قاسىم- جومارت توقايەۆ Mercedes-Benz Group باسشىسىمەن كەزدەستى

مەملەكەت باسشىسى قاسىم- جومارت توقايەۆ Mercedes-Benz Group كومپانياسىنىڭ باسقارما ءتوراعاسى ولا كاللەنيۋسپەن كەزدەستى، دەپ حابارلايدى قازاقپارات.

«Mercedes-Benz ماركاسى جوعارى ساپاسىمەن الەمگە تانىمال. ول ءبىزدىڭ ەلىمىزدە ەرەكشە باعالانادى. كومپانيا گەرمانياداعى، قىتايداعى جانە ماجارستانداعى زاۋىتتارىن جاڭعىرتۋعا اۋقىمدى ينۆەستيتسيا قۇيعان. اۆتوموبيل قۇراستىرۋ ونەركاسىبى قازاقستاندا دا بەلسەندى دامىپ كەلەدى. قازىرگى تاڭدا ەلىمىزدە الەمگە تانىمال General Electric, General Motors, Chevrolet برەندتەرى، سونداي- اق كورەيلىك جانە قىتايلىق كومپانيالار تابىستى جۇمىس ىستەپ جاتىر»، - دەدى قاسىم- جومارت توقايەۆ.

پرەزيدەنت بىلتىر قازاقستاندا وندىرىلگەن اۆتوموبيلدەر سانى 100 مىڭنان اسىپ، 28 پايىزعا ۇلعايعانىن اتاپ ءوتتى. ەكسپورت ەكى ەسە ءوسىپ، 3,8 ميلليارد دوللارعا جەتكەن.

«ءبىز ءسىزدىڭ كومپانيانىڭ قازاقستان نارىعىنا ۇزاق جىلدان بەرى قىزمەت ەتىپ كەلە جاتقانىن وڭ باعالايمىز. ەگەر الداعى ۋاقىتتاعى سەرىكتەستىك تۋرالى قانداي دا ءبىر ۇسىنىستار نەمەسە ماسەلەلەر بولسا، تىڭداۋعا دايىنبىز. بۇگىنگى كەزدەسۋگە ۇكىمەتتىڭ ءتۇرلى سالاعا جاۋاپ بەرەتىن وكىلدەرى دە قاتىسىپ وتىر»، - دەدى مەملەكەت باسشىسى.

ءوز كەزەگىندە ولا كاللەنيۋس قازاقستان پرەزيدەنتىنە Berlin Global Dialogue فورۋمىنا ارنايى كەلگەنى ءۇشىن العىس ءبىلدىردى.

«راحمەت، پرەزيدەنت مىرزا. Mercedes-Benz وكىلدەرىمەن كەزدەسۋگە ۋاقىت بولگەنىڭىز ءۇشىن، سونداي- اق Berlin Global Dialogue فورۋمىنا قاتىسۋ ءۇشىن ارنايى كەلگەنىڭىز ءۇشىن العىس ايتامىن. بۇل الەمنىڭ تۇكپىر- تۇكپىرىنەن جينالعان بيزنەسمەندەر مەن ساياساتكەرلەردىڭ باسىن قوسىپ، الەمدەگى مول مۇمكىندىكتەردى تالقىلايتىن جاڭا الاڭ. ەلىمىزدىڭ جوعارى الەۋەتىن ەسكەرە وتىرىپ، قازاقستاننىڭ كەلەشەگى زور نارىق ەكەنىنە ەشقانداي ءشۇبامىز جوق. قازاقستان تاراپىمەن بۇعان دەيىن باس ديستريبيۋتورلىق كەلىسىم جاسادىق»، - دەدى و. كاللەنيۋس.

اۆتور

ايجان سەرىكجان قىزى