قارسى الۋ ءراسىمى سالتاناتتى راسىمدەر زالىندا قۇرمەت قاراۋىلىنىڭ ساپ تۇزەۋىنەن باستالدى. قاراۋىل باستىعى مەملەكەت باسشىسى مەن مارتەبەلى مەيمانعا بايانات بەردى.
وسىدان كەيىن پرەزيدەنت وركەسترى ەكى ەلدىڭ ءانۇرانىن ورىندادى.
ودان ءارى ۆيكتور وربان مەن قاسىم-جومارت توقايەۆ كىلەمشە بويىمەن قازاقستان رەسپۋبليكاسىنىڭ مەملەكەتتىك تۋىنا قاراي ءجۇردى.
ونىڭ الدىنا كەلگەندە مەيمان توقتاپ، باسىن ءسال ءيىپ، ءىلتيپات ءبىلدىردى.
بۇدان كەيىن ەكى ەل باسشىلارى قۇرمەتتى قاراۋىل ساپىنىڭ بويىمەن ءجۇردى.
ماجارستان پرەمەر-ءمينيسترى قۇرمەتتى قاراۋىل باستىعىمەن قوشتاسىپ، ق. توقايەۆپەن كەزدەسۋگە ءوتتى.
ەسكە سالساق، كەشە كەشكە ۆيكتور ورباندى استانا اۋەجايىندا پرەمەر-ءمينيستردىڭ ورىنباسارى سەرىك جۇمانعارين كۇتىپ العان بولاتىن.
قازاقستان باسشىلىعىمەن كەلىسسوز بارىسىندا قازاقستان مەن ماجارستان اراسىنداعى ساۋدا-ەكونوميكالىق، ينۆەستيتسيالىق جانە مادەني-گۋمانيتارلىق سالالارداعى ىنتىماقتاستىقتى ودان ءارى تەرەڭدەتۋ ماسەلەلەرى تالقىلانادى دەپ جوسپارلانىپ وتىر.
ايتا كەتۋ كەرەك، استانادا تۇركى مەملەكەتتەرى ۇيىمىنىڭ X سامميتى وتەدى.
وعان ازەربايجان، قىرعىزستان، تۇركيا، وزبەكستان پرەزيدەنتتەرى، باقىلاۋشى مەملەكەتتەر - ماجارستان مەن تۇرىكمەنستان باسشىلارى قاتىسادى.
اۆتور
ەسىمجان ناقتىباي