قاسىم-جومارت توقايەۆ بۋداپەشتتە ۆيكتور وربانمەن كەلىسسوز جۇرگىزدى

بۋداپەش. KAZINFORM - قازاقستان پرەزيدەنتى قاسىم-جومارت توقايەۆ ماجارستانعا مەملەكەتتىك ساپارى اياسىندا پرەمەر-مينيستر ۆيكتور وربانمەن كەلىسسوز جۇرگىزدى. كەزدەسۋ دوستىق راۋىشتە ءوتتى. بۇل ەكى ەل اراسىنداعى ءوزارا سەنىمنىڭ جوعارى ەكەنىن كورسەتەدى.

كەلىسسوزدەر بارىسىندا ىنتىماقتاستىقتىڭ باسىم باعىتتارى مەن ەكىجاقتى قارىم-قاتىناستى ودان ءارى تەرەڭدەتۋ پەرسپەكتيۆالارى تالقىلاندى. قازاقستان پرەزيدەنتى ماجارستاندى ەلىمىزدىڭ ەۋروپا وداعىنداعى سەنىمدى ستراتەگيالىق سەرىكتەسى، سونداي-اق دوستاس ءارى باۋىرلاس مەملەكەت رەتىندە اتاپ ءوتتى.

پرەزيدەنتتىڭ ايتۋىنشا، ماجارستانعا مەملەكەتتىك ساپارى ەكىجاقتى ىنتىماقتاستىقتى دامىتۋ، سونىڭ ىشىندە ەنەرگەتيكا، كولىك- لوگيستيكا سياقتى باعىتتارعا تىڭ سەرپىن بەرۋدى كوزدەيدى. بۇل رەتتە مۇناي- گاز سەكتورى مەن اۋىل شارۋاشىلىعى، لوگيستيكا، اتوم ونەركاسىبى جانە قارجى سالالارىنداعى بىرلەسكەن جوبالاردى جۇزەگە اسىرۋ ماسەلەلەرىنە باسا ءمان بەرىلدى.

قاسىم-جومارت توقايەۆ پەن ۆيكتور وربان جوسپارلانعان باستامالاردى تابىستى ورىنداۋ ءۇشىن ەكى ەل ۇكىمەتتەرى قولايلى جاعداي جاساۋعا دايىن ەكەنىن راستادى.

ماجارستان پرەمەر-ءمينيسترى ساپار بارىسىندا قول جەتكىزىلگەن ۋاعدالاستىقتار ءوزارا ىقپالداستىقتى ودان ءارى كەڭەيتە تۇسەتىنىنە سەنىم ءبىلدىردى.

بۇدان بولەك، تاراپتار ايماقتىق جانە حالىقارالىق كۇن تارتىبىندەگى ماسەلەلەر، سونىڭ ىشىندە كوپجاقتى قۇرىلىمدار اياسىنداعى بايلانىستار جونىندە پىكىر الماستى. قاسىم-جومارت توقايەۆ ۆيكتور ورباننىڭ تۇركى مەملەكەتتەرى ۇيىمىنىڭ حالىقارالىق ارەناداعى ءرولىن ارتتىرۋعا قوسقان ۇلەسىن جوعارى باعالادى.

بۋداپەشتتەگى كەلىسسوزدەر قوس تاراپتىڭ ستراتەگيالىق سەرىكتەستىكتى دامىتۋعا بەيىل ەكەنىن كورسەتىپ، ەكى ەل اراسىنداعى ىنتىماقتاستىقتى نىعايتۋعا جول اشتى.