قاسىم-جومارت توقايەۆ كونگو جاستارىنا قازاقستاننىڭ جوعارى وقۋ ورىندارىندا ءبىلىم الۋدى ۇسىندى
استانا. KAZINFORM - استانا مەن براززاۆيل اراسىندا مادەني-گۋمانيتارلىق بايلانىس ورناتۋ وتە ماڭىزدى.
بۇل تۋرالى اقوردادا كونگو رەسپۋبليكاسىنىڭ پرەزيدەنتى دەني ساسسۋ-نگەسسومەن كەلىسسوزدەردەن كەيىنگى ب ا ق وكىلدەرىنە ارنالعان بريفينگتە مەملەكەت باسشىسى قاسىم-جومارت توقايەۆ ايتتى.
«استانا مەن براززاۆيل اراسىندا مادەني-گۋمانيتارلىق بايلانىس ورناتۋ وتە ماڭىزدى. مەن كونگو جاستارىنا قازاقستاننىڭ جوعارى وقۋ ورىندارىندا ءبىلىم الۋدى ۇسىندىم. بۇل قادام ىنتىماقتاستىقتى نىعاياتا تۇسەرى ءسوزسىز»، - دەدى قاسىم- جومارت توقايەۆ.
پرەزيدەنت ەكى ەل حالىقارالىق جانە ايماقتىق دەڭگەيدە تىعىز قاتىناس ورناتقانىن باسا ايتتى.
«كوپتەگەن وزەكتى ماسەلەگە قاتىستى ۇستانىمدارىمىز ورتاق. جاھاندىق جانە وڭىرلىك قۇرىلىمدار اياسىندا ىقپالداستىعىمىز دامىپ كەلەدى. قازىرگى گەوساياسي جاعدايدا ب ۇ ۇ جانە افريكا وداعى اياسىندا ءوزارا قولداۋ كورسەتۋ جانە كونسۋلتاتسيالار وتكىزۋ اسا ماڭىزدى. سونىمەن قاتار ءبىز جاھاندىق جانە ايماقتىق قاۋىپسىزدىككە قاتىستى پىكىر الماستىق. قازىر ەڭ وزەكتى ماسەلەنىڭ ءبىرى - كليماتتىڭ وزگەرۋى. ءبىز وسى قاتەرمەن بىرگە كۇرەسىپ، تىعىز جۇمىس ىستەۋگە كەلىستىك»، - دەدى مەملەكەت باسشىسى.
قاسىم-جومارت توقايەۆ كونگو باسشىسىنىڭ ورمان ءوسىرۋدىڭ جانە ورماندى قالپىنا كەلتىرۋدىڭ جاھاندىق 10 جىلدىعى جاريالاۋ تۋرالى باستاماسىن قولدايتىندىعىن ايتتى.
«شىن مانىندە ساسسۋ-نگەسسو مىرزانىڭ ەلىمىزگە ساپارى تاريحي ماڭىزعا يە. بۇل ساپار قازاقستان مەن كونگونىڭ قارىم-قاتىناستارىنا تىڭ سەرپىن بەرەدى دەپ سانايمىن. سونىمەن قاتار ورتالىق ازيا مەن افريكا اراسىنداعى ىنتىماقتاستىقتى نىعايتا تۇسۋگە ىقپال ەتەرى ءسوزسىز. ءبىز ءبىر-ءبىرىمىزدى قولداپ، تابىسقا بىرگە جەتەمىز دەپ سەنەمىن. ەكى ەلدىڭ دوستىعى ارتا بەرسىن»، - دەپ تۇيىندەدى ءسوزسىز پرەزيدەنت.
اۆتور
مارلان جيەمباي