جيىننىڭ سالتاناتتى اشىلۋ راسىمىندە ق ر پرەمەر-ءمينيسترىنىڭ ورىنباسارى - مادەنيەت جانە اقپارات ءمينيسترى ايدا بالايەۆا مەملەكەت باسشىسىنىڭ قۇتتىقتاۋ ءسوزىن وقىپ بەردى.
- بۇل ماڭىزدى ءىس-شارا قازاقستان ۇسىنىسىمەن ب ۇ ۇ جاريالاعان حالىقارالىق ۆولونتەرلەر جىلىندا ءوتۋىنىڭ سيمۆولدىق ءمانى زور. بۇل ۆولونتەرلەردىڭ كوپتەگەن الەۋمەتتىك، گۋمانيتارلىق جانە ەكولوگيالىق ماسەلەنى شەشۋدەگى وراسان زور ءرولىنىڭ مويىندالۋىن بىلدىرەدى،- دەلىنگەن پرەزيدەنت سوزىندە.
سونىمەن قاتار، ونىڭ مالىمدەۋىنشە، وسى فورۋمدى وتكىزۋ تۋرالى باستاما كوتەرە وتىرىپ، قازاقستان ت م د اياسىندا تاجىريبە الماسۋعا جانە حالىقارالىق ارەناداعى ۆولونتەرلىك باستامالاردى بىرىكتىرۋگە ارنالعان تۇراقتى الاڭ قۇرۋدى ماقسات ەتتى. قازاقستان ءۇشىن دوستىق كوپىرلەرىن قالىپتاستىرۋ، ىنتىماقتاستىق، مەيىرىمدىلىك جانە جاناشىرلىق سياقتى قۇندىلىقتاردى ورنىقتىرۋ اسا ماڭىزدى.
ودان بولەك، قازاقستاندا ۆولونتەرلىك ادام الەۋەتىن دامىتۋعا، ازاماتتىق يدەيالاردى ىلگەرىلەتۋگە جانە جاڭا قوعامدىق ەتيكانى قالىپتاستىرۋعا قىزمەت ەتەدى.
- 1-شىلدەدەن باستاپ جاڭا كونستيتۋتسيا كۇشىنە ەندى. ول ەلىمىزدىڭ تاريحىندا العاش رەت ۆولونتەرلىك قىزمەتكە مەملەكەتتىك قولداۋدى ەڭ جوعارى قۇقىقتىق دەڭگەيدە بەكىتتى. ەرىكتىلەردىڭ ىزگى نيەتى - سارقىلماس شابىت كوزى ءارى قوعامدى وزگەرتۋدىڭ قۋاتتى كۇشى. بۇعان «تازا قازاقستان» جالپى ۇلتتىق قوزعالىسى جارقىن مىسال بولا الادى. بۇل يگى باستاما قىسقا مەرزىم ىشىندە كوپتەگەن ازاماتتى، اسىرەسە بەلسەندى جاستاردى بىرىكتىردى. جالپى، ۆولونتەرلەر جىلى اياسىندا مىڭداعان ءىس-شارا وتكىزىلدى. قازىر ەلىمىزدەگى ۆولونتەرلەر سانى 300 مىڭعا جۋىقتادى. بۇل فورۋم مەملەكەتتەرىمىز اراسىنداعى گۋمانيتارلىق ىنتىماقتاستىقتى دامىتۋعا ەلەۋلى ۇلەس قوسىپ، حالىقتار اراسىنداعى بايلانىستاردى، ءوزارا سەنىم مەن تاتۋ كورشىلىكتى نىعايتۋعا ىقپال ەتەدى دەپ سەنەمىن. باستى ماقسات – ت م د اۋماعىن جاسامپازدىق پەن پروگرەسس، بىرلىك پەن ءوزارا تۇسىنىستىك كەڭىستىگىنە اينالدىرۋ. بارلىق ۆولونتەرگە الەمدى جاقسى جاققا وزگەرتۋگە دەگەن ۇمتىلىستارى ءۇشىن شىنايى العىسىمدى بىلدىرەمىن. فورۋم قاتىسۋشىلارىنا جەمىستى جۇمىس جانە ۇلكەن ورتاق جەتىستىكتەر تىلەيمىن! - دەلىنگەن مەملەكەت باسشىسىنىڭ قۇتتىقتاۋىندا.
ايتا كەتەيىك، ەكى كۇنگە جوسپارلانعان فورۋمعا قازاقستان، ازەربايجان، بەلارۋس، قىرعىزستان، رەسەي، تاجىكستان جانە وزبەكستاننان مەملەكەتتىك ورگانداردىڭ، ۆولونتەرلىك ۇيىمداردىڭ وكىلدەرى مەن ەرىكتىلەردى قوسا العاندا، شامامەن 300 دەلەگات قاتىسىپ جاتىر.
فورۋم اياسىندا پانەلدىك سەسسيالار، تاقىرىپتىق پىكىرتالاستار جانە ۆولونتەرلىك قىزمەتتىڭ تابىستى تاجىريبەلەرىنىڭ تانىستىرىلىمى وتەدى. ەكولوگيا، الەۋمەتتىك جانە ينكليۋزيۆتى قولداۋ، سونداي-اق جاستار ۆولونتەرلىگىن دامىتۋ سالالارىنداعى مەملەكەتارالىق ىنتىماقتاستىقتى نىعايتۋعا، بىرلەسكەن باستامالاردى قالىپتاستىرۋعا ەرەكشە نازار اۋدارىلادى.
سونىمەن قاتار، ەندى ءىس-شارا ۇيىم ەلدەرى اراسىنداعى ۆولونتەرلىك باستامالاردى بىرىكتىرۋگە جانە تاجىريبە الماسۋعا ارنالعان الاڭ رەتىندە جىل سايىن ۇيىمداستىرىلادى.
ايتا كەتەيىك، بۇعان دەيىن ەلدە ۆولونتەرلىك قوزعالىستى 2030-جىلعا دەيىن دامىتۋ جوسپارى قارالعانىن جازعانبىز.