قاسىم-جومارت توقايەۆ اسكەري قىزمەتشىلەردىڭ قاۋىپسىزدىگىنە ەرەكشە نازار اۋدارۋدى تاپسىردى

استانا. KAZINFORM - مەملەكەت باسشىسى قورعانىس ءمينيسترى داۋرەن قوسانوۆتى قابىلدادى، دەپ حابارلايدى اقوردانىڭ باسپا ءسوز قىزمەتى.

پرەزيدەنت - قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسى قاسىم-جومارت توقايەۆقا قورعانىس ۆەدومستۆوسىنىڭ 2025 -جىلدىڭ ءبىرىنشى جارتىجىلدىعىندا اتقارعان قىزمەتى تۋرالى باياندالدى.

مەملەكەت باسشىسىنا ارميانىڭ جاۋىنگەرلىك دايىندىعى، كوكتەمگى اسكەر قاتارىنا شاقىرۋ ناۋقانىنىڭ ناتيجەلەرى، اسكەري-پاتريوتتىق تاربيە جۇيەسىن جەتىلدىرۋ جانە اسكەري قىزمەتشىلەردى الەۋمەتتىك تۇرعىدان قامسىزداندىرۋ شارالارى جونىندە مالىمەت بەرىلدى.

داۋرەن قوسانوۆ پرەزيدەنت تاپسىرمالارىنىڭ ورىندالۋ بارىسىن جەتكىزدى. اتاپ ايتقاندا، مەملەكەت باسشىسىنا اسكەردىڭ ۇتقىرلىق دەڭگەيىن ارتتىرۋ، اۋە شابۋىلىنا قارسى قورعانىستى كۇشەيتۋ، اۋماقتىق اسكەر مەن ۇشقىشسىز ۇشاتىن اپپاراتتار بولىمشەسىن، اسكەري ينفراقۇرىلىمدى دامىتۋ، سونداي-اق قورعانىس سالاسىنداعى مەملەكەتتىك تاپسىرىستى ورنالاستىرۋ ماسەلەلەرى جونىندە اقپارات ۇسىنىلدى.

- قاسىم-جومارت توقايەۆ مينيسترگە قارۋلى كۇشتەردىڭ اسكەري الەۋەتىن ودان ءارى ارتتىرۋ جونىندە ءبىرقاتار مىندەت جۇكتەدى. سونىمەن قاتار مەملەكەت باسشىسى اسكەري قىزمەتتىڭ قاۋىپسىزدىگىن قامتاماسىز ەتۋگە، اسكەري قىزمەتشىلەردىڭ جاراقات الۋ جانە جازىم بولۋ وقيعالارىنىڭ الدىن الۋعا باعىتتالعان كەشەندى شارالار قابىلداۋدىڭ ماڭىزدىلىعىنا نازار اۋداردى، - دەلىنگەن حابارلامادا.

بۇدان بۇرىن پرەزيدەنت ەلىمىزدىڭ كولىك سالاسىن دامىتۋعا، قاتىناس جولدارىنىڭ ينفراقۇرىلىمىن قالىپتاستىرۋعا جانە جاڭعىرتۋعا قوسقان ەلەۋلى ۇلەسى ءۇشىن ءبىر توپ ازاماتتى مەملەكەتتىك ناگرادامەن ماراپاتتادى.