قاسىم-جومارت توقايەۆ فينليانديا پرەزيدەنتىمەن كەزدەستى

استانا. KAZINFORM - كليماتتىڭ وزگەرۋى جونىندەگى ب ۇ ۇ- نىڭ نەگىزدەمەلىك كونۆەنسياسىنا قوسىلۋشى تاراپتاردىڭ 29- كونفەرەنسياسى اياسىندا ق ر پرەزيدەنتى قاسىم-جومارت توقايەۆ فينليانديا پرەزيدەنتى الەكساندر ستۋببپەن كەزدەسۋ وتكىزدى، دەپ حابارلايدى اقوردا.

قاسىم-جومارت توقايەۆتىڭ ايتۋىنشا، فينليانديا - قازاقستاننىڭ سولتۇستىك ەۋروپا ايماعى مەن تۇتاس ەۋروپا وداعىنداعى سەنىمدى ءارى ۋاقىت تەزىنەن وتكەن سەرىكتەسى.

مەملەكەتتەر باسشىلارى ەكىجاقتى قارىم-قاتىناستى، اتاپ ايتقاندا، ساۋدا- ەكونوميكا جانە مادەني- گۋمانيتارلىق سالالارداعى بايلانىستاردى ودان ءارى دامىتۋعا بەيىل ەكەنىن جەتكىزدى. سونىمەن قاتار فارماتسيەۆتيكا، ونەركاسىپتىك ماشينا جاساۋ جانە ينجەنەريا سياقتى سالالاردا فين كومپانيالارىمەن بىرلەسە قولعا العان جوبالاردىڭ تابىستى جۇزەگە اسىرىلىپ جاتقانىن اتاپ ءوتتى.

بۇدان بولەك، تاراپتار حالىقارالىق جانە وڭىرلىك كۇن تارتىبىندەگى وزەكتى ماسەلەلەر، سونداي- اق كوپجاقتى قۇرىلىمدار اياسىنداعى ىقپالداستىق جونىندە پىكىر الماستى. قازاقستان پرەزيدەنتى فينليانديانىڭ ە ق ى ۇ- عا ءتوراعالىق ەتۋ ىسىنە تابىس تىلەدى.

كەلىسسوزدەر قورىتىندىسى بويىنشا قازاقستان مەن فينليانديا پرەزيدەنتتەرى ءبىر-بىرىنە ساپارمەن بارۋعا كەلىستى. بۇل ساپارلار استانا مەن حەلسينكي اراسىنداعى ساياسي جانە ەكونوميكالىق سەرىكتەستىكتى نىعايتۋعا تىڭ سەرپىن بەرەدى.

ەسكە سالايىق، بۇگىن پرەزيدەنت قاسىم- جومارت توقايەۆ دۇنيەجۇزىلىك كليمات سامميتىنە قاتىسۋ ءۇشىن باكۋدەگى وليمپيادالىق ستاديونعا باردى. سوسىن مەملەكەت باسشىسى باكۋدەگى دۇنيەجۇزىلىك كليمات سامميتىندە ءسوز سويلەدى.