوندەۋ بويىنشا اۋقىمدى جۇمىس جۇرگىزىلدى. قويمالارداعى وتىن قورى جەتكىلىكتى. ءبىراق قامسىز وتىرۋعا بولمايدى. جاعدايدى ۇدايى باقىلاۋدا ۇستاۋ كەرەك»، - دەدى قاسىم-جومار توقايەۆ.

پرەزيدەنت مەملەكەتتىك باسقارۋ جۇيەسىنىڭ الدىندا قازىر ناقتى مىندەتتەر مەن ەداۋىر سىن-قاتەر تۇرعانىن باسا ايتتى.

«وقىس وقيعالارعا دەر كەزىندە ءۇن قاتۋ، جاعدايدى ۋشىقتىرماۋ، ءدال بولجام جاساۋ، قوعامنىڭ تالاپ-تىلەگىنە قۇلاق اسۋ ماڭىزدى. بارلىق مەملەكەتتىك ورگان، كوممۋنالدىق جانە باسقا دا قىزمەتتەر ۇيلەسىمدى ارەكەت ەتۋى كەرەك. الايدا، كۇندەلىكتى شارۋامەن اينالىسىپ ءجۇرىپ، ستراتەگيالىق ماقساتتاردى ۇمىت قالدىرماۋ قاجەت. العا قاراي ۇمتىلىپ، كەڭ اۋقىمدى پەرسپەكتيۆانى باعىت ەتكەنىمىز ءجون. پروبلەمانىڭ ۋاقىتشا شەشىمىن ىزدەمەي، ونىڭ تۇپكى سەبەپتەرىن جويۋىمىز قاجەت»، - دەدى پرەزيدەنت.

قاسىم-جومارت توقايەۆ جولداۋىندا بيۋدجەت قارجىسىن ءتيىمدى پايدالانۋعا باعىتتالعان شارالار قابىلداۋدى تاپسىرعانىن اتاپ ءوتتى.

«البەتتە، بيۋدجەت ساياساتىندا پراگماتيزم قاعيداتى باستى ورىندا بولۋى كەرەك. ءبىراق الەۋمەتتىك شىعىنداردان، بيۋدجەتتىك مەكەمە قىزمەتكەرلەرىنىڭ جالاقىسىنان، زەينەتاقى مەن جاردەماقىدان ۇنەمدەۋگە بولمايدى. بۇل - مەنىڭ بەرىك ۇستانىمىم. ازاماتتاردىڭ ءال-اۋقاتىن ارتتىرۋ جونىندەگى باسىم مىندەتتى ۇدايى نازاردا ۇستاعان دۇرىس. زەينەتاقى جۇيەسىنىڭ الەۋەتىن ارتتىرۋدىڭ، ونى جەتىلدىرۋدىڭ تاسىلدەرىن تابۋ كەرەك. دەنى ساۋ، قاجىر- قايراتى مول زەينەتكەرلەردىڭ ەل دامۋىنا قوسىپ جۇرگەن ۇلەسىن ىنتالاندىرۋ ماڭىزدى. ورتاشا ءومىر ءسۇرۋ جاسىن بىرتىندەپ ۇلعايتۋ - مەملەكەتتىڭ الەۋمەتتىك ساياساتىنىڭ باستى جەتىستىكتەرىنىڭ ءبىرى. بۇل كورسەتكىش قازىردىڭ وزىندە 75 جاستان استى. وسى تۇرعىدان العاندا اتالعان ماسەلە وزەكتى بولا تۇسەدى»، - دەدى قاسىم-جومارت توقايەۆ.

اۆتور

مارلان جيەمباي