قاسىم-جومارت توقايەۆ اقوردادا فرانسيا پرەزيدەنتى ەممانيۋەل ماكروندى قارسى الدى
مەملەكەت باسشىسى قاسىم-جومارت توقايەۆ قازاقستانعا رەسمي ساپارمەن كەلگەن فرانسيا پرەزيدەنتى ەممانيۋەل ماكروندى اقوردادا كۇتىپ الدى، دەپ حابارلايدى Kazinform اگەنتتىگى.
مارتەبەلى مەيماننىڭ ساپارىنا وراي سالتاناتتى راسىمدەر زالىندا قۇرمەت قاراۋىل ساپ تۇزەپ، ونىڭ باستىعى مەملەكەتتەر باسشىلارىنا بايانات بەردى.
وسىدان كەيىن پرەزيدەنتتىك وركەستر ەكى ەلدىڭ ءانۇرانىن ورىندادى.
ودان ءارى ەممانيۋەل ماكرون مەن قاسىم-جومارت توقايەۆ كىلەمشە بويىمەن قازاقستان رەسپۋبليكاسىنىڭ مەملەكەتتىك تۋىنا قاراي ءجۇردى.
ونىڭ الدىنا كەلگەندە مەيمان توقتاپ، باسىن ءسال ءيىپ، ءىلتيپاتىن ءبىلدىردى.
بۇدان كەيىن قوس پرەزيدەنت قۇرمەتتى قاراۋىل ساپىنىڭ بويىمەن ءجۇردى.
فرانسيا پرەزيدەنتى قۇرمەتتى قاراۋىل باستىعىمەن قوشتاسىپ، ق. توقايەۆپەن شاعىن قۇرامداعى كەزدەسۋگە ءوتتى.
ەسكە سالايىق، فرانسيا پرەزيدەنتى قازاقستانعا مەملەكەت باسشىسى قاسىم-جومارت توقايەۆتىڭ شاقىرۋىمەن كەلىپ وتىر.
ساپار اياسىندا ەكى ەل باسشىلارى ساۋدا-ەكونوميكالىق، ينۆەستيتسيالىق جانە ەنەرگەتيكالىق ىنتىماقتاستىقتى نىعايتۋ، سونداي-اق حالىقارالىق جانە وڭىرلىك كۇن تارتىبىندەگى ماسەلەلەردى تالقىلايدى دەپ جوسپارلانعان.
ايتا كەتۋ كەرەك، قازاقستان پرەزيدەنتى قاسىم-جومارت توقايەۆتىڭ فرانسياعا بىلتىر جاساعان رەسمي ساپارى اياسىندا 35 قۇجاتقا قول قويىلعان بولاتىن.